2 Ndzǝr Tasalaunika 3 - Kibaku NT

Kǝgyɛ akuya ka 'Ya Aduwa

¹ Ata dǝnta, madar mama kaka nkwaiyir mama yarɛ ka gǝri 'ya ala yar aduwa ka labar Thlaku ɓui kikilntadzi bǝtǝbǝtu ba ka dzǝ ɓui nggakur, apa tara ɓuidzi akwa gǝri.

² Ba ka gǝri 'ya aduwa apǝri ka yar ɓui mbulbadzi akwa tsiya ndzǝ kǝmangar ba ndzǝ nam kulɗa, akuya adi kǝlara ndɛ aka hamnta dzǝri wɛ.

³ Ama Thlaku ni dzǝ ndǝ aka dzǝrkur, ba dzǝ ata la gǝr dǝna ba ɓǝlati tǝ gǝri ta ndǝ kulɗa ni.

⁴ Yar aka mbǝrsa akwa Thlaku apǝri gǝri ada 'ya ba gǝri ata lǝkǝma aka 'ya sǝ yarɛ nam tǝ yar tsau ala gǝri.

⁵ Ka Thlaku ni pwar ɗǝfa gǝri alǝkwa yiɗǝdzǝr Hyal ba ɓatǝ sǝr Kǝrsti.

Gala ata Kǝra Sǝrwaikur

⁶ Akwa thlǝma Thlaku Yɛsu Kǝrsti ni yar tsau ala gǝri, madar mama kaka nkwaiyir yarɛ, ka gǝri ndzai pǝɗǝm ta kǝlara zǝr mama nam sǝrwai ba nam kura ada ndzai akwa whalǝr sǝr hyipɛ nam tǝ gǝri dlutsi aka yar.

⁷ Akuya gǝri aka kǝr gǝri gǝr zǝndi dzǝli whal nam tǝ gǝri ata nuwɛ sǝr tsǝlǝr yar. Yar ta ndzai sǝrwai wɛ sakatǝ yar vwam kaka gǝri,

⁸ wala yar ta sǝm ɗǝvǝr kǝlara ndɛ kura yar ta kinta wɛ. Pam ta ǝni, yar 'ya kǝthlǝr vǝri aka tsǝtsi, kǝthlǝr aka tsǝfɛ ani ka ta yar ta ndzai kǝlɛ ala kǝlara ndǝ akwa ntsa gǝri.

⁹ Yar 'yati ǝni, adi kadǝbar apǝri kura yar aka whal dlu dzǝli mbana ni wɛ, ama yar ada bara ka yar mǝrti kǝr yar sǝr tsǝlɛ ala gǝri akuya ka gǝr nuwɛ.

¹⁰ Akuya wala saka nam tǝ yar vwam kaka gǝri, yar ada nkǝrɛ ala gǝri, “Ma ndɛ nam kura ata 'ya kǝthlǝr, ta dzǝ ta sǝm su.”

¹¹ Yar ngati apǝri ndzǝ laka akwa ntsa gǝri ada ndzai sǝrwai. Dar adi ada kǝthlǝr wɛ; dar ada 'ya mandanakur.

¹² Dzǝli ndzǝ yarni yar ada tsau ba kǝgyɛ akwa Thlaku Yɛsu Kǝrsti ka dar ɗǝmhǝ hankala dar ba ka dar 'ya kǝthlǝr ka dar ɓui sǝr sǝmɛ ala kǝr dar.

¹³ Ama ala gǝri, madar mama kaka nkwaiyir mama yarɛ, ta gǝri ta ghǝri aka 'ya sǝ nam kal-kal.

¹⁴ Ma apǝri kǝlara ndzǝ nam kura ta kǝlǝngkǝr aka sǝr tsǝlǝr yar akwa kakadu ǝni, ka gǝri vǝdzǝ hankal ala dar. Ta gǝri ta kǝltsǝni vui ndzai kaka dar, ani ka apǝri ka dar lǝkwa sǝlai.

¹⁵ Ama ta gǝr ta kǝtǝ tǝ dar apǝri dar dǝgunmar gǝri, ama ka gǝri gala tǝ dar apa madar mama wala nkwaiyir mama.

Ndǝrǝr Salamtsǝnidzi

¹⁶ Kulini ka Thlaku tǝ kǝrni nǝr ndzai lapiyakur ka dzǝ la gǝri ndzai lapiya ata sanga saka ba akwa kǝlara whalɛ. Thlaku ni ka dzǝ ndzai adzǝ sanga gǝri.

¹⁷ Yɛ, Bulusu, ani rǝbwai thlawardzi ǝni aka tsiyawai, nam ani sakǝidar kǝlara kakadǝrna yarɛ. Əni ani whal nam tǝ Yi ada rǝbwa akwa.

¹⁸ Ɗakur Thlakǝr muri Yɛsu Kǝrsti, ka dzǝ ndzai adzǝ gǝri sang.