3 Yawhana 1 - Kibaku NT

¹ Kakadu ǝni hyati aka ndǝ nam ngga ni. Yi ada rǝbwa ala pazǝrna Gayus, ndǝ nam tǝ Yi yiɗǝ tǝni aka dzǝrkur.

² Pazǝrna nam tǝ Yi yiɗɛ, Yi ada 'ya aduwa apǝri ka gǝ ɓui ndzai aka kalangkur ba ka sanga su ndzai ɗaku ala gɛ, tsu apa tǝ sangura gɛ ada ɓui ndzai lapiya.

³ Ɗǝfawai 'ya sǝɗa aka dǝna sakatǝ madar mama yarɛ laka si ka nkǝrɛ alai ata kǝra hamnta dzǝri ngɛ ala ndzi antǝ ka gǝ lǝkǝma aka kǝthlǝr akwa dzǝrkur.

⁴ Sǝ adai nam tara mǝrti tǝra kutsari ɓwalta tǝ Yi ngati apǝri madarna ada kǝthlǝr akwa dzǝrkur.

⁵ Pazǝrna nam tǝ Yi yiɗɛ, gǝ aka dzǝrkur akwa whal nam tǝ gǝ ada mbana madar mama, wala gǝ ta zǝndi tǝ dar wɛ.

⁶ Dar nkǝrɛ yiɗǝdzǝr ngɛ akǝma ikǝlizǝya akwani. Gɛ ata 'ya ɗakur ma apǝri gǝ hyanti tǝ dar ata buraburar dar akwa whal nam tara 'ya sǝɗa ala Hyal.

⁷ Akuya dar sǝba ka nkǝr labar akwa thlǝma Yɛsu, ama dar adi ada ɓui mbana aka ndzǝ nam kura ta zǝndi Hyal wɛ.

⁸ Kadǝbar ǝni, kǝ ndzai ntsakǝr ka muri dlutsi dzǝli ndzǝ yarni ani muri kǝthlǝr atakǝmaduku akuya dzǝrkur.

⁹ Yi rǝbwai kakadu damwa ala ikǝlizǝya; ama Diyautripas ta dlutsi dǝnar yar wɛ (dzǝ yiɗɛ ka dzǝ ndzai ngga.)

¹⁰ Ani ma apǝri Yi si Yi ata tsanti ala gǝri sǝ nam tǝ dzǝ ada 'ya dzǝ ada nkǝr sǝ kulɗa ata kǝra yar, tsuwɛ apǝri ǝni ta mǝzi tǝni wɛ, dzǝ ngǝla dlutsi madar mama, ba ka kanti ala ndzǝ nam ada bara ka kǝdlǝba tǝ dar abǝla akwa ikǝlizǝya.

¹¹ Pazǝrna nam tǝ Yi yiɗɛ, ta gǝ ta tsǝl sǝ nam kulɗa, ama ka gǝ tsǝl sǝ nam ɗaku, kǝlara ndǝ nam ada 'ya ɗaku dzǝ nǝr Hyal; ama kǝlara ndǝ nam ada 'ya sǝ nam kulɗa dar ta zǝndi Hyal wɛ.

¹² Dimitriyus kam, kǝlara ndɛ madi ma ada nkǝrɛ su ɗa ata kǝrari, antǝ dzǝrkur aka kǝrari kǝ nkǝrɛ su ɗaku ata kǝrari, yar ma yar kǝ nkǝrɛ sǝ nam ɗaku ata kǝrari, antǝ gǝri kǝ zǝndi sǝ nam tǝ yar nkǝrɛ ani dzǝri.

¹³ Yi aka sǝ hang nam tǝ Yi ada bara ka Yi gha ala gǝri, ama Yi adi ada bara ka Yi rǝbwa ata kakadu wɛ.

¹⁴ Yi aka mbǝrsa kǝi wula tǝ gǝri kulini-kulini, ka muri ndǝr ntsɛ aka ntsɛ.

¹⁵ Ka pipikur ɗǝfu ndzai adzǝ ngɛ. Pazǝr ngɛ yarni nam akwani ada thlawar tǝngɛ. Thlawar pazǝ yarɛ nam akwanda thlǝmɛ ata thlǝmɛ.