Luka 24 - Kibaku NT

Hyatǝr Yɛsu akwa Ntǝnti

¹ Akwa vǝr tangkur nǝr magu, kula-kula mbǝk, mwahyi yarni kǝtǝ kariyir sǝ sǝwur nam sǝɗa tǝ dar tara ɗǝmhǝ dar ka mwari ata kǝr kul ni.

² Ma dar ata lǝngui ndǝ mbǝyanta paya nam ata nya kul ni.

³ Ama sakatǝ dar lǝkwa, dar ta ɓui dzá Thlaku Yɛsu ni wɛ.

⁴ Tǝ dar tsu akwa ɗǝnga ata kǝra sǝ ǝni, tǝkǝma ndza sǝli yarɛ laka sǝɗɛ aka kariyir dar ada mbǝli apa makǝiyir hyal ada hyati ata ngwama dar.

⁵ Kadǝbar hyivǝr, mwahyi yarɛ ni ka nganyi kǝra dar tǝ kǝma dar ada wul dai, ama sǝli yarɛ ni ka nkǝrɛ ala dar, “Kami tǝ gǝri ada bara ndǝ nam aka mpikɛ akwa ntsa ndzǝ ntǝnti?

⁶ Dzǝ adi akwani wɛ; Dzǝ hyati! Ɗǝngatamɛ apa tǝ dzǝ nkǝrɛ ala gǝri, sakatǝ dzǝ kaka gǝri akwa Galili:

⁷ ‘Ata ndzai ntsakǝr ka ndǝ hamnta Zǝr Ndɛ ala ndzǝr biku, ka dar kukwanta tǝni ba akwa vǝr makǝrkur dzǝ ata hyati kadamwa.’ ”

⁸ Antǝ dar ka ɗǝngati ndǝrǝrni yarɛ.

⁹ Sakatǝ dar tǝra sivi akwa vui kul ni, dar tsǝba sanga sǝ yarɛ ni ala ndzǝr nuwurni kumɛ kasutang ni ba ala sanga ndzǝ damwa.

¹⁰ Mwahyi yarɛ ni ani Maryamu Magǝdaliya, Dzauna, Maryamu angǝra Yakubu, ba kaka laka mwahyi yarɛ nam vwam kaka dar, dar dza tara tsǝba ala ndzǝr hya yarni.

¹¹ Ama dar ta mbǝrsa aka labarǝr mwahyi yarɛ ni wɛ, kadǝbar dar ada wulɛ apa labarǝr dar ni adi dzǝri wɛ.

¹² Ama Bitrusu hyati ka whui atǝra akwa vui kul ni. Dzǝ nganyi kǝrari alǝkwa kul ni, dzǝ ka wula baktar lilǝng yarni ada puyir dar, ba dzǝ ka tǝra, tǝ dzǝ ada ndatǝdzi ata kǝra sǝ nam tara 'ya.

Akwa Whalǝr Imuwasu

¹³ Tsu vǝr nda sǝɗa akwa ntsa ndzǝr nuwurni angwada tǝra akwa mǝlmǝ laka nam tǝ thlǝmari Imuwasu, pǝɗǝmkurni aka Ursalima kudzǝghɛ aka miyal murfwɛ.

¹⁴ Tǝ dar ada ndǝrɛ ata kǝra sǝ nam tara 'ya ni.

¹⁵ Apa tǝ dar ada ndǝrɛ ata kǝra sǝ nam tara 'ya ni aka kǝma dar, Yɛsu aka kǝrni si adzǝ dar tǝ dar ada mwari vwam kaka dar;

¹⁶ ama su kanti ala dar kura dar ta zǝndi apǝri dza.

¹⁷ Yɛsu ka yu tǝ dar, “Sǝr mi tǝ gǝri ada nkǝrɛ ala kǝma gǝri ahani tǝ gǝri ata kǝra mwari?” Dar ka hyati dam, tǝ ɗǝfa dar tara dli tǝ dar.

¹⁸ Pathla dar nam tǝ thlǝmari Kǝliyaupas, ka yu tǝni, “Ka gǝ mǝthlǝɓi akwa Ursalima ba kura gǝ ta zǝndi sǝ nam tara 'ya akwa vǝr yarɛ ni ya?”

¹⁹ Dzǝ ka yuwɛ, “Dzǝli sǝ madi yarɛ?” Dar ka sǝnau, “Ata kǝra Yɛsu ndǝr Nazarat,” Dzǝ nabi, dzǝ aka dǝna akwa ndǝrɛ ba kǝthlǝr akǝma Hyal aka sanga ndzi.

²⁰ Nggar fǝrist yarɛ ba ndzǝ ngga-ngga yarɛ ka hamnta tǝni ka ndǝ 'ya alari hakar tsa, ani ndǝ ka kukwanta tǝni;

²¹ ama yar aka tǝmá apǝri dzǝ ani ata pǝli ndzǝr Izǝraila. Ba mǝ damwa asǝna aka vǝr makǝr tǝ sǝ ǝni tara 'ya.

²² “Aghǝla tǝ sanga sǝ ǝni 'ya, mwahyi laka yarɛ akwa ntsa yar la yar sǝr ndati. Dar mwari akwa kulari asǝna kula-kula mbǝk

²³ ama dar ta ɓui dzarari wɛ. Dar ka si ka nkǝrɛ ala yar apǝri su tsan kǝma ala dar tǝ dar wula ndzǝr hyantǝr Hyal, nam tara nkǝrɛ ala dar apǝri dzǝ aka mpikɛ.

²⁴ Ndzǝr yar laka nam vwam kaka yar mwari akwa kulari ba dar ka ɓui tsu apa tǝ mwahyi yarnda tara gha, ama dzǝ tǝ kǝrni dar ta wula tǝni wɛ.”

²⁵ Dzǝ ka nkǝrɛ ala dar, “Gǝr ndzǝ nam kura aka ɗǝnga, gǝri ndzǝ nam kura ada nguya mbǝrsa aka sǝ nam tǝ nabi yarɛ tara gha!

²⁶ Adi Kǝrsti ni ani ata ɗar bwanaiyir sǝ yarɛ ni wɛ ani kama dzǝ lǝkwa nggakurni wɛ?”

²⁷ Ba dzǝ ka baditsǝni aka Musa, ba sanga nabi yarɛ, dzǝ ka nkǝrnta ala dar sǝ yar nam tǝ ndǝ gha akwa sanga Labar Hyal ata kǝra kǝrni.

²⁸ Sakatǝ dar sǝngui kudzǝghɛ akwa mǝlmǝ nam tǝ dar angwa si akwa ni, Yɛsu 'ya apa dzǝ angwa mwari lǝkǝma.

²⁹ Ama dar ka kǝgyǝ tǝni aka dǝna, “Dzǝɓtsǝni adzǝ yar, akuya tǝhaku kǝ 'ya; tsǝtsi kǝ ɗi.” Antǝ dzǝ ka dzǝɓtsǝni adzǝ dar.

³⁰ Sakatǝ dar ata sǝm sǝr sǝmɛ vwam, dzǝ ka kǝtǝ mantsǝkǝl, dzǝ ka 'ya gwaditsǝni, dzǝ ka pupwasu dzǝ ka baditsǝni la dar.

³¹ Antǝ ntsa dar ka mburntadzi dar ka zǝndǝba tǝni, ba dzǝ ka sá ala dar.

³² Dar ka yu kǝma dar, “Azǝrɛ, ɗǝfa muri adi ada mba tǝ muri akwa saka nam tǝ dzǝ ada ndǝrɛ ala muri akwa whalɛ, tǝ dzǝ ada nkǝrba ala muri Labar Hyal wɛ?”

³³ Tsu ata saka duku dar hyati ka ɓiti atǝra lǝkwa Ursalima. Dar ka ɓui kum kasutang yarɛ ni ba ndzǝ nam kaka dar, tara tsaɓtsǝnidzi atakǝmaduku

³⁴ tǝ dar ada nkǝrɛ, “Dzǝri, Thlaku hyati, har tǝ dzǝ tsantǝdzi ala Simaun.”

³⁵ Antǝ ndzǝ sǝɗǝ ni ka nkǝrba sǝ nam tara 'ya akwa whalɛ, ba whal nam tǝ dar zǝndǝba Yɛsu sakatǝ dzǝ pupwasɛ mantsǝkǝl ni.

Yɛsu Tsantǝdzi ala Ndzǝr Nuwurni

³⁶ Sakatǝ dar tsu ata kǝra ndǝrɛ ata kǝra sǝni, Yɛsu tǝ kǝrni si ka hyati akwa ɓwanga dar ba dzǝ ka nkǝrɛ ala dar, “Ka ndzai lapiyakur nǝr Hyal 'ya ata kǝra gǝri!”

³⁷ Ama dar ɗǝghǝi ba hyivǝr ka ngǝti tǝ dar, dar ka kǝtǝ apǝri mambǝlɛ ani tǝ dar wula.

³⁸ Dzǝ ka nkǝrɛ ala dar, “Kami tǝ gǝri ada damitsǝnidzi, tǝ gǝri aka dzamɛ akwa ɗǝfa gǝri?

³⁹ Wulamɛ tsiyawai kaka thlǝlawai. Yi tǝ kǝrna! Tsǝkwaramɛ tǝra ka gǝri wula; mambǝlɛ adi aka kum aka ɗahyi wɛ, apa tǝ gǝri ada wula tǝ Yi akǝr.”

⁴⁰ Sakatǝ dzǝ tara nkǝrɛ ǝni, dzǝ ka tsanti ala dar tsiyari yarɛ kaka thlǝlari yarɛ.

⁴¹ Sakatǝ kura dar tsu ta mbǝrsa akǝri kadǝbar kutsari ba sǝr ndati, dzǝ ka yu tǝ dar, “Gǝri aka sǝ laka akwani tǝ ndǝ awa sǝmɛ?”

⁴² Dar ka lari kulfa tsa-tsa.

⁴³ Ba dzǝ ka dlutsi dzǝ ka ɗǝnya akǝma dar.

⁴⁴ Dzǝ ka nkǝrɛ ala dar, “Əni ani sǝ nam tǝ Yi gha ala gǝri sakatǝ Yi tsu vwam kaka gǝri: Kǝlara su kǝ ndzai ntsakǝr ka dzǝ ghǝiyabadzi nam tǝ ndǝ rǝbwai ata kǝrawai akwa Mabariyir Musa ni, Nabi yarɛ ni ba Zabura ni.”

⁴⁵ Antǝ dzǝ ka mburnta ɗǝngar dar, ani ka dar mǝzi ka ngaba Labar Hyal,

⁴⁶ dzǝ gha ala dar, “Əni ani sǝ nam rǝbwa-rǝbwa: Kǝrsti dzǝ ata ɗar bwanai ba dzǝ ata hyati akwa ntǝnti ata vǝr makǝrkur,

⁴⁷ ba tubi aka kyifǝnta biku ndǝ ata nkǝr labarari akwa thlǝmari ala sanga ndzi, baditsǝni akwa Ursalima.

⁴⁸ Gǝri sakǝida nǝr sǝ yarɛ ni.

⁴⁹ Yi ata hyanti ala gǝri sǝ nam tǝ Bana tara 'ya alkawalari; Ama ndziyamɛ tsu akwa mǝlmɛ ni tar ma ndǝ la gǝri dǝna nam atahyal.”

Lǝtǝr Yɛsu Atahyal

⁵⁰ Sakatǝ dzǝ lǝba aka dar akwa Baitanya, dzǝ ka haɓǝti tsiyari yarɛ atahyal dzǝ ka pukǝr ala dar barka.

⁵¹ Sakatǝ dzǝ ada vǝdzɛ ala dar barka, dzǝ ngyar tǝ dar ndǝ ka kǝtǝ tǝni alǝtahyal.

⁵² Antǝ dar ka vǝkǝr sǝlai alari, dar ka ɓiti asi akwa Ursalima tǝ dar ada kutsari nam ngga.

⁵³ Tatang vǝri dar akwa fǝr Hyal, tǝ dar ada hǝm thlǝma Hyal.