2 Ndzǝr Kwaranti 10 - Kibaku NT

Bulusu Nkǝrba Dzǝrkur ata Kǝra Kǝthlǝrǝrni

¹ Atar tǝrghǝlkǝr ba kanadikur nǝr Kǝrsti, Yi kǝgyǝ tǝ gǝri—Yɛ, Bulusu, nam kura “ada ndǝrɛ” sakatǝ Yi kaka gǝri, ama “ada ndǝrɛ ngga-ngga” sakatǝ Yi tǝra!

² Yi kǝgyǝ tǝ gǝri apǝri ma sakatǝ Yi si Yi adi ata ndǝr dzau-dzau ala gǝri apa tǝ Yi ɗǝmhǝi tǝ Yi ata ndǝrɛ ala ndzǝ laka nam ada ɗǝnga apǝri yar ada ndzai tǝ sǝ nam tǝ dunya vi wɛ.

³ Akuya wala tǝ yar ada ndzai akwa dunya, yar adi ada dlǝ mpa apa tǝ dunya ada 'ya wɛ.

⁴ Kariyir mpa nam tǝ yar ada mpa akǝri adi kari mpa nǝr dunya wɛ. Pam ta ǝni, dar aka dǝnar Hyal ka whuzanta vui yarɛ nam aka dǝna.

⁵ Yar ada whuzanta kampiku yarɛ ba kǝlara ɗǝngar agular ndɛ nam tǝ ndɛ vi ati ata kǝra zǝndi su nǝr Hyal, ba yar ada ngǝti kǝlara ɗǝnga ka dzǝ ndzi fali ba mǝrti tǝni ka dzǝ ngandǝrǝr Kǝrsti.

⁶ Ba yar ata ɗǝmhǝ kǝr yar ka hakatsǝni kǝlara 'ya su kura ngandǝrkur sakatǝ ngandǝrǝr gǝri kǝ 'ya kal-kal.

⁷ Gǝri ada wulɛ su ata kǝr-kǝr ɗiɗi. Ma kǝlara ndɛ nam tara mbǝrsa apǝri dzǝ nǝr Kǝrsti, ka dzǝ ɓakta ɗǝnga apǝri yar nǝr Kǝrsti tsu apa dza.

⁸ Akuya wala ma Yi ɗar 'ya agula hang ata kǝra wada nam tǝ Thlaku la yar akuya ka kǝlati tǝ gǝri alǝti ama adi ka tǝrghǝl tǝ gǝri wɛ, Yi adi ata nga sǝlai wɛ.

⁹ Yi adi ada bara ka Yi tsanti apǝri Yi ada bara ka Yi hyivǝrati tǝ gǝri aka kakadǝrna yarni wɛ.

¹⁰ Akuya ndzǝ laka ada nkǝrɛ, “Kakadǝrni yarni dar kǝgǝɓu ba aka dǝna, ama dzǝ tǝ kǝrni dzǝ adi sǝraɗa wɛ ba ndǝrǝrni yarɛ adi ada 'yati mima wɛ.”

¹¹ Dzǝli ndzǝ yarni ka dar zǝndi apǝri sǝ nam tǝ yar nkǝrɛ akwa kakadu yarɛ saka kura yar adai, yar ata 'yati sǝ yar ndari sakatǝ yar adai.

¹² Yar adi ata yiɗɛ ka tsɛ wala nkǝrti kǝr yar kaka nakuma ndzǝ nam ada hǝm kǝr dar wɛ. Sakatǝ dar ada nkǝrti kǝr dar tǝ kǝr dar ba gǝlati kǝr dar tǝ kǝr dar, dar adi bǝrkawa wɛ.

¹³ Yar, dzá, yar adi ata agular sǝ nam tara kwatsǝni vui nam kal-kal wɛ, ama yar ata vi agular yar ata kǝla babal nam tǝ Hyal la yar, babal nam tara tsǝbti tǝ gǝr ma.

¹⁴ Yar adi ada tǝra pǝɗǝm wur-wur akwa agular yar wɛ, apa atara 'ya ma yar ta si adzǝ gǝri wɛ, akuya yar ɓui ka tsǝbti tǝ gǝri akwa kwaranti aka ndǝrǝr Hyal nam sǝɗa nǝr Kǝrsti.

¹⁵ Yar adi ada lǝba ta kǝla yar wɛ atar agula tǝ kǝthlǝr nam tǝ ndzǝ damwa dza 'ya. Tǝmatsǝniyir yar ani apǝri, apa tǝ hamnta dzǝrǝr gǝri ada kǝlí, babalǝr kǝthlǝrǝr yar akwa ntsa gǝri ada dzagǝi hang,

¹⁶ ani ka yar ata mǝzi nkǝrɛ ndǝrǝr Hyal nam sǝɗa akwa vui yarɛ nam abǝla kǝma gǝri. Akuya yar adi ada bara ka yar 'ya agula ata kǝra kǝthlǝr nam tǝ ndǝ kurtaka kurai akwa vui kǝthlǝrǝr ndǝ damwa wɛ.

¹⁷ Ama, “Ngyar ka ndǝ nam ata agula ka dzǝ agula ata kǝra Thlaku.”

¹⁸ Akuya adi ndǝ nam ada hǝm kǝrni ani tǝ ndǝ ada yiɗɛ alari wɛ, ama ndǝ nam tǝ Thlaku ani ada hǝmɛ.