Luka 1 - Kibaku NT

Sǝ Nam Tara 'ya tǝ Ndǝ Rǝbwa Kakadu ni

¹ Ndzǝ hang hau dǝna ka rǝbwatsǝni ndǝrɛ ata kǝra sǝ yar nam tara 'yatǝdzi akwa ntsa muri,

² dar rǝbwai sǝ nam tǝ ndzǝ gha ala yar ndzǝ nam tara wula sǝ yarni ntsɛ aka ntsɛ ata baditsǝniyari ba dar nkǝr ndǝrǝr Hyal.

³ Kadǝbar ǝni, Yi tǝ kǝrna Yi ghyǝngaba tǝ hankal sanga su ata baditsǝniyari, kǝ ndzai kal-kal alai yɛ ka Yi rǝbwai ala gǝ ata ghalarari, Ndǝ ngga ta sang Tiyafulus.

⁴ Ani ka gǝ zǝndi dzǝrkurǝr ndǝrɛ ata kǝra sǝ yarɛ ni nam tǝ ndǝ tara tsǝlɛ ala gǝ.

Ya Yawhana Ndǝr 'ya Bamtizǝma

⁵ Akwa sakatǝ Hirudus ani kuhyir Yahudiya, fǝrist laka adai tǝ thlǝmari Zakariya, nam tǝ dzǝ akwa nyavǝr fǝrist nǝr kulfǝr Abidza, mwalarni tsuwɛ sǝba akwa nyavǝr Haruna, nam tǝ thlǝmari Alisabatu.

⁶ Dar gyapu ndzaiyir dar kal-kal akǝma Hyal, dar ada kǝlǝngkǝr ala sanga tsawur Thlaku yarɛ kal-kal kura aka aibai.

⁷ Ama dar adi aka zǝr wɛ, akuya Alisabatu atsǝr, ba dar gyapu kǝ 'ya bwathlu.

⁸ Vǝr laka sakatǝ albwar Zakariya ani ata nya kǝthlǝr ba dzǝ ani aka 'ya kǝthlǝr nǝr fǝrist akǝma Hyal,

⁹ ndǝ tsarba tǝni, akwa whal nam tǝ fǝrist yarɛ ada 'ya, tǝ dzǝ ani ata lǝkwa fǝr Hyal ka dzǝ mba sǝ sǝwur.

¹⁰ Ba sakatǝ sakar mba sǝ sǝwur 'ya, sanga hangkur ndzǝ nam abǝla ata kǝra 'ya aduwa.

¹¹ Antǝ ndǝr hyantǝr Hyal Thlaku ka tsantǝdzi alari, dzǝ ada hyati tǝbwar tsisǝma muɓwɛ nǝr mba sǝ sǝwur ni.

¹² Sakatǝ Zakariya tara wula tǝni, dzǝ yakatsǝni hyivǝr ka ngǝzǝ tǝni.

¹³ Ama ndǝr hyantǝr Hyal ni nkǝrɛ alari, “Ta gǝ ta hyivǝr, Zakariya; Hyal ngati aduwar ngɛ. Mwalar ngɛ Alisabatu ata yai ala gǝ zǝr sal, ba gǝ ata vǝti thlǝmari Yawhana.

¹⁴ Dzǝ ata la gǝ kutsari ba ɗǝfu mwapu, ba ndzǝ hang ata 'ya kutsari akuya ka ya tǝni,

¹⁵ akuya dzǝ ata ndzai ndǝ nam ngga akǝma Thlaku. Dzǝ adi ata sa yimǝr inabi wala sǝr sa nam tara multidzi wɛ, ba dzǝ ata ghǝi aka Mambǝl Kartǝ tǝ dzǝ tsu akwa kuta angǝri.

¹⁶ Dzǝ ani ata ɓakta si aka ndzǝr Izǝraila hang adzǝ Thlaku Hyalǝr dar.

¹⁷ Ba dzǝ ata mwari akǝma Thlaku ni, akwa mambǝlɛ ba dǝna nǝr Iliya, Ka dzǝ si aka hankala ndzǝr ya ata kǝra madar dar, ba dzǝ nam kura ada ngandǝrɛ ka dar nu bǝrkawakur nǝr ndzai kal-kal—ka dzǝ ɓui ndzǝ hang nam tara ɗǝmhǝdzi akuya ka Thlaku ni.”

¹⁸ Zakariya ka yu ndǝr hyantǝr Hyal ni, “Mǝmi tǝ Yi awa zǝndi apǝri sǝ ǝni ata 'ya? Akuya Yi kǝ hali ba mwalarna Yi sǝm fá.”

¹⁹ Ndǝr hyantǝr Hyal ni sǝnau alari, “Yi dza Dzǝbrailu. Yi ada hyati akǝma Hyal, ba ndǝ hya tǝra ka Yi gha ala gǝ, ba ka Yi nkǝrɛ ala gǝ ndǝrǝr Hyal nam sǝɗa ni.

²⁰ Antǝ kulini gǝ adi ata mǝzi ka mburti nya ka ndǝrti ndǝr wɛ tar ma vǝr tǝ zǝrǝrni yabadzi, kadǝbar gǝ ta mbǝrsa aka ndǝrǝrna yarɛ, nam ata siya ndzai dzǝri ata sakar dar nam kal-kal wɛ.”

²¹ Antǝ ndzǝ nam abǝla nam ada sǝkǝ Zakariya ni, dar kǝ ndatǝdzi akuya tǝ dzǝ tara sǝkar akwa fǝr Hyal ni.

²² Sakatǝ dzǝ sǝba, dzǝ adi ada mǝzi ka ndǝrɛ ala dar wɛ, antǝ dar kǝtǝ apǝri dzǝ wulsu akwa fǝr Hyal ni; akuya dzǝ ada lǝkǝma aka tsan su tǝ tsai ala dar ama dzǝ adi awa mǝzi ka ghaba su wɛ.

²³ Sakatǝ sakar 'ya kǝthlǝrǝrni kuri, dzǝ hyati ka tǝra livi aharni.

²⁴ Aghǝla ǝni mwalarni Alisabatu ka kǝtǝ hur ba dzǝ ka ɗǝwar kǝrni aivi har nǝr hya ntufu.

²⁵ Dzǝ ada nkǝrɛ, “Thlaku 'yati alai sǝ ǝni. Akwa vǝr yarɛ ni, dzǝ kǝ tsanti alai ɗakurni ba dzǝ kǝlnta sǝr sǝlai nam ata kǝrawai akwa ntsa ndzi.”

Ndǝrǝr Yabadzǝr Yɛsu Kǝrsti

²⁶ Akwa hya nǝr nkwakur nǝr hurǝr Alisabatu, Hyal hyanti ndǝr hyantǝrni Dzǝbrailu alǝkwa Nazarat, mǝlmɛ akwa Galili,

²⁷ ka dzǝ mwari adzǝ nkwa dabugu laka nam tǝ zǝr dakwai laka tǝ thlǝmari Yusufu tara thlaba, nam tǝ dzǝ sǝba akwa kulfǝr Dauda. Thlǝma zǝr nkwani ani Maryamu.

²⁸ Ndǝr hyantǝr Hyal ni ka si adzǝni ka nkǝrɛ alari, “Thlawardzi, gǝ nam tara ɓui maiwakur aka Hyal, Thlaku ni dzǝ adzǝ ngɛ.”

²⁹ Ama Maryamu yakatsǝnidzi dzau ata kǝra ndǝr yarɛ ni, dzǝ ka lǝkwa ɗǝnga ata kǝr akwa ɗǝfari apǝri, thlawardzi dzǝli madi ǝni.

³⁰ Ama ndǝr hyantǝr Hyal ka nkǝrɛ alari, “Ta gǝ ta hyivǝr Maryamu, akuya gǝ ɓui maiwakur aka Hyal.

³¹ Gɛ ata kǝtǝ hur, ba gǝ ata yai zǝr sal, ba gǝ ata vǝti thlǝmari Yɛsu.

³² Dzǝ ata ndzai ndǝ nam ngga ba ndɛ ata ká tǝni Zǝr Hyal nam ati ta Sang. Thlaku Hyal ni ata lari dǝgǝl kuhyikur nǝr atǝgǝri Dauda.

³³ Ba dzǝ ata ndzai kuhyi ata kǝra kyǝiyir Yakubu har kura kurkuri; kuhyikurni dǝntari adi wɛ.”

³⁴ Maryamu ka yu ndǝr hyantǝr Hyal ni, “Mǝmi tǝ sǝ ǝni awa 'yati dzi, tǝng tǝ Yi tsu dabuga kura ta zǝndi sal?”

³⁵ Ndǝr hyantǝr Hyal ni sǝnau, “Mambǝl Kartǝ ata sǝgǝl ata kǝra gǝ, dǝnar Hyal nam Ati ta sang ata tǝrkǝr sangurai ala gǝ. Kadǝbar ǝni Zǝr nam tǝ gǝ ata ya ni dzǝ hyati adzǝ Hyal ba ndɛ ata ká tǝni Zǝr Hyal.

³⁶ Wala Alisabatu nam yarkur ngɛ ni dzǝ ata yai zǝr akwa magyakur, ba dzǝ nam tǝ ndzǝ ada gha alari apǝri dzǝ atsǝr ǝni ani hyarni nǝr nkwakur tǝ dzǝ aka hur.

³⁷ Akuya sǝ adai nam dzau kura Hyal awa mǝrti wɛ.”

³⁸ Antǝ Maryamu ka gha, “Yi nkwar kǝiyir Thlaku, ka dzǝ 'ya alai apani apa tǝ gǝ gha.” Ani ndǝr hyantǝr Hyal ni ka ngyar tǝni.

Maryamu Mwari ka Lǝka Thlawar Alisabatu

³⁹ Ata saka nda Maryamu ɗǝmhǝ kǝrni dzǝ ka mwari aka dzala akwa mǝlmɛ nam ati ata gar akwa diyir Yahuda,

⁴⁰ dzǝ ka livi ahar Zakariya dzǝ ka thlawar Alisabatu.

⁴¹ Sakatǝ Alisabatu tara ngati thlawardzǝr Maryamu, zǝr nam akwa kutari ni ka haɓǝti kǝrni, ba Alisabatu ka ghǝiyatǝdzi aka Mambǝl Kartǝ,

⁴² aka kuɗahɛ nam ngga dzǝ ka nkǝrɛ: “Gǝ ndǝr barka akwa ntsa mwahyi, zǝr nam tǝ gǝ ata ya ni dzǝ zǝr nam aka barka!

⁴³ Ama kami tǝ Yi ɓui dzǝli maiwakur ǝni, har tǝ angǝra Thlakǝrna ani ata si adzǝra?

⁴⁴ Tǝng sakatǝ Yi ngati kuɗahǝr thlawardzǝr ngɛ akwa thlǝmawai, zǝr nam akwa kutawai ni haɓǝti kǝrni akuya kutsari.

⁴⁵ Gǝ mwala nam aka barka tǝ gǝ mbǝrsa aka sǝ nam tǝ Thlaku tara gha ala gǝ ata siya ghǝiyabadzi ni.”

Har Hǝmɛ tǝ Maryamu 'Ya

⁴⁶ Ba Maryamu nkǝrɛ: “Ɗǝfawai ada la nggakur ala Thlaku

⁴⁷ ba mambǝlǝrna ada kutsari akwa Hyal Ndǝr Mbati tǝra,

⁴⁸ akuya dzǝ ɗǝngati ka wular ndǝ nam nkyiɗu apa Yi nkwar kǝiyirni. Kǝtǝ ka lǝkǝma sanga ndzi akwa zaman yarɛ ata kǝga tǝra ndǝr barka.

⁴⁹ Akuya Hyal nam Ɓwaltasang mǝrti sǝ yarɛ nam ngga-ngga akuya ka yɛ— Dzǝ duku ɗiɗi ani Hyal.

⁵⁰ Dzǝ la kǝtǝrdzi ala ndzǝ nam ada hyivǝr tǝni, zaman ka la zaman.

⁵¹ Dzǝ kǝ mǝrti kǝthlǝr yarɛ nam ngga-ngga aka tsiyari; dzǝ kikilnta dzǝ nam ada agula akwa ɗǝngar dar yarɛ

⁵² Dzǝ ka kǝlghǝl kuhyi yarɛ nam ngga-ngga ata dǝgǝl kuhyikur dar, ama dzǝ haɓǝti ndzǝ nam ada tǝrghǝl kǝra dar.

⁵³ Ndzǝ nam aka mi dzǝ ghǝiyati tǝ dar aka sǝ yarɛ nam ɗaku, ama ndzǝr gǝna tsuwɛ dzǝ ka kǝdlǝnta tǝ dar aka tsi ɓǝrtu.

⁵⁴ Dzǝ mbana zǝr kǝiyirni Izǝraila, dzǝ ada mǝzi ɗǝngati ka tsanti

⁵⁵ ala Ibrahim aka kulfǝrni yarɛ har kura kurkuri, wala apa tǝ dzǝ gha ala tada muri yarɛ.”

⁵⁶ Maryamu ndzai adzǝ Alisabatu apa nǝr hya makǝr kama dza dzǝgwa tǝra aharni.

Ya Yawhana Ndǝr 'Ya Bamtizǝma

⁵⁷ Akwa sakatǝ yar Alisabatu kǝ 'ya, antǝ dzǝ ka yai zǝr sal.

⁵⁸ Ntǝwhulǝrni kaka yarkur ni yarɛ ngati apǝri Thlaku ni tsanti kǝtǝrdzi nam ngga alari, ba dar ka 'ya kutsari kaka dza.

⁵⁹ Sakatǝ zǝr ni kǝ 'ya vǝr ntsisu dar si ka thlakatsa alari, ba dar ada bara vǝti thlǝmari Zakariya tsu apa thlǝma atǝgǝri,

⁶⁰ ama angǝri hau nya ka nkǝr apǝri, “A'á! Ndɛ ata kǝga tǝni aka Yawhana.”

⁶¹ Dar ka nkǝrɛ alari, “Ndɛ akwa ntsa ndzǝr gǝri aka thlǝm ǝni adi wɛ.”

⁶² Antǝ dar ka ɓakǝ tsai ala atǝgǝri, ka dar zǝndi thlǝm nam tǝ dzǝ ada bara ka ndǝ vǝti ala zǝrǝrni.

⁶³ Dzǝ ka yu sǝr rǝbwa, antǝ dzǝ ka rǝbwai “Thlǝmari Yawhana.” Antǝ sanga dar ka ndatǝdzi.

⁶⁴ Tǝkǝma nya Zakariya ka mburntadzi, antǝ kanyarari ka mpǝlntadzi dzǝ ka baditsǝni ndǝrɛ ka lǝkǝma aka hǝm Hyal.

⁶⁵ Antǝ sanga ntǝwhulǝrni yarɛ nam akwanda hyivǝr ngǝtǝ tǝ dar, ba ndǝrɛ ata kǝra sǝ yarni ka kikilntadzi akwa sanga kuta mǝlmɛ nam ati ata gar akwa diyir Yahudiya;

⁶⁶ kǝlara ndǝ nam tara ngati sǝ ǝni dar ndatǝdzi kari, tǝ dar ada yuwɛ apǝri, “Zǝr ni dzǝ ata siya ndzai mǝrɛ?” Akuya tǝ tsiya Thlaku ni ata kǝrari.

Ha tǝ Zakariya 'ya

⁶⁷ Zakariya, atǝgǝra Yawhana ghǝi aka Mambǝl Kartǝ, ba dzǝ ka 'ya nabikur:

⁶⁸ “Hǝmɛ kǝ ndzai ala Thlaku, Hyalǝr Izǝraila, kadǝbar tǝ dzǝ tara si ka pǝli ndzǝrni.

⁶⁹ Dzǝ kǝ la muri Ndǝr Mbati nam ngga, akwa dǝrǝr zǝr kǝiyirni Dauda

⁷⁰ (apa tǝ dzǝ tara 'ya alkawal atar nabiyirni yarɛ akwa zaman watsi),

⁷¹ mbatǝdzi akwa tsiya dawar muri yarɛ ba akwa tsiya sanga ndzǝ nam tara ngǝla tǝ muri—

⁷² ka dzǝ tsanti kǝtǝrdzi ala tada muri yarɛ ba ka dzǝ ɗǝngati sǝrni nam mbwa-mbwa,

⁷³ mbǝr ni tǝ dzǝ tara 'ya ala Ibrahim nam tada muri:

⁷⁴ ka mbuli tǝ muri akwa tsiya dawar muri yarɛ, ba ka dzǝ mǝrti tǝ muri ka 'ya kǝthlǝr alari kura aka hyivǝr,

⁷⁵ akwa kartǝkur ba kalkalkur akǝmari akwa sanga vǝr yarɛ nam tǝ muri akǝr.

⁷⁶ “Ba gǝ, zǝrna, ndɛ ata kǝga tǝngɛ nabiyir Hyal nam Ati ta Sang; akuya gǝ ata mwari kǝma ta Thlaku ni akuya dzǝguti whalɛ alari,

⁷⁷ ka nkǝrnta ala ndzǝrni whalǝr zǝndi ɓui mbatǝdzi atar kyifǝnta bikǝr dar yarɛ,

⁷⁸ kadǝbar hangkur kǝtǝrdzǝr Hyalǝr muri, nam atarni tǝ sǝtǝr tsǝtsǝr mbatǝdzi ata si atahyal ka ɓui tǝ muri

⁷⁹ ka mbǝli ata kǝra ndzǝ nam ada ndzai akwa kuthlɛ ba akwi sanguraiyir nti, ka dzǝ ɓǝla thlǝla muri akwa whalǝr ndzaiyir lapiyakur.”

⁸⁰ Yawhana kǝlí ka ndzai aka dǝna akwa mambǝlɛ; ba dzǝ ka ndzai akwa ntaku, har vǝr nam tǝ dzǝ tsantǝdzi ata babal ala ndzǝr Izǝraila.