2 Timathlawus 4 - Kibaku NT

¹ Akǝma Hyal ba Kǝrsti Yɛsu, dzǝ nam ata 'ya haka ala ndzǝ nam ata mulɛ ba ndzǝ nam ntǝnti, ba siyirni aka kuhyikur ni, Yi la gǝ tsau ǝni:

² Ka gǝ nkǝr labar Hyal ni, ka gǝ ɗǝmhǝi kǝrngɛ akwa sakari ba wala kura akwa sakari; ka gǝ dzǝgwɛ, ɗǝmnya ba dǝnautsǝni—aka kǝl kǝmar ba gala aka hankal.

³ Akuya saka ata si nam kura ndzi tsu awa ɓati ka dlu sǝr hyipǝ nam dzǝri. Ata vuiya ǝni, akuya ka sǝ nam tǝ dar ada mauwɛ, dar ata tsaɓtsǝni ndzǝr hyipǝ yarɛ ala kǝr dar ka nkǝr sǝ nam tǝ thlǝma dar ada ɓǝɓa ka ngati.

⁴ Dar ata mbalnta thlǝma dar ta dzǝrkur ba dar ata mbalti ka tsǝdzǝ sǝr watsi kura dzǝri.

⁵ Ama gɛ, ka gǝ ɓǝlati kǝrngɛ akwa sanga su, ɓati bwanai, 'ya kǝthlǝrǝr ndǝr nkǝr ndǝrǝr Hyal, ka gǝ 'ya sanga sǝ yarɛ nam akwa kǝthlǝr ngɛ ni.

⁶ Akuya saka nam tǝ masǝrna ata puntadzi apa sǝr hamnta nǝr sǝr sa, ba saka kǝ 'ya nam tǝ Yi ata ngyar tǝ gǝri.

⁷ Yi mpai mpa nam ɗaku, Yi kurai pǝpǝlar whuiyirna, Yi ngǝzi hamnta dzǝri ni.

⁸ Kulini ada vi alai akwa vui ɗǝwa aliyapǝr ndzai kalkalkur, nam tǝ Thlaku, ndǝr 'ya haka nam kal-kal, tǝ dzǝ ata lai vǝr ǝnda—ba adi alai Yi duku wɛ, ama sanga ndzǝ nam ada sǝkǝ siyirni aka dzala.

Ndǝrǝr Bulusu nǝr Kǝrni

⁹ 'Ya kwakwaliyir ngɛ nam ɓwaltasang ka gǝ siya ɓui tǝra bǝtu,

¹⁰ akuya Dimas, kadǝbar dzǝ yiɗǝ dunya ǝni, dzǝ ngyar tǝrá dzǝ ka tǝra akwa Tasalaunika. Kǝrasǝns tǝra akwa diyir Galatiya, ba Taitus tǝra akwa diyir Dalmatiya.

¹¹ Luka ɗiɗi ani adzǝra. Ɓui Markusu ka gǝri si aka dza, kadǝbar dzǝ aka paida alai akwa kǝthlǝrǝrna.

¹² Yi hya Takikus atǝra akwa Afisa.

¹³ Sakatǝ gǝ ata si, ka gǝ si akǝr alai lǝkutǝrna nam tǝ ngyar aka Kapusu akwa Taruwasu ni, ba kakadu pǝrpǝrǝrna, apamá nǝr nam ata kutsi yarɛ nda.

¹⁴ Alizanda Ighar dlǝ yang ni dzǝ 'ya alai kulɗakur nam dzau. Ama Hyal ata nkyinta sǝkurǝr sǝ nam tǝ dzǝ 'ya ni.

¹⁵ Gǝ yɛ ka gǝ ɓǝla kǝrngɛ ta dza, kadǝbar dzǝ ada dǝl thlǝla ndǝrǝr muri aka dǝna.

¹⁶ Sakatǝ ndǝ si aka yɛ akǝma haka nǝr tangkǝma, ndɛ adi nam tara mbwa kugivi alai wɛ, ama sanga ndzi tǝra ka ngyar tǝrá. Ta ndǝ ta vǝkǝr biku ala dar kari.

¹⁷ Ama Thlaku ni dzǝ ta tǝra ka ngyar tǝrá wɛ ba dzǝ ka lai dǝna, ani ka atarna ndǝrǝr Hyal ni ata nkǝrbadzi sang-sang ba sanga ndzǝ kura Yahudi ka dar ngati. Ba Yi mbulbadzi akwa nyá dzǝngai.

¹⁸ Thlaku ni ata mbuli tǝra akwa sanga su kulɗa nam ata si ka ɓui tǝra, ba Hyal ata mwari akai lapiya akwa kuhyikur ni nam ati. Nggakur kǝ ndzai alari har kura kurkuri. Apani.

Thlawardzi nǝr Dǝnta

¹⁹ Ka gǝ thlawar Pǝrsila aka Akila ba ndzǝr kǝiyir Aunisifaurus.

²⁰ Arastus dzǝ tsu akwa Kwaranti, ba Yi ngyar Traufimus kura kalang akwa Milatus.

²¹ 'Ya kwakwaliyir ngɛ nam ɓwaltasang ka gɛ si akwani kǝmata sakar lang-lang. Yubulus ada thlawar tǝngɛ, ba tsu apani Pǝdus, Lainus, Kǝlaudiya ba sanga madar mama yarɛ.

²² Ka Thlaku ni ndzai aka mambǝlǝr ngɛ. Ka ɗakur Hyal ndzai adzǝ ngɛ.