2 Ndzǝr Kwaranti 7 - Kibaku NT

¹ Tǝng tǝ muri aka alkawal yarɛ ni, pazǝrna yarɛ nam tǝ Yi yiɗɛ, ngyar ka mur kǝtsǝnta kǝr muri ta sanga sǝ yarɛ nam ada ghyigǝrti dzɛ ba mambǝlɛ, ka muri hamnta kǝr muri sang-sang ala ndzaiyir whalǝr Hyal akwa hyivǝr Hyal.

Kutsariyir Bulusu

² Mburntamɛ ala yar ɗǝfa gǝri. Yar ta sǝwa tǝ su ala waima wɛ, yar ta sǝwati waima wɛ, yar ta sǝnya waima wɛ.

³ Yi ta gha ǝni ka Yi nkǝrɛ apǝri gǝr kulɗa wɛ; Yi gha kǝma-kǝma apǝri gǝr aka dzǝli vui ǝni akwa ɗǝfa yar apǝri yar ata ndzai wala nti kaka gǝri.

⁴ Yi ada ndǝrɛ ala gǝri ata babal; Yi ada 'ya agula aka gǝri. Yi ɓui dǝnautsǝnidzi aka gǝri; akwa sanga bwaniyir yar kutsariyirna adi aka dǝnta wɛ.

⁵ Sakatǝ yar si akwa Makidauniya, dzá yar ǝni ta ɓui ghǝrbadzi wɛ, ama ndɛ ada la yar bwanai akwa kǝlara bwa tǝ yar kǝlɛ—abǝla yar kaka ndzi ada mpa, akwa ɗǝfu yar ada hyivǝr.

⁶ Ama Hyal, nam ada sǝkǝtǝ ɗǝfa ndzǝ nam aka ɗǝfu sǝwa-sǝwa, sǝkǝtǝ ɗǝfa yar atar siyir Taitus,

⁷ ba adi ɗiɗi atar siyirni wɛ ama atar sǝkǝtǝ ɗǝfu nam tǝ gǝri tara lari yɛ. Dzǝ gha ala yar ata kǝra tǝ gǝri ada bara ka gǝri wula tǝ yar, sǝwa ɗǝfǝr gǝri nam dzau, uftiyir gǝri ka Yɛ, ani kutsariyirna ka 'ya hang ta watsi.

⁸ Kwa ma Yi hau tǝ gǝr akwa sǝwa ɗǝfu atar kakadu tǝ Yi rǝbwa ala gǝri, Yi ta nkǝr azǝndiya wɛ. Wala ahani Yi 'yati sǝr azǝndiya—Yi wula apǝri kakadǝrna ni sǝwati ɗǝfa gǝri, ama nǝr saka nkyiɗu laka—

⁹ ama kulini Yi ada kutsari, adi kadǝbar tǝ ɗǝfa gǝri sǝwa wɛ, ama kadǝbar sǝwa ɗǝfǝr gǝri hau tǝ gǝr akwa tubi. Akuya ɗǝfa gǝri sǝwa apa tǝ Hyal ada bara ba ani yar ta 'yanta tǝ gǝri akwa kǝlara whal wɛ.

¹⁰ Sǝwa ɗǝfu nam akwa whalǝr Hyal ada si aka tubi nam ada mwari aka ndɛ akwa ɓui mbatǝdzi kura aka ma Yi kara zǝndi, ama sǝwa ɗǝfu nǝr dunya ada si aka nti.

¹¹ Wulamɛ sǝ nam tǝ sǝwa ɗǝfu nǝr Hyal tara si akǝri ala gǝri: dzǝli ufti ni, dzǝli dzala ka kǝlba kǝr gǝri akwa su, dzǝli tǝ ɗǝfa gǝri ada sǝwa ma ndǝ gha su kura kal-kal ata kǝra gǝri, dzǝli ɗǝghǝr gǝri ka kǝlba kǝr gǝri akwa su ni, dzǝli bara, dzǝli ndǝkur, dzǝli ɗǝmhǝdzi ka wuti apǝri ndɛ ada 'ya su kal-kal. Ata kǝlara saka gǝr tsanti kǝr gǝri apǝri gǝri ta sǝwati su akwa sǝ ǝni wɛ.

¹² Wala ahani tǝ Yi rǝbwai ala gǝri, adi ata nyar ndǝ nam tara 'ya su kulɗa wɛ wala ndǝ nam tǝ ndǝ 'yanta su alari wɛ, ama apǝri akǝma Hyal ka gǝr wula ala kǝr gǝri mǝmi tǝ gǝri hamnta kǝr gǝri ala yar.

¹³ Atar sanga sǝ yarni yar dǝnautsǝnidzi. Ata nyar dǝnautsǝnidzǝr yar, yar ada nga sǝɗa tǝ yar wula tǝ Taitus ada kutsari, kadǝbar mambǝlǝrni 'ya bǝlin atar gǝr sang.

¹⁴ Yi 'ya agula alari ata kǝra gǝri, ba gǝr ta hau tǝra akwa sǝlai wɛ. Ama tsu apa tǝ sanga sǝ nam tǝ yar gha ala gǝri dzǝri, ani agular yar ata kǝra gǝri ala Taitus tsantǝdzi apǝri dzǝri tsu ahani.

¹⁵ Ba yiɗǝdzǝrni ala gǝri ma 'ya hang sakatǝ dzǝ ɗǝngati apǝri gǝr sang ada ngandǝrɛ tǝ gǝri dlu tǝni aka hyivǝr ba kǝgǝdzi.

¹⁶ Yi ada kutsari Yi ata mǝzi ka 'ya aka mbǝrsa sang akwa gǝri.