2 Bitrusu 1 - Kibaku NT

¹ Kakadu ni hyati aka Simaun Bitrusu, zǝr kǝi ba ndǝr hya nǝr Yɛsu Kǝrsti. Yi ada rǝbwa ala ndzǝ nam atar kalkalkur Hyalǝr muri ba Ndǝr Mbati Yɛsu Kǝrsti dar dlutsi hamnta dzǝri nam aka paida apa nǝmuri.

² Ka Hyal la gǝri ɗakur Hyal ba ndzai lapiya hangkurari atar zǝndi Hyal ba Yɛsu Thlakǝr muri.

Ndzai nam Kal-kal ala Ndzǝr Nu Kǝrsti

³ Dǝnar Hyalkur ni ani tara la muri kǝlara sǝ nam tǝ muri ada bara akuya ka mpikɛ ba ndzai hyalkur atar zǝndi sǝr muri ata kǝrari dzǝ nam tara kǝga tǝ muri atar nggakurni ba ɗakurni.

⁴ Atar sǝ yarni, Hyal la muri alkawalǝrni yarɛ nam ngga ba aka paida, ani ka muri ɓui mwardzi akwa ndzaiyir Hyalkur ni, aghǝla tǝ gǝri tara ɓui mbulbadzi ta dlǝrpǝkur nǝr mau sǝ yarɛ nam kulɗa nam akwa dunya ni.

⁵ Akuya ka sǝ ǝni, hawamɛ sanga dǝna ka gǝr dzakti ɗakur ata kǝra hamnta dzǝri gǝri; ba ata kǝra ɗakurni, zǝndi su ata kǝra Hyal,

⁶ ba ata kǝra zǝndi su, ɓǝlati kǝr, ba ata kǝra ɓǝlati kǝr, ɓatǝsu, ba ata kǝra ɓatǝsu, ndzai nǝr Hyalkur;

⁷ ba ata kǝra ndzai nǝr Hyalkur, hankalkur ala yar mama; ba ata kǝra hankalkur ala yar mama, yiɗǝdzi.

⁸ Akuya ma apǝri gǝri aka hal yarni, ba dar ada dzakdzakǝi akwa gǝri, dar ata mǝrti tǝ gǝri ata ya munya ba gǝri ata 'ya aka paida akwa zǝndi su nǝr Thlakǝr muri Yɛsu Kǝrsti.

⁹ Ama ma kǝlara ndǝ nam kura aka hal ǝni yarni, dzǝ ndǝ nam kura ada wula sǝ pǝɗǝm ba dzǝ ghyang, ba dzǝ fwanta apǝri ndǝ kǝtsǝnta tǝni ta bikǝrni yarɛ nam watsi.

¹⁰ Kadǝbar ǝni, madar mama kaka nkwaiyir mama yarɛ, kǝ ndzai ntsakǝr ka gǝri 'ya sanga sǝ nam tǝ gǝri ata 'yati ka tsanti apǝri Hyal kǝga ba tsarba tǝ gǝri. Akuya ma gǝri 'ya sǝ yarni, gǝri adi ata saga dla wɛ.

¹¹ Ani akwa whal ǝni Hyal ata dlutsi tǝ gǝri alǝkwa kuhyikur nam kura kurkuri nǝr Thlakǝr muri ba Ndǝr Mbati Yɛsu Kǝrsti.

'Ya Nabikur nǝr Labar Hyal

¹² Ani, kǝlara saka Yi ata ɗǝngati ala gǝr sǝ ǝni yarɛ ni, wala ahani gǝr zǝndi tǝ dar ba gǝr kurtaka ntsidzi akwa dzǝrkur ni nam tǝ gǝri akǝri.

¹³ Yi ada ɗǝnga apǝri kǝ ndzai kal-kal, ka Yi lǝkǝma aka ɗǝngati ala gǝri tǝng tǝ Yi ata mpikɛ akwa dzɛ ni,

¹⁴ kadǝbar Yi zǝndi apǝri kǝ 'ya kudzǝghɛ tǝ Yi ata ndǝghǝi aka dzawai ni, apa tǝ Thlakǝr muri Yɛsu Kǝrsti tara kurtaka tsanti alai.

¹⁵ Ba Yi ata hau sanga dǝna ka Yi wuti apǝri aghǝla ma Yi adi wɛ gǝri ata mǝzi ka ɗǝngati sǝ yarɛ ni kǝlara saka.

¹⁶ Yar ta nu ndǝrɛ yarɛ nǝr hawi tǝ ndǝ sǝba akǝr wɛ sakatǝ yar tara nkǝrɛ ala gǝri sǝ ata kǝra dǝna ba siyir Thlakǝr muri Yɛsu Kǝrsti, ama yar ndzai sakǝida ntsɛ aka ntsɛ nǝr ɓwalta sangkurni.

¹⁷ Akuya dzǝ dlutsi hǝmɛ ba nggakur aka Hyal Tada sakatǝ kuɗahǝ ni tara si alari nam tara hyati adzǝ Nggakur nam Ɓwaltasang, ada nkǝrɛ, “Əni ani Zǝrna, nam tǝ Yi yiɗɛ; nam tǝ ɗǝfawai sǝɗa wur-wur alari.”

¹⁸ Yar tǝ kǝr yar yar ngati kuɗahǝ ni nam tara hyati atahyal sakatǝ yar kaka dza ati akwa paya kartǝ ni.

¹⁹ Ani yar aka mbǝrsa hang akwa sǝ nam tǝ ndzǝ nam ada ndǝrɛ ata nyar Hyal tara gha akwa Labar Hyal yarɛ. Gǝri ata 'ya sǝ nam ɗaku ma gǝri vǝdzǝ hankal ala labar ǝni, kadǝbar dzǝ apa pitǝla ada mbǝli akwa vui kuthlɛ har si ma vǝr kuri ba parakǝr Kǝrsti ni ada mbǝli akwa ɗǝfa gǝri yarɛ, tsu apa tǝ tsambiyar kula-kula ada si aka paraku ala dunya.

²⁰ Ama tangkǝma, kǝ ndzai ntsakǝr ka gǝri zǝndi apǝri, 'ya nabikur nam akwa Labar Hyal adi ta si atar nkǝrnta sǝ nam tǝ nabi ni ngaba wɛ.

²¹ Akuya 'ya nabikur ta saga ɓuidzi atar nam tǝ ndɛ ani ada bara wɛ, ama sǝli ada nkǝrɛ sǝ nam tǝ Hyal gha apa tǝ Mambǝl Kartǝ ada pwar tǝ dar.