Luka 19 - Kibaku NT

Zaka Ndǝr Dlu Tsǝmɛ

¹ Yɛsu lǝkwa Dzarikau tǝ dzǝ ada kwatsǝni akwa kuta mǝlmari.

² Ndǝ laka adai akwanda nam tǝ thlǝmari Zaka; dzǝ nggar ndzǝr dlu tsǝmɛ ba dzǝ bǝrba.

³ Dzǝ ada bara ka dzǝ wula wala wa dza Yɛsu ni, ama akuya dzǝ ndǝ nkusu dzǝ ta mǝzi wula wɛ, kadǝbar ka hangkur ndzi.

⁴ Ani dzǝ ka whuiya lǝkǝma dzǝ ka fǝlti mamar fur lita laka ka dzǝ wula tǝni, kadǝbar tǝ Yɛsu ata kwatsǝni ata whal ǝndari.

⁵ Sakatǝ Yɛsu tara tsǝbti vui ndari, dzǝ wul alǝti dzǝ ka nkǝrɛ alari, “Zaka 'ya bǝtu ka gǝ sǝgǝl. Kǝ ndzai ntsakǝr Yi ata dzǝɓtsǝni ahar ngɛ asǝna.”

⁶ Ani dzǝ ka sǝghǝl bǝtǝbǝtu dzǝ ka dlutsi tǝni aka kutsari.

⁷ Sanga ndzi wula sǝ ǝni tǝ dar ka baditsǝni whuwhuni, “Dzǝ tǝra ka lǝka ndzai mǝthlǝɓiyir ndǝr ‘biku.’ ”

⁸ Ama Zaka ka hyati ka nkǝrɛ ala Thlaku ni, “Wulɛ, Thlaku! Kulini Yi ata ndǝghǝnta raitar gabakarna ala ngudi yarɛ, ba ma Yi kǝ dlǝrpǝtsǝni kǝlara ndɛ akwa kǝlara su, Yi ata kalaktsǝni alari apa sǝ ǝndari ka fwaɗu.”

⁹ Yɛsu ka nkǝrɛ alari, “Asǝna mbatǝdzi kǝ si akwa kǝi ǝni, kadǝbar ndǝ ǝni, yɛ, dzǝ zǝr Ibrahim.

¹⁰ Akuya Zǝr Ndɛ si ka dzǝ baraba ba mbati sǝ nam tara sa.”

Karabur Pam Kumɛ

¹¹ Sakatǝ dar ada sǝthlǝmɛ ala sǝ ǝni, dzǝ lǝkǝma aka nkǝr ala dar karabu, kadǝbar dzǝ kudzǝghɛ adzǝ Ursalima, ba ndzi aka ɗǝnga apǝri kuhyikur Hyal ata tsantǝdzi kura aka santa saka.

¹² Dzǝ ka nkǝrɛ: “Ndǝ ngga laka adai nam tara tǝra akwa mǝlmǝ laka nam pǝɗǝm akuya dzǝ dlutsi kuhyikur ala kǝrni kama dzǝ si.

¹³ Ani dzǝ ka kǝgati madar kǝiyirni yarɛ kumɛ dzǝ ka la dar minas kumɛ ba dzǝ ka nkǝrɛ ala dar, ‘Ka gǝri fǝli aka kwapa ǝni, tar ma Yi si.’

¹⁴ “Ama ndzǝrni ta yiɗǝ tǝni wɛ ani dar ka hyakur alari ndzi ka dar gha, ‘Yar adi ada bara ka ndǝ ǝni ndzai kuhyir yar wɛ.’

¹⁵ “Ndǝ mǝrti tǝni kuhyi, apanari ba dzǝ ka si. Antǝ dzǝ ka hya ala madar kǝiyirni nam tǝ dzǝ la dar kwapa ni, ka dzǝ ngaba ɗǝru nam tǝ dar ɓui akwa fǝli ni.

¹⁶ “Ndǝ nam tangkǝma si ka nkǝrɛ, ‘Thlakǝrna, minas nda ɓakta ɓui ɗǝru minas kumɛ kadamwa.’

¹⁷ “Thlakǝrni ka kalaktsǝni alari, ‘Usɛ ala gǝ, zǝr kǝi nam ɗaku! Kadǝbar gǝ aka dzǝrkur akwa sǝ nam nkyiɗu, Yi la gǝ wada ata kǝra mǝlmɛ kumɛ.’

¹⁸ “Ndǝ nǝr sǝɗǝkur ka si, ka nkǝrɛ alari, ‘Thlakǝrna, minas nda bakta ɓui ɗǝru ntǝfu kadamwa.’

¹⁹ “Thlakǝrni ka sǝnau alari, ‘Gǝ ma Yi la gǝ kuhyikur mǝlmǝ ntǝfu.’

²⁰ “Antǝ zǝr kǝi damwa kǝ si ka nkǝrɛ, ‘Thlaku, nda minas ngɛ akwani; Yi mbau akwa zǝr dina ka ɗǝwar tǝni.

²¹ Yi ada hyivǝr tǝngɛ, kadǝbar tǝ gǝ ndǝ nam dzau. Gǝ ada kǝtǝ sǝ nam kura gǝ dza vi tǝni ba dlǝi sǝ nam kura gǝ dza thlǝkati.’

²² “Thlakǝrni ka kalaktsǝni alari, ‘Yi ata hakatsǝni tǝngɛ aka labar ngɛ, gǝ nam zǝr kǝi nam kǝmangar! Gǝ zǝndi, kǝna wɛ, apǝri Yi ndǝ nam dzau, Yi ada kǝtǝ sǝ nam kura Yi dza vi tǝni ba dlǝi sǝ nam kura Yi dza thlǝkati?

²³ Kami dzá kura gǝ ta ɗǝwar kwaparna akwa bitǝmbal, ani ka sakatǝ Yi si, ka Yi dlutsi tǝni aka ɗǝru?’

²⁴ “Antǝ dzǝ ka nkǝrɛ ala ndzǝ nam ada hyahyati akwanda, ‘Dlutsamɛ minas ni akari, ka gǝri la ndǝ nam aka minas kum ni.’

²⁵ “Dar ka nkǝrɛ, ‘Thlaku, dzǝ kurtaka ɓui minas kumɛ!’

²⁶ “Dzǝ sǝnau, ‘Yi ada gha ala gǝri apǝri kǝlara ndǝ nam akǝri, ndɛ ata ɓakta lari hang, ama ala ndǝ nam kura aka su, wala sǝ nam tǝ dzǝ akǝri ma ndǝ ata dlutsi.

²⁷ Ama ndzǝ nam dǝgunmarna nam kura ada bara ka Yi ndzai kuhyi ata kǝra dar—siyamɛ aka dar akwani ka ndǝ kurnta tǝ dar akǝmawai.’ ”

Yɛsu Lǝkwa Ursalima apa Kuhyi nam Tara Sǝmkǝr

²⁸ Aghǝla tǝ Yɛsu tara nkǝrɛ sǝ ǝni, dzǝ ka mwara lǝkǝma, atǝra lǝti akwa Ursalima.

²⁹ Sakatǝ dzǝ kudzǝghɛ adzǝ Baithfadzi aka Baitanya, ata gar nam tǝ ndɛ ada kǝga tǝ Payar Zaitun, dzǝ hya ndzǝr nuwurni sǝɗɛ, tǝ dzǝ nkǝrɛ ala dar,

³⁰ “Mwaramɛ akwa mǝlmǝ nam nkyiɗu akǝma gǝri ni, ma gǝri lǝkwa, gǝri ata wula kustar kwara ada mbwai akwanda, nam kura ndǝ ta saga fǝlɛ. Mpǝliyamɛ tǝni ka gǝr si akǝr akwani.

³¹ Ma kǝlara ndǝ nam tara yu tǝ gǝri apǝri, ‘Kami tǝ gǝri ada mpǝl tǝni?’ nkǝramɛ alari, ‘Thlaku ani ada bara tǝni.’ ”

³² Ani ndzǝ nam tǝ ndǝ hya yar ndari ka tǝra, ani dar ka ɓui apa tǝ ndǝ nkǝrɛ ala dar.

³³ Dar akwa mpǝl kustar kwara ni, thlakari ka yu tǝ dar apǝri, “Kami tǝ gǝri ada mpǝl kustar kwara ni?”

³⁴ Dar ka kalaktsǝni apǝri, “Thlaku ani ada bara tǝni.”

³⁵ Dar ka si aka dza ala Yɛsu, dar sǝti lǝkutǝr dar yarɛ ata hǝiya kustar kwara ni ka vǝti Yɛsu ati.

³⁶ Dzǝ akwa mwari, ani ndzi sǝsi lǝkutǝr dar yarɛ akwa whalari.

³⁷ Sakatǝ dzǝ si kudzǝghɛ aka vui nam tǝ whal ni tara sǝgǝl ata gar nǝr Payar Zaitun, sanga hangkur ndzǝr nuwɛ ka baditsǝni kutsari ka hǝm Hyal aka kuɗahu nam aka dǝna akuya sanga sǝr ndati yarɛ nam tǝ dar wuti.

³⁸ “Barka aka kuhyi nam ada si akwa thlǝma Thlaku! “Ndzai lapiyakur atahyal ba nggakur ati!”

³⁹ Ndzǝr farisi yarɛ nam akwa ntsa hangkur ndzi ni nkǝrɛ ala Yɛsu, “Malǝm, ɗǝmnya ala ndzǝr nuwur ngɛ yarni!”

⁴⁰ Dzǝ ka kalaktsǝni ala dar, “Yi ada nkǝrɛ ala gǝri, ma ndzǝ yarni ndzai kǝɗǝk ma, paya yarni ata baditsǝni lǝlɛ.”

⁴¹ Sakatǝ dzǝ tǝrngudzi kudzǝghɛ adzǝ Ursalima, tǝ dzǝ wuti mǝlmǝ ni, dzǝ tuwa ata kǝrari

⁴² ba dzǝ ka nkǝrɛ, “Ma gǝr dza zǝndi sǝ nam ata si aka ndzai lapiya ala gǝri asǝna—ama kulini ndǝ ɗǝwar ta ntsa gǝri.

⁴³ Vǝri yarɛ ata si ata kǝra gǝri nam tǝ dǝgunmar gǝri yarɛ ata tsakǝr garu ala gǝri ka dar dlǝkǝr kǝi ala gǝri ba dar ata pukǝrdzi ala gǝr ata kǝlara bwa.

⁴⁴ Dar ata bǝghirnta tǝ gǝri ata dai, gǝri kaka madar gǝri akwa kuta garu ni. Dar adi ata ngyar paya duku ata kǝra kǝmani wɛ, kadǝbar gǝr ta zǝndǝba sakar siyir Hyal ka mbati tǝ gǝri wɛ.”

Yɛsu akwa Kuta Fǝr Hyal

⁴⁵ Antǝ dzǝ ka lǝkwa fǝr Hyal ba dzǝ ka baditsǝni kǝdlǝ ndzǝr ɗǝgǝlnta su.

⁴⁶ Dzǝ ka nkǝrɛ ala dar, “Adai rǝbwa-rǝbwa, ‘Fǝrǝrna ata ndzai fǝr 'ya aduwa’; ama gǝr mǝrti tǝni ‘dlǝmar ndzǝr fa whalɛ.’ ”

⁴⁷ Tatang vǝri dzǝ ada hyipɛ akwa fǝr Hyal. Ama nggar fǝrist yarni, kaka malǝmǝr mabari yarni, ba ndzǝ ngga-ngga yarɛ nam akwa ntsa ndzi bara whal nam tǝ dar awatsi tǝni.

⁴⁸ Ama dar ta ɓui whal nam tǝ dar awa 'ya wɛ, kadǝbar tǝ sanga ndzi ada bara ka dar ngati ndǝrǝrni.