Luka 20 - Kibaku NT

Ndzǝ ada Yuwɛ ata Kǝra Nggakur Yɛsu

¹ Vǝr laka tǝ dzǝ ada hyipɛ ala ndzi akwa babalǝr fǝr Hyal, tǝ dzǝ ada 'ya ala dar ndǝrǝr Hyal nam sǝɗa, antǝ nggar fǝrist yarɛ ba malǝmǝr mabari yarɛ, ba ndzi ngga-ngga yarɛ ka sǝngui kudzǝghɛ adzǝni.

² Dar ka nkǝrɛ alari, “Nkǝrɛ ala yar aka wada madi tǝ gǝ ada 'ya sǝ yarni, kǝna wa tara la gǝ wada ni?”

³ Antǝ dzǝ ka sǝnau ala dar, “Yi ma Yi ata yu tǝ gǝri. Nkǝrɛ mɛ alai,

⁴ bamtizǝma nam tǝ Yawhana tara 'ya ni, hyati atahyal kǝna, hyati aka ndɛ?”

⁵ Antǝ dar ka 'ya sawari akwa ɓwanga dar, dar ka nkǝrɛ apǝri, “Ma apǝri, mur nkǝrɛ, ‘Atahyal,’ dzǝ ata nkǝrɛ apǝri ‘Kami kura gǝri ta mbǝrsa aka dza?’

⁶ Ma apǝri tsuwɛ mur nkǝrɛ apǝri, ‘Nǝr ndɛ,’ sanga ndzi ata ɗǝgal tǝ muri, kadǝbar dar kurtaka zǝndi apǝri Yawhana dzǝ nabi.”

⁷ Ani dar ka sǝnau alari, “Yar ta zǝndi vui nam tǝ dzǝ hyati akwa wɛ.”

⁸ Yɛsu ka nkǝrɛ ala dar, “Ani apani Yi ma Yi adi ata nkǝrɛ ala gǝr, tar aka wada madi tǝ Yi ada 'ya sǝ yarni wɛ.”

Karabu ata Kǝra Ndzǝr Kǝl Fwaku ka Agǝri

⁹ Dzǝ lǝkǝma aka nkǝrɛ karabu ǝni ala ndzǝ yarni: “Ndǝ laka adai tara thlǝkati fwakǝr inabi, dzǝ ka la ndzǝ laka ka dar tsǝwhɛ, dzǝ ka tǝra akwa mǝlmǝ laka tǝ dzǝ ka sǝkar.

¹⁰ Ata sakar ɗǝm madarari dzǝ hyanti zǝr kǝiyirni ala ndzǝr tsǝwhɛ yarɛ ǝnda, ka dar lar bwarni akwa madar inabi yarari. Ama ndzǝr tsǝwhɛ yarɛ ni ka dlaɓu tǝni, ka kǝdlǝnta tǝni aka tsi ɓǝrtu.

¹¹ Dzǝ ka ɓakta hyanti zǝr kǝi damwa, dzǝ ma dar ka dlaɓu tǝni, tǝ dar ka hau tǝni akwa sǝlai, dar ka kǝdlǝnta tǝni aka tsi ɓǝrtu.

¹² Dzǝ hyanti nǝr makǝrkur kadamwa, ba dar ka 'yanta tǝni, dar ka kǝdlǝba tǝni.

¹³ “Antǝ thlakǝr fwaku ni ka nkǝrɛ apǝri, ‘Mǝ tǝ Yi ata 'ya? Yi ata hyanti zǝrna nam tǝ Yi yiɗɛ. Pakat dar ata vǝkǝr sǝlai alari.’

¹⁴ “Ama sakatǝ ndzǝr tsǝwhɛ yarni wula tǝni, dar ka gha ala kǝma dar apǝri, ‘Əni ani ndǝr sǝm wartari,’ ndǝ dar. ‘Ngyar ka mur tsi tǝni, ka wartari ndzai nǝmuri.’

¹⁵ Ani dar ka ɗalba tǝni abǝla ata hǝiya fwaku ni dar ka tsi tǝni. “Sǝr mi tǝ thlakǝr fwaku ni ata 'ya ala dar?

¹⁶ Dzǝ ata si ka kurnta ndzǝr tsǝwhu yarɛ ni, ka dzǝ la fwaku ni ala ndzǝ damwa.” Sakatǝ ndzi ngati apani, dar ka nkǝrɛ, “Ta dzǝli sǝ ahani ta saga 'ya!”

¹⁷ Yɛsu ka wul tǝ dar nging, dzǝ ka yu tǝ dar, “Antǝ sǝr mi dzá tǝ sǝ nam tǝ ndǝ rǝbwai ǝni ada nkǝrɛ: “ ‘Paya nam tǝ ndzǝr tsa fǝr yarɛ tara ngǝla kǝ siya ndzai payar kuɗǝma’?

¹⁸ Kǝlara ndǝ nam tara ɗi ata kǝra paya ni, dzǝ ata ɓǝgǝludzi ɗǝɗǝhyu, ama ndǝ nam tǝ paya ni tara ɗǝkǝr alari, dzǝ ata ghyaɓuntadzi.”

¹⁹ Malǝmǝr mabari yarɛ, kaka nggar fǝrist yarɛ, ka bara whal nam tǝ dar awa ngǝti Yɛsu tǝnyi-tǝnyi, kadǝbar dar zǝndi apǝri, ata kǝra dar tǝ dzǝ gha karabu ni, ama dar ada hyivǝr ndzi.

Nkyɛ Tsǝmɛ ala Kaisar

²⁰ Dar ada wul tǝni tǝ hankal, dar ka hyanti ndzǝr mbǝla, nam tǝ dar mǝrti kǝr dar apa dar ndzǝ nam ɗaku. Dar hau akwa ɗǝfa dar apǝri dar ada ngǝti Yɛsu akwa sǝ yarɛ nam tǝ dzǝ gha, ani ka dar hamnta tǝni ala dǝna ba wadar gumna.

²¹ Ani ndzǝr mbǝla yarɛ ni ka yu tǝni: “Malǝm, yar zǝndi labar ngɛ aka hyipǝr ngɛ sang dzǝri, Ba gǝ kǝtǝ sanga ndzi kal-kal, ama gǝ ada hyipǝ whalǝr Hyal akwa whal nam dzǝri.

²² Kǝ 'ya kal-kal ya ka yar pu tsǝmɛ ala kaisar kǝna a'a?”

²³ Dzǝ zǝndi pǝndǝlkur nam akwa ɗǝfa dar, ba dzǝ ka nkǝrɛ ala dar,

²⁴ “Tsantamɛ alai dinariyus ni. Ənǝni par wa ba rǝbwar wa ani ati?”

²⁵ Dar ka nkǝrɛ alari, “Nǝr Kaisar.” Dzǝ ka nkǝrɛ ala dar, “Antǝ ka gǝri la Kaisar sǝ nam nǝr Kaisar, ba ka gǝri la Hyal sǝ nam nǝr Hyal.”

²⁶ Dar ta mǝzi ngǝti tǝni ata kǝra sǝ yarɛ nam tǝ dzǝ nkǝrɛ akǝma ndzi wɛ. Ani dar ka ndatǝdzi aka sǝnau nam tǝ dzǝ 'ya, dar ka ndzai kǝɗǝk.

Hyati akwa Ntǝnti ba Kǝldzi

²⁷ Ndzǝr Saduki yar laka dzǝ nam ada nkǝrɛ apǝri hyati akwa ntǝnti adi wɛ dar si adzǝ Yɛsu aka sǝr yuwɛ.

²⁸ Dar ka nkǝrɛ, “Malǝm, Musa rǝbwai ala yar akwa mabari apǝri, ma ndǝ tǝ zǝrangǝri nti, tǝ dzǝ ngyar mwalarni kura aka zǝr, kǝ ntsakǝr dzi ka zǝrangǝri kǝtǝ kuɗǝghum ni ka dzǝ yaba madausai ala zǝrangǝri!

²⁹ Yau, madar mama murfwɛ adai. Yar kǝmari ka kǝtǝ mwala, dzǝ ka nti kura dzǝ ta ɓui zǝr.

³⁰ Nǝr sǝɗǝkur

³¹ ba nǝr makǝrkur kǝl tǝni, ani apani sanga dar murfwɛ ni ka kurntadzi kura madar.

³² Aghǝla ǝni mwala ǝnari yɛ ka nti.

³³ Kulini dzá, vǝr hyati akwa ntǝnti dzǝ ata ndzai mwalar wa akwa ntsa dar, Kadǝbar sanga dar murfwɛ ni dar kǝl tǝni?”

³⁴ Yɛsu sǝnau, “Ndzǝr zaman ǝni dar ada kǝl mwala ba pwarnta nkwa ala sal.

³⁵ Ama ndzǝ nam ata mǝzi tǝ Hyal ata hyanti tǝ dar akwa ntǝnti ka ndzai akwa zaman ǝnda, dar adi ata kǝl mwala wala pwarnta nkwa ala sal wɛ.

³⁶ Ba dar tsu adi ata ntǝ kǝra wɛ; akuya dar apa ndzǝr hyantǝr Hyal. Dar madar Hyal akuya ka dar madar hyati akwa ntǝnti ni.

³⁷ Ama akwa ndǝrɛ ata kǝra sakatǝ zǝr fwɛ ada mba akwa ntaku ni wala Musa ma tsanti apǝri ndzǝ ntǝnti dar hyati, akuya tǝ dzǝ ka Thlaku ni ‘Hyalǝr Ibrahim ni, ba Hyalǝr Isaku ni, ba Hyalǝr Yakubu ni.’

³⁸ Dzǝ adi Hyalǝr ndzǝ ntǝnti wɛ, ama Hyalǝr ndzǝ nam aka mpikɛ, akuya alari sang ndzǝ yarni aka mpikɛ.”

³⁹ Laka malǝmǝr mabari yarɛ ka sǝnau, “Malǝm, gǝ gha kal-kal!”

⁴⁰ Ndɛ adi nam tara mǝzi ka ɓakta yu tǝni sǝr yuwɛ yarɛ kǝra wɛ.

Kǝrsti ni Dzǝ Zǝr Wa?

⁴¹ Antǝ Yɛsu ka nkǝrɛ ala dar, “Mǝmi tǝ dar ada nkǝrɛ apǝri Kǝrsti ni dzǝ Zǝr Dauda?

⁴² Akuya Dauda tǝ kǝrni nkǝrɛ akwa kakadǝr zabura: “ ‘Thlaku ni nkǝrɛ ala Thlakǝrna: “Ndzai tǝbwar tsisǝmawai

⁴³ tar ma Yi mǝrti dǝgunmar ngɛ yarɛ sǝr vǝ thlǝlɛ ala gɛ.” ’

⁴⁴ Dauda ka tǝni ‘Thlaku.’ Mǝmi dzá tǝ dzǝ awa ndzai zǝrǝrni?”

⁴⁵ Sakatǝ sanga ndzi ada sǝthlǝmɛ alari. Yɛsu nkǝrɛ ala ndzǝr nuwurni,

⁴⁶ “Vǝdzamɛ hankal ala malǝmǝr mabari yarni. Dar yiɗǝ nuɗɛ aka lǝkutu dzǝgam, ba dar yiɗǝ ka ndǝ thlawar tǝ dar akwa vui kasuku yarɛ, ba dar ada yiɗɛ vui ndzai nam dangaram akwa fǝr vǝkǝr sǝlai ba vui ndzai nam akwa vui gyali tǝ ndǝ ada hǝm hǝmɛ.

⁴⁷ Dar ada sǝnya kǝiyir kuɗǝghum yarɛ, ba dar ada 'ya aduwa yarɛ dzǝgam akuya ka ndǝ wula. Dzǝli ndzǝ yarni ata ɓui haka nam dzau.”