Luka 22 - Kibaku NT

Yahuda Iskaryauti Lu ka Dzǝ Ɓǝlai Yɛsu

¹ Kulini Wudzǝr Mantsǝkǝl nam kura Thlǝlam, nam tǝ ndɛ ada ka tǝ Wudzǝr Ngǝmba, kǝ si kudzǝghɛ,

² antǝ nggar fǝrist yarɛ ni ba mǝlǝmǝr mabari yarɛ ni dar ada bara whal nam tǝ dar awatsi Yɛsu, akuya dar ada hyivǝr ndzi.

³ Antǝ Satan ka lǝkwa Yahuda, nam tǝ ndɛ ada ka tǝ Iskaryauti, pathlu akwa ntsa kum kapu sǝɗɛ yarɛ ni.

⁴ Ba Yahuda ka mwari ka 'ya sawari aka nggar fǝrist yarni ba ngganggar ndzǝr ɓǝla fǝr Hyal ata kǝra whal nam tǝ dzǝ awa ɓǝlai Yɛsu ala dar.

⁵ Antǝ dar ka 'ya kutsari ba dar ka mbwai apǝri dar ata lar gǝna.

⁶ Dzǝ tsuwɛ dzǝ yiɗɛ, tǝ dzǝ baditsǝni bara whal nam tǝ dzǝ awa hamnta Yɛsu ala dar saka kura ndzi hang adai.

Sǝr Sǝmǝr Tǝhaku nǝr Dǝnta

⁷ Antǝ vǝr Wudzǝr Mantsǝkǝl kura Thlǝlam ni ka si ani vǝr nam tǝ ndɛ ada tsa zǝr agam nǝr Wudzǝr Ngǝmba ni.

⁸ Yɛsu ka hya Bitrusu aka Yawhana, tǝ dzǝ nkǝrɛ ala dar, “Mwaramɛ ka gǝri ɗǝmhǝi ala muri sǝr sǝmǝr Wudzǝr Ngǝmba.”

⁹ Dar ka nkǝrɛ alari, “Amarɛ tǝ gǝ ada bara ka yar ɗǝmhǝi?”

¹⁰ Dzǝ ka sǝnau, “Ma gǝri lǝkwa kuta mǝlmɛ, gǝri ata kǝɓai aka sal laka ada kǝl tǝghum yimi. Ka gǝri nu tǝni har kǝi nam tǝ dzǝ lǝkwa,

¹¹ ka gǝri nkǝrɛ ala thlakǝr kǝi ni, ‘Malǝm ada yuwɛ: Ama fǝr mǝthlǝɓi vui nam tǝ Yi awa sǝm sǝr sǝmǝr Ngǝmba kaka ndzǝr nuwurna?’

¹² Dzǝ ata tsanti ala gǝri fǝr nam ata kǝra kǝmani nam ngga aka kari tǝ ndǝ ɗǝmhǝi akwa. Akwanda tǝ gǝri ata ɗǝmhǝi ala muri.”

¹³ Ani dar ka tǝra ba dar ka ɓui apa tǝ dzǝ gha ala dar, dar ka ɗǝmhǝi sǝr sǝmǝr Wudzǝr Ngǝmba ndari.

¹⁴ Sakatǝ sakari tara 'ya, Yɛsu kaka ndzǝr hyarni ka ndzai ata tɛbǝr.

¹⁵ Dzǝ ka nkǝrɛ ala dar, “Yi bara ka Yi sǝm sǝr sǝmǝr Ngǝmba ǝni vwam kaka gǝri, kabutu ma Yi ata ɗar bwanai.

¹⁶ Akuya Yi nkǝrɛ ala gǝri, Yi tsu adi ata ɓakta sǝm tǝni wɛ, tar ma dzǝ ɓui ghǝiyabadzi akwa kuhyikur Hyal.”

¹⁷ Aghǝla tǝ dzǝ kǝtǝ kapu ni, dzǝ ka 'ya gwaditsǝni ba dzǝ ka nkǝrɛ, “Ndamɛ ǝni ka gǝri ndǝghǝi akwa ɓwanga gǝri.

¹⁸ Yi ada nkǝrɛ ala gǝri, Yi tsu adi ata ɓakta sa yimǝr inabi wɛ, tar ma kuhyikur Hyal si.”

¹⁹ Ba dzǝ ka kǝtǝ mantsǝkǝl, aghǝla tǝ dzǝ usar Hyal dzǝ ka ɓǝgǝlu, ba dzǝ ka la dar, dzǝ ka nkǝrɛ, “Əni ani dzawai nam tǝ Yi ata hamnta akuya gǝri, ka gǝri lǝkǝma aka 'ya ahani, kadǝbar ɗǝngati tǝra.”

²⁰ Tsu akwa whal ǝni, aghǝla sǝr sǝmǝr tǝhaku ni, dzǝ kǝtǝ kapu ni ka nkǝrɛ, “Kapu ǝni ani sǝ nam mbwa-mbwa bǝlin akwa masǝrna, nam tara puntadzi akuya ka gǝri.”

²¹ “Ama nda yar ata pau tsai akwa kwatǝm duku aka ndǝ nam ata siya ɓǝlai tǝra ni.

²² Zǝr Ndɛ ni ata nti tsu apa tǝ ndǝ rǝbwai ata kǝrari, ama bwasam ala ndǝ ǝnda nam tara ɓǝlai Zǝr Ndɛ ni.”

²³ Dar ka baditsǝni yu kǝma dar apǝri ndǝ madi ani ata 'ya sǝ ni.

²⁴ Ani ɓwalnya ka hyati akwa ɓwanga dar ata kǝra apǝri wa ani ata ndzai ndǝ nam nggar dar.

²⁵ Yɛsu ka nkǝrɛ ala dar, “Kuhyi yarɛ nǝr ndzǝ kura Yahudi ada tsan nggakur ata kǝra dar; ba ndzǝ nam aka wada dar ada nkǝrɛ ala kǝr dar apǝri dar ndzǝr dlar ndzi.

²⁶ Ama gǝri adi ata 'ya apani wɛ. Ata vuiya ǝni, ndǝ nam ngga ta sang akwa ntsa gǝri ka dzǝ ndzai apa dzǝ dza nkyiɗu ta sang, ba ndǝr 'ya haka ka dzǝ ndzai apa ndǝr 'ya kǝthlǝr.

²⁷ Akuya wa ani ngga dar, ndǝ nam ada ndzai ka sǝm su kǝna ndǝ nam tara si aka sǝr sǝmari? Azarɛ, adi ndǝ nam tara ndzai ka sǝm ni wɛ? Nda yɛ akwa ntsa gǝri apa ndǝr 'ya kǝthlǝr.

²⁸ “Gǝri dza ndzǝ nam tara hyati adzǝra akwa sǝr nkǝrti yarɛ nam tǝ Yi tara lǝkwa.

²⁹ Apa tǝ Bana tara lai dǝnar kuhyikur ani Yi ma tǝ Yi la gǝri,

³⁰ ani ka gǝri sǝmɛ ba sa ata tɛbǝrna akwa kuhyikurna ka gǝri ndzai ata dǝgǝl kuhyikur, ka gǝr 'ya haka ala kulfɛ yarɛ kum kapu sǝɗɛ nǝr Izǝraila ni.

³¹ “Simaun, Simaun, Satan yuwɛ dzǝ ka ɓui whalɛ ka dzǝ puhǝba tǝ gǝri apa tǝ ndɛ ada puhǝba lǝkama akwa ɓaɓiya.

³² Ama Yi 'ya ala gǝ aduwa, ta hamnta dzǝri ngɛ ta kǝtǝ, ba sakatǝ gǝ mbaltǝdzi ka si, ka gǝ dǝnautsǝni madar ma yarɛ.”

³³ Ama Bitrusu sǝnau, “Thlaku, Yi ɗǝmhǝdzi ka Yi nu tǝngɛ akwa fǝrsǝna ma nti ma mwa nti.”

³⁴ Yɛsu ka sǝnau, “Yi ada gha ala gǝ, Bitrusu, asǝna kabutu ma vukum ata tuwa, gǝ ata ɓwalnta nyar zǝndi tǝra ka makǝr.”

³⁵ Antǝ Yɛsu ka nkǝrɛ ala dar, “Saka nam tǝ Yi tara hya tǝ gǝri kura aka gǝna, ngǝrkǝr, wala ɓǝɓai, sǝ laka adi nam kura gǝri ta ɓui ya?” Dar ka nkǝrɛ, “Adi wɛ.”

³⁶ Dzǝ ka nkǝrɛ ala dar, “Ama kulini ma gǝri aka, gǝna, kǝtamɛ, ba ngǝrkǝr yɛ; ba ma gǝri adi aka katsakar wɛ, ka gǝri ɗǝlnta lǝkutǝr gǝri ka gǝri ɗǝlba.

³⁷ Rǝbwa-rǝbwa apǝri, ‘Ndǝ tsu tǝni akwa ntsa ndzǝr biku,’ ba yi ada gha ala gǝri apǝri sǝ ǝni ntsakǝr ka dzǝ ghǝiyabadzi akwa yɛ. A sǝ nam tǝ ndǝ rǝbwa ata kǝrawai angwa ada ghǝiyabadzi.”

³⁸ Ndzǝr tsǝlɛ ka nkǝrɛ alari, “Wulɛ, Thlaku, nda katsakar sǝɗɛ.” Dzǝ ka sǝnau ala dar, “Kǝ mǝzi.”

Yɛsu 'Ya Aduwa ata Payar Zaitun

³⁹ Yɛsu sǝba ka mwari akwa Payar Zaitun apa tǝ dzǝ ada 'ya, ba ndzǝr nuwurni ka nu tǝni.

⁴⁰ Sakatǝ dzǝ tara tsǝbti vuiyari, dzǝ ka nkǝrɛ ala dar, “Ka gǝri 'ya aduwa ta gǝri ta ɗu akwa sǝr nkǝrti.”

⁴¹ Dzǝ ka ɗar tabardzi ta dar apa pǝɗǝmkur ɗal paya pathlu, dzǝ ka zǝɗi, ka 'ya aduwa.

⁴² Dzǝ ka gha, “Bana, ma apǝri gǝ yiɗɛ, ka gǝ kǝlnta alai kapǝr bwanai ǝni, ahanarma adi apa tǝ Yi ada bara wɛ, ama apa nam tǝ gǝ yiɗɛ.”

⁴³ Antǝ ndǝr hyantǝr Hyal si atahyal ka tsantǝdzi alari ka dǝnautsǝni tǝni.

⁴⁴ Sakatǝ dzǝ akwa bwanai, dzǝ hau kǝr akwa 'ya aduwa aka dǝna, har tǝ tsǝfǝrni ada ntǝɗi apa masi ata dai.

⁴⁵ Sakatǝ dzǝ hyati akwa 'ya aduwa ba dzǝ ka ɓitasi adzǝ ndzǝr nuwurni yarɛ, dzǝ ka ɓui tǝ dar ata hanyi, akuya dar ghǝri tǝ sǝzɛ.

⁴⁶ Dzǝ yu tǝ dar, “Kami tǝ gǝri ada hanyi? Hyatamɛ ka gǝri 'ya aduwa ani ka ta gǝri ta ɗu akwa sǝr nkǝrti.”

Ndǝ Ngǝti Yɛsu

⁴⁷ Sakatǝ dzǝ tsu ata kǝra ndǝrɛ hangkur ndzi ka si, ba ndǝ nam tǝ ndɛ ada kǝga tǝ Yahuda, pathlu akwa ntsa kum kapu sǝɗɛ ni, ani ada lǝkǝma ala dar. Dzǝ ka dangudzi kudzǝghɛ adzǝ Yɛsu ka dzǝ ka tsǝkwar tǝni.

⁴⁸ Ama Yɛsu ka yu tǝni, “Yahuda, azarɛ aka tsǝkwar ani tǝ gǝ ata hamnta Zǝr Ndɛ ya?”

⁴⁹ Sakatǝ ndzǝr nuwur Yɛsu tara wuti sǝ nam ada 'ya, dar ka nkǝrɛ, “Thlaku, ka yar dlǝ tǝ dar aka katsakar ya?”

⁵⁰ Ani pathlu akwa ntsa dar ka dli zǝr kǝiyir kuhyir fǝrist ni, ba dzǝ ka tsaɓunta thlǝmari nǝr tsisǝmɛ.

⁵¹ Ama Yɛsu ka sǝnau, “Ngyaramɛ tǝ dar apani.” Ba dzǝ ka tsǝkwar thlǝma zǝr kǝi ndari, dzǝ ka mbǝti tǝni.

⁵² Antǝ Yɛsu ka gha ala nggar fǝrist yarɛ ni, ba ngganggar ndzǝr ɓǝla fǝr Hyal ba ndzǝ ngga-ngga yarɛ nam tara si ka dza, “Yi ndǝ nam ada ndǝrkǝma ala ndzǝ kulɗa ya, tǝ gǝri sǝba aka katsakar kaka zuwa apa gǝr si ngǝzǝ ndǝr hǝlɛ?

⁵³ Tatang vǝri Yi vwam kaka gǝri akwa babalǝr fǝr Hyal, gǝri ta ngǝzǝ tǝra wɛ. Ama saka ǝni nǝgǝri—sakar dǝnar kuthlɛ.”

Bitrusu Ɓwalnta Nyar Zǝndi Yɛsu

⁵⁴ Antǝ dar ka ngǝti tǝni, dar ka tǝra aka dza ba dar ka mwari aka dza aivi ahar kuhyir fǝrist ni, Bitrusu tsuwɛ dzǝ ada nu tǝ dar aghǝli pǝɗǝm.

⁵⁵ Ama sakatǝ dar tara mbati u'u ata babalǝr kuta kǝi dar ka ndzai ata nya, Bitrusu ma ka ndzai akwa ntsa dar.

⁵⁶ Antǝ nkwar kǝi laka ka wula tǝni ada ndzai ata nya parakǝr u'u ni, dzǝ ka ngikǝba tǝni ɗa dzǝ ka nkǝrɛ, “Ai, ndǝ ni ma dar vwam aka dza.”

⁵⁷ Ama Bitrusu ɓwalnya ka nkǝrɛ, “Mwalara gǝ Yi ta zǝndi tǝni wɛ.”

⁵⁸ Aghǝla saka nkyiɗu laka ndǝ laka ka wula tǝni ka nkǝrɛ, “Gǝ ma gǝ pathlu akwa ntsa dar.” Ama Bitrusu ka gha, “Ndǝra gǝ, adi Yi wɛ.”

⁵⁹ Aghǝla awur pathlu ndǝ laka damwa hyati ka nkǝrɛ, “Pakat ndǝ ni ma dzǝ vwam kaka dza, kadǝbar dzǝ ndǝr Galili.”

⁶⁰ Ama Bitrusu ka sǝnau apǝri, “Yi ta zǝndi sǝ nam tǝ gǝ ada ndǝrɛ ata kǝr wɛ.” Tsu tǝ dzǝ ata kǝra ndǝrɛ ani vukum ka tuwa.

⁶¹ Antǝ Thlaku ka mbalti kǝrni ka wular Bitrusu. Bitrusu ka ɗǝngati sǝ nam tǝ Thlaku tara gha alari apǝri, “Asǝna ma, kabutu vukum ta tuwa gǝ ata ɓwalnta nyar zǝndi tǝra ka makǝr.”

⁶² Ba dzǝ ka mwari alǝba dzǝ ka tuwa nam dzau.

Ndǝ Gura Yɛsu ba Dlaɓwɛ tǝni

⁶³ Ndzǝ nam ada ɓǝla Yɛsu dar ka baditsǝni gura tǝni ba dar ada dlaɓu tǝni.

⁶⁴ Dar ka mbwai ntsari, tǝ dar nkǝrɛ alari, “'Ya nabikur! Wa dza tsa tǝngɛ ni?”

⁶⁵ Ba dar ka gha labar rutsǝni hangkurari alari.

Yɛsu Akǝma Pǝlatus aka Hirudus

⁶⁶ Sakatǝ vǝr tara kuri Ndzǝr Hakar Yahudi, dar nam ani nggar fǝrist yarɛ ba malǝmǝr mabari yarni, dar kǝɓai atakǝmaduku, dar ka vi Yɛsu akǝma dar.

⁶⁷ Dar ka nkǝrɛ, “Ma gǝ dza Kǝrsti ni,” “gha ala yar.” Yɛsu ka sǝnau ala dar, “Wala ma Yi gha ala gǝri ma, gǝri adi ata mbǝrsa akǝr wɛ,

⁶⁸ ba ma Yi yu tǝ gǝri, gǝri adi ata sǝnau alai wɛ.

⁶⁹ Ama baditsǝni kulini ka lǝkǝma, Zǝr Ndɛ ata ndzai tǝbwar tsisǝma Hyal nam ɓwaltasang.”

⁷⁰ Sanga dar ka yuwɛ, “Azarɛ gǝ ni gǝ Zǝr Hyal ya?” Dzǝ ka sǝnau, “Apa tǝ gǝri tara gha, Yi ani dza.”

⁷¹ Antǝ dar ka nkǝrɛ, “Kami tǝ muri tsu awa bara sakǝida damwa? Ai muri tǝ kǝr muri mur ngati akwa nyari.”