2 Ndzǝr Kwaranti 3 - Kibaku NT

¹ Yar ada baditsǝni bara hǝm kǝr yar kadamwa ya? Kǝna yar ada bara, apa ndzǝ yar laka, kakadu yarɛ nǝr hǝmnti ndɛ ala gǝri wala aka gǝri?

² Gǝr tǝ kǝr gǝri gǝr dza kakadǝr yar, nam tǝ ndǝ rǝbwai akwa ɗǝfa yar, waima zǝndi ba ada kǝratsǝni.

³ Gǝr tsanti apǝri gǝr kakadu tara hyati aka Kǝrsti, kakadǝr kǝthlǝrǝr yar, nam kura ndǝ ta rǝbwa aka sǝr rǝbwa ama aka Mambǝlǝr Hyal nam aka mpikɛ, adi ata whuwahumǝr paya yarɛ wɛ ama ata whuwahumǝr ɗǝfa ndzi.

⁴ Dzǝli mbǝrsa ǝni yar akǝri atar Kǝrsti akǝma Hyal.

⁵ Adi apǝri yar mǝzi aka kǝr yar tǝ yar awa kǝtǝ mima ala kǝr yar wɛ, ama sǝ nam tǝ yar mǝzi ka 'yati si aka Hyal.

⁶ Dzǝ mǝrti tǝ yar ndzǝr kǝthlǝr nǝr sǝ mbwa-mbwa bǝlin—adi tǝ rǝbwar mabari wɛ ama tǝ Mambǝlɛ; akuya mabari ni ada tsa ndɛ, ama Mambǝl ni ada la ndɛ mpikɛ.

Nggakur nǝr Sǝ Mbwa-mbwa Bǝlin Ni

⁷ Kulini Mabariyir Musa nam tǝ Hyal tara ɗǝhi ata whuwahumǝr paya yarɛ tara si aka nti. Wala ahani dzǝ si aka paraku nam ada mbǝli, ani ka ndzǝr Izǝraila kura awa mǝzi ka pu ntsɛ akwa kǝma Musa kadǝbar ka mbǝlǝrni, wala tǝ dzǝ ata kǝra mǝmantadzi.

⁸ Ani, mǝmi hangkur sǝ mbwa-mbwa nǝr Mambǝl ni, dzǝ adi ata 'ya aka paraku nam ada mbǝli wur-wur wɛ?

⁹ Ma whal kǝthlǝr nam aka hakar tsi ndɛ dzǝ aka sǝlai nam ngga, mǝmi hangkur sǝlai nam tǝ whal kǝthlǝr nam ada si aka ndzai kalkalkur ata 'ya akǝri!

¹⁰ Akuya sǝ nam aka ngga wur-wur watsi adi aka nggakur kulini wɛ ma ndǝ nkǝrti aka hang wurwurkur nggakur sǝ mbwa-mbwa bǝlin ni.

¹¹ Ba ma sǝ nam ada mǝma si aka paraku nam ada mbǝli, mǝmi hangkur mbǝlǝr parakǝr sǝ nam kura ada mǝma!

¹² Tǝng tǝ yar aka dzǝli tǝmá ni, yar ada labar ngga-ngga kura aka hyivǝr.

¹³ Yar adi apa Musa wɛ, nam ada mbui kǝmari aka sǝr ndǝrkǝr ka kanti ala ndzǝr Izǝraila kura dar awa wula kǝmari ama mbǝlǝrni ata kǝra mǝmantadzi.

¹⁴ Ama dar harti hankala dar, akuya har asǝna sǝr ndǝrkǝr ǝnda ni tsu adai sakatǝ ndɛ ada kǝra sǝ mbwa-mbwa nam hal-hal ni. Ndǝ ta ndǝrnta wɛ, kadǝbar akwa paktsǝnidzi aka Kǝrsti ɗiɗi tǝ ndɛ ada kǝlnta tǝni.

¹⁵ Wala ka la asǝna sakatǝ ndɛ ada kǝra mabariyir Musa, sǝr ndǝrkǝr ni ada mbui ɗǝfa dar.

¹⁶ Ama kǝlara sakatǝ kǝlara ndǝ nam tara tubi ala Thlaku sǝr ndǝrkǝr ni ada kǝlntadzi.

¹⁷ Kulini Thlaku ni ani Mambǝl ni, ba vui nam tǝ Mambǝlǝr Thlaku ni akwa, ɓui kǝr adai.

¹⁸ Ba muri nam tǝ kǝma muri kura aka sǝr ndǝrkǝr ada tsanǝ mbǝlǝr Thlaku, ndǝ pali tǝ muri alǝkwa par ní aka paraku nam ada mbǝli nam ada dzagǝdzagi; ǝni si adzǝ Thlaku nam dzǝ dza Mambǝlɛ.