2 Ndzǝr Kwaranti 2 - Kibaku NT

¹ Ani Yi hau akwa ɗǝfawai apǝri Yi tsu awa ɓakta si adzǝ gǝri kadamwa ka Yi hau tǝ gǝri akwa bwanai wɛ.

² Akuya ma Yi sǝwati ɗǝfa gǝri, wa ani tsu adai awa panyi ɗǝfawai ma adi gǝr nam tǝ Yi sǝwati ɗǝfa gǝrni wɛ?

³ Yi rǝbwai apa tǝ Yi 'ya ani ka sakatǝ Yi si Yi adi ata lǝkwa bwanai aka ndzǝ nam tǝ dar ani ata panyi ɗǝfawai wɛ. Yi mbǝrsa aka gǝri sang, apǝri gǝri sang ata kutsari kaka Yɛ.

⁴ Akuya Yi rǝbwai ala gǝri akwa bwanai ba sǝwasǝwakur ɗǝfu dzau ba aka sǝmwai yarɛ, adi ka Yi sǝwati ɗǝfa gǝri wɛ ama ka Yi tsanti ala gǝri hangkur yiɗǝdzi nam tǝ Yi akǝr ala gǝri.

Kyifǝnta Biku ala Ndzǝr Biku

⁵ Ma ndǝ nam tara si aka sǝr sǝwa ɗǝfu, dzǝ ta sǝwati ɗǝfawai wur-wur apa tǝ dzǝ sǝwati nǝgǝri sang wɛ—kǝmi tǝ ndɛ awa gha—kura ndɛ ta pukǝr yimi.

⁶ Bwanai nam tǝ dzǝ ata ɓui atar hangkur gǝri kǝ mǝzi tǝni.

⁷ Ata vuiya ǝni kulini, ka gǝri kyifǝnta alari ba sǝkǝtǝ ɗǝfu alari, ani ka ta ɗǝfari ta sǝwa wur-wur.

⁸ Yi kǝgyǝ tǝ gǝri, kadǝbar ǝni, ka gǝri ɓakta tsanɛ alari yiɗǝdzǝr gǝri.

⁹ Sǝ nam tara 'ya tǝ Yi rǝbwa ala gǝri ani ka Yi zǝndi halǝr gǝri nam dzǝri ba ma gǝri ada ngandǝrɛ akwa sanga su.

¹⁰ Ma gǝri kyifǝnta ala kǝlara ndɛ, Yi ma Yi kyifǝnta alari. Ba Sǝ nam tǝ Yi kurtaka kyifǝnta—ma sǝ nam tara bara ka Yi kyifǝnta—Yi kurtaka kyifǝnta akǝma Kǝrsti akuya ka gǝri,

¹¹ ani ka ta Satan ta 'ya bǝrkawa ta muri. Akuya mur zǝndi dabariyir ni yarɛ nam kulɗa.

Ndzǝr Kǝthlǝr nǝr Sǝ Mbwa-mbwa Bǝlin

¹² Kulini Sakatǝ Yi si akwa Taruwasu ka nkǝr ndǝrǝr Hyal nam sǝɗa nǝr Kǝrsti ba Yi ɓui Thlaku mburnta nyavǝr alai,

¹³ har kulini hankalawai ta pi wɛ, kadǝbar Yi ta ɓui zǝr mana Taitus akwanda wɛ. Ani Yi ka nkǝrɛ ala dar siyamɛ vǝr laka ba Yi ka tǝra akwa Makidauniya.

¹⁴ Ama usɛ ala Hyal, nam kǝlara saka dzǝ ada ndǝrkǝma ala yar akwa sǝmkǝr akwa Kǝrsti ba atar yar tǝ dzǝ kikilnta akwa sanga vui sǝ sǝwur nam sǝɗa nǝr zǝndi tǝni.

¹⁵ Akuya ala Hyal muri dza ani sǝ sǝwur nam sǝɗa nǝr Kǝrsti akwa ntsa ndzǝ nam ada ɓui mbatǝdzi ba muri dza ani sǝ nam ada sǝwur kulɗa ala ndzǝ nam ada santadzi.

¹⁶ Ala albwa pathlu muri dza ndzǝ nam ada sǝwurǝr nti; ala dukwari muri dza ndzǝ nam ada sǝwurǝr mpikɛ. Wa ada mǝzi 'yati dzǝli kǝthlǝr ǝni?

¹⁷ Muri adi apa ndzǝ hang nam ada dzuwul ndǝrǝr Hyal ka ɗǝru wɛ. Ama, akwa Kǝrsti muri ada ndǝrɛ akǝma Hyal aka nkǝr dzǝri apa ndzi tǝ Hyal hya.