2 Ndzǝr Tasalaunika 2 - Kibaku NT

Ndǝr Ndzai Kura Nu Mabari

¹ Ata kǝra siyir Thlakǝr muri Yɛsu Kǝrsti ba tsaɓtsǝnidzǝr muri adzǝni, yar kǝgyǝ tǝ gǝri madar mama kaka nkwaiyir mama yarɛ,

² ta gǝr ta kǝngǝrtǝdzi bǝtǝbǝtu wala hyivǝr atar mambǝlɛ wala 'ya nabikur wala kakadu nam apǝri hyati adzǝ yar, nam ada nkǝrɛ apǝri vǝrǝr Thlaku ni kurtaka si.

³ Ta gǝri ta ngyar ka kǝlara ndɛ zǝlanta tǝ gǝri akwa kǝlara whalɛ, akuya vǝr ǝnda adi ata si wɛ, tar ma ndǝ 'ya lǝkǝdzǝkur ni ba ndǝ kura nu mabari ni tsantǝdzi, ndǝ nam tǝ ndǝ ɗǝmhǝi alari santadzi.

⁴ Dzǝ ata 'ya dawakur, ba dzǝ ata haɓǝti kǝrni ɓwalta kǝlara sǝ nam tǝ ndǝ ada kǝga Hyal wala tǝ ndǝ ada vǝkǝr sǝlai, ani dzǝ ada mǝrti kǝrni ati akwa fǝr Hyal, dzǝ ada nkǝrɛ ala kǝrni apǝri dzǝ dzahyal.

⁵ Gǝr ta ɗǝngati wɛ apǝri sakatǝ Yi kaka gǝri Yi ada nkǝrɛ ala gǝri sǝ ǝni yarni?

⁶ Ba kulini gǝr zǝndi sǝ nam tara kanti alari si, ani ka dzǝ siya tsantǝdzi ata saka nam kal-kal.

⁷ Akuya dǝna ɗǝwa-ɗǝwa nǝr kura nu mabari kurtaka 'ya ata kǝra kǝthlǝr; ama ndǝ nam tara kanti alari kulini ni dzǝ ata lǝkǝma aka 'ya ahani tar ma ndǝ kǝlnta tǝni abǝla ta whalɛ.

⁸ Antǝ dzá ndǝ kura nu mabari ni ata tsantǝdzi, ndǝ nam tǝ Thlaku Yɛsu ata siya tsi tǝni aka mpihǝr nyari ba santa tǝni aka mbǝlǝr tsantǝdzǝrni ata vǝr siyirni.

⁹ Siyir ndǝ kura nu mabari ni ata 'ya akwa whal kǝthlǝr Satan nam ata tsantǝdzi akwa sanga dzǝli sǝr ndati, parsu ba sǝr kudǝra yarɛ nǝr hawi,

¹⁰ ba akwa kǝlara sǝ nam kulɗa nam ada zǝlanta ndzǝ nam ada santadzi. Santadzǝr dar kadǝbar dar ngǝla yiɗǝ dzǝri ba ka dar ɓui mbatǝdzi.

¹¹ Akuya ka ǝni, Hyal hyanti ala dar whalǝr zǝla nam ngga ani ka dar mbǝrsa aka hawi ni,

¹² ba ani ka sanga dar ata santa ndzǝ nam kura ta mbǝrsa aka dzǝri ama dar ada nga sǝɗar kǝmangarkur.

Hyati Ɓaɓal

¹³ Ama kǝ ndzai ntsakǝr tatang ka yar gwaditsǝni ala Hyal akuya ka gǝri, madar mama kaka nkwaiyir mama yarɛ nam tǝ Thlaku yiɗɛ, kadǝbar akwa baditsǝni Hyal tsarba tǝ gǝri ka ɓui mbatǝdzi atar dǝnar Mambǝl ni ka mǝrti tǝ gǝri ndzǝrni atar mbǝrsar gǝri akwa dzǝrkur.

¹⁴ Dzǝ kǝga tǝ gǝri ka ǝni atar nkǝr ndǝr Hyal nam sǝɗa tǝ yar 'ya ala gǝri, ani ka gǝri ɓui nggakur nǝr Thlakǝr muri Yɛsu Kǝrsti.

¹⁵ Ani dzá, madar mama kaka nkwaiyir mama yarɛ, ka gǝri hyati ɓaɓal ba ka gǝri ngǝzi sǝr hyipɛ nam tǝ yar la gǝri, wala tǝ labarǝr nya wala tǝ kakadu.

¹⁶ Ka Thlakǝr muri Yɛsu Kǝrsti tǝ kǝrni ba Hyal Tada muri, dzǝ nam tara yiɗɛ tǝ muri ba atar ɗakurni dzǝ la muri dǝnautsǝnidzi nam kura kurkuri ba tǝmatsǝni nam ɗaku,

¹⁷ dzǝ dǝnautsǝni ɗǝfa gǝri yarɛ ba la gǝri dǝna akwa kǝlara 'ya sǝ nam ɗaku ba labar.