Filimaun 1 - Kibaku NT

¹ Kakadu ǝni hyati aka Bulusu, ndǝr fǝrsǝna akuya ka Kǝrsti Yɛsu, ba zǝr mama muri Timathlawus. Yi ada rǝbwa ala Filimwaun pazǝr yar nam tǝ yar yiɗɛ ba ndǝr kǝthlǝr kǝma yar,

² ala Afiya nkwar mama muri, ala Akibus saudza kǝma muri ba ala ikǝlizǝya nam ada tsaɓtsǝnidzi ahar ngɛ.

³ Ka Hyal Tada muri ba Thlaku Yɛsu Kǝrsti la gǝri ɗakur Hyal ba ndzai lapiyakur.

Gwaditsǝni ba Aduwa

⁴ Yi ada gwaditsǝni kǝlara saka ala Hyalǝrna apa tǝ Yi ada ɗǝngati tǝ gǝri akwa aduwarna yarɛ,

⁵ kadǝbar Yi ngati ata kǝra hamnta dzǝrǝr gǝri akwa Thlaku Yɛsu ba yiɗǝdzǝr gǝri ala sanga ndzǝr Hyal.

⁶ Yi ada 'ya aduwa apǝri ka gǝr ndzai aka ufti akwa mwardzǝr hamnta dzǝri, ani ka gǝr ɓui ka ngaba sanga sǝ nam ɗaku tǝ muri akǝr akwa Kǝrsti.

⁷ Yiɗǝdzǝr gǝri lai kutsari nam ngga ba dǝnautsǝnidzi, kadǝbar gǝ, zǝr mana, gǝ panyi ɗǝfa ndzǝr Hyal.

Kǝgyir Bulusu akuya ka Aunisimus

⁸ Akuya ka ǝni, wala tǝ akwa Kǝrsti Yi ata mǝzi ka hau tǝngɛ ka gǝ 'ya sǝ nam kal-kal ka gǝ 'ya.

⁹ Ama Yi ada kǝgyǝ tǝngɛ akuya ka yiɗǝdzi. Antǝ Yi Bulusu, nam bwathlu ba kulini ndǝr fǝrsǝnar Kǝrsti Yɛsu,

¹⁰ Yi ada kǝgyǝ tǝngɛ akuya ka zǝrna Aunisimus, nam tara ndzai zǝrna sakatǝ Yi akwa tsalala yarɛ.

¹¹ Akwa saka nam tara kwatsǝni dzǝ adi aka paida ala gǝ wɛ, ama kulini dzǝ ndɛ nam aka paida ala mwa gyapu.

¹² Yi ada hyanti tǝni, dzǝ nam ata ɗǝfawai, ala gɛ kadamwa.

¹³ Yi bara ka Yi ngǝzi tǝni adzǝra ka dzǝ kǝtǝ vuiyir ngɛ akwa mbana tǝra tǝ Yi akwa tsalala akuya ka ndǝrǝr Hyal nam sǝɗa ni.

¹⁴ Ama Yi adi ada bara ka Yi 'ya kǝlara su kura aka yiɗǝr ngɛ wɛ, ani ka kǝlara maiwakur nam tǝ gǝ 'ya ka dzǝ ndzai aka yiɗǝr ngɛ ama adi ntsakǝr mai.

¹⁵ Bisu sǝ nam tara 'ya tǝ gǝri tara ndǝghǝbadzi aka dza akwa saka nkyiɗu laka ani apǝri ka gǝ ɓakta dlutsi tǝni kura gǝri tsu awa ndǝghǝi,

¹⁶ dzǝ tsu adi apa fali wɛ ama ɓwalta fali, apa zǝr mama nam tǝ ndǝ yiɗɛ. Yi yiɗɛ tǝni ama gǝ yiɗǝ tǝni ɓwalta Yɛ, apa ndɛ ba apa zǝr mama akwa Thlaku ni.

¹⁷ Ani ma apǝri gǝ kǝtǝ tǝra mwa sǝ duku, ka gǝ dlutsi tǝni tsu apa tǝ gǝ ata dlu tǝra.

¹⁸ Ma dzǝ sǝwati su ala gɛ, wala gǝ ada nu tǝni kimbǝlǝr sǝ laka, Yi kǝtǝ ata ngum.

¹⁹ Yɛ, Bulusu, ani tara rǝbwa sǝ ǝni aka tsiyawai. Yi ata nkyinta ala gɛ, adi si ma Yi gha wɛ, gǝ aka kimbǝlǝr kǝrngɛ alai.

²⁰ Ani apani, zǝr mama, usɛ 'ya alai ɗakur ǝni akwa thlǝma Thlaku; ka ɗǝfawai pi akwa Kǝrsti.

²¹ Yi mbǝrsa apǝri gǝ ndǝr kǝlǝngkǝr. Yi rǝbwa ala gɛ, kadǝbar Yi zǝndi apǝri gǝ ata mǝrti wala ɓwalta sǝ tǝ Yi kǝgyɛ.

²² Ba sǝ pathlu tsu adai: Ka gǝ ɗǝmhǝi alai fǝrǝr mǝthlǝɓi, kadǝbar Yi aka tǝmatsǝni apǝri ndǝ ata sǝntá tǝra ala gǝri atar aduwar gǝri yarɛ.

²³ Abafarasu, nam tǝ yar akwa fǝrsǝna vwam akuya ka Kǝrsti Yɛsu, dzǝ ada thlawar tǝ gǝri.

²⁴ Ba tsu ahani tǝ Markusu, Aristakus, Dimas, ba Luka, ndǝr kǝthlǝr kǝmana yarɛ ada thlawar tǝ gǝri.

²⁵ Ka ɗakur Thlaku Yɛsu Kǝrsti ndzai adzǝ mambǝlǝr gǝri.