2 Yawhana 1 - Kibaku NT

¹ Kakadu ǝni hyati aka Yawhana ndǝ nam ngga ni. Yi ada rǝbwa ala mwala nam tsartsari ni ba madarni, nam tǝ Yi yiɗɛ akwa dzǝrkur ni—ba adi Yi ɗiɗi wɛ, ama sanga ndzǝ nam ada zǝndi dzǝrkur—

² kadǝbar dzǝri ni, ada ndzai akwa muri ba ata ndzai aka muri kura kurkuri.

³ Ka Hyal Tada ni ba Yɛsu Kǝrsti, Zǝrǝrni, la muri ɗakur Hyal, kǝtǝrdzi, ba ndzai lapiyakur; ka dar ndzai nǝmuri akwa dzǝrkur ba yiɗǝdzi.

⁴ Yi aka kutsari hang tǝ Yi ɓui laka madar ngɛ ada ndzai akwa dzǝrkur, tsu apa tǝ Tada ni tara tsau ala muri.

⁵ Ba kulini, mwalara ɗa Yi adi ada rǝbwa ala gǝ tsau nam bǝlin wɛ ama nam tǝ muri akǝri tǝng akwa baditsǝni ni. Yi ada kǝgyɛ apǝri ka muri yiɗǝ kǝma muri.

⁶ Ba ǝni ani yiɗǝdzi: apǝri ka muri mwari akwa ngandǝrɛ ala tsawurni yarɛ. Apa tǝ gǝri ngati akwa baditsǝni, tsawurni ani apǝri ka muri mwari akwa yiɗǝdzi.

⁷ Ndzǝr zǝla yarɛ hang, ndzǝ nam kura ta yiɗɛ apǝri Yɛsu Kǝrsti kǝ si akwa kumǝr dzɛ, kǝ lǝba akwa dunya ni. Kǝlara ndzǝli ndzǝ yarni dar ndzǝr zǝla ba dǝgunmar Kǝrsti.

⁸ Ka gǝri ɓǝla kǝr gǝri ta gǝri ta nai ta sǝ nam tǝ muri kǝthlǝr kari, ama ka gǝri siya dlutsi wadzǝɓa ghǝi-ghǝi.

⁹ Kǝlara ndǝ nam tara whui alǝkǝma ba kura ta lǝkǝma akwa hyipǝr Kǝrsti ni dzǝ adi aka Hyal wɛ; ama kǝlara ndǝ nam tara lǝkǝma akwa hyipǝ ni dzǝ aka Tada ba Zǝr ni gyapu.

¹⁰ Ma kǝlara ndǝ nam ada si adzǝ gǝri ba dzǝ ta si aka hyipǝ ǝni wɛ, ta gǝri ta mwari aka dza ahar gǝri wala dlutsi tǝni.

¹¹ Kǝlara ndǝ nam ada dlu tǝni dzǝ ada ndǝghǝi kǝthlǝrǝr kǝmangarkurni.

¹² Yi aka sǝ hang nam tǝ Yi ada bara ka Yi gha ala gǝri, ama Yi adi ada bara ka Yi rǝbwa ata kakadu wɛ. Ata vuiya ǝni, Yi aka tǝmatsǝni ka Yi mwari adzǝ gǝri ka Yi ndǝrɛ kaka gǝri ntsɛ ka ntsɛ, ani ka kutsariyir yar ka dzǝ ndzai ghǝi-ghǝi.

¹³ Madar nkwar mama gǝri nam tsartsari ada hyanti thlawardzǝr dar ala gǝri.