1 Yawhana 5 - Kibaku NT

Hamnta Dzǝri akwa Zǝr Hyal ni

¹ Kǝlara ndǝ nam tara mbǝrsa apǝri Yɛsu ani Kǝrsti, dzǝ ɓui yabadzi nǝr Hyal, ba kǝlara ndǝ nam tara yiɗǝ tada ni dzǝ yiɗǝ zǝr ni yɛ.

² Əni ani whal nam tǝ muri zǝndi apǝri muri yiɗǝ madar Hyal: atar yiɗǝ Hyal, ba ma muri ada nu tsawurni yarɛ.

³ Əni ani yiɗɛ Hyal: ngandǝrǝr tsawurni yarɛ. Ba tsawurni yarɛ adi dzau wɛ,

⁴ akuya kǝlara ndǝ nam tara ɓui yabadzi nǝr Hyal dzǝ kǝ kwatsǝni dǝnar dunya ni. Ba muri ada ɓui sǝmkǝr ǝni atar hamnta dzǝrǝr muri.

⁵ Wa ani tara sǝmkǝr ata kǝra dunya ni? Ɗiɗi ndǝ nam ada mbǝrsa apǝri Yɛsu ani Zǝr Hyal.

⁶ Yɛsu Kǝrsti dzǝ dza ani tara si aka yimǝr bamtizǝmarni ba masǝr ntǝrni. Dzǝ ta si aka yimi ɗiɗi wɛ, ama dzǝ si aka yimi ba masi gyapu. Ba Mambǝl ni tǝ kǝrni nkǝrɛ apǝri ǝni ani dzǝri, kadǝbar Mambǝl ni dzǝ dza ani dzǝrkur.

⁷ Akuya sakǝida makǝr adai:

⁸ Mambǝl ni, yimi ba masi ni; ba dar makǝr ni nya dar duku.

⁹ Muri ada dlu sakǝidar ndɛ, ama sakǝidar Hyal ani ɓwal kadǝbar dzǝ ani sakǝidar Hyal, nam tǝ dzǝ tara hamnta ata kǝra Zǝrǝrni.

¹⁰ Kǝlara ndǝ nam ada mbǝrsa aka Zǝr Hyal dzǝ aka sakǝida ǝni akwa ɗǝfari. Kǝlara ndǝ nam kura ta mbǝrsa Hyal mǝrti tǝni ndǝr hawi, akuya dzǝ ta mbǝrsa aka sakǝida nam tǝ Hyal hamnta ata kǝra Zǝrǝrni wɛ.

¹¹ Ba ǝni ani sakǝida ni: Hyal la muri mpikǝ nam kura kurkuri, ba mpikɛ ǝni akwa Zǝrǝrni.

¹² Ndǝ nam aka Zǝr ni dzǝ aka mpikɛ; Ndǝ nam kura aka Zǝr Hyal ni dzǝ adi aka mpikɛ wɛ.

Ndǝrɛ nam ata dǝnta

¹³ Yi rǝbwa ala gǝri sǝ ǝni yarni gǝri nam aka mbǝrsa akwa thlǝma Zǝr Hyal ani ka gǝr zǝndi apǝri gǝri aka mpikǝ nam kura kurkuri.

¹⁴ Əni ani mbǝrsa nam tǝ muri akǝri akǝmari: apǝri ma muri kǝgyǝ kǝlara su aka yiɗǝr ni dza ata sǝthlǝmɛ ala muri.

¹⁵ Ma muri zǝndi apǝri dzǝ ada sǝthlǝmɛ ala muri—kǝlara sǝ tǝ muri kǝgyɛ—ka muri zǝndi apǝri muri ɓui sǝ nam tǝ muri tara kǝgyǝ akari ni.

¹⁶ Ma kǝlara ndǝ nam tara wula zǝrangǝri ada 'ya biku nam kura ata mwari aka dza akwa nti, ka dzǝ 'ya aduwa ba Hyal ata lari mpikɛ. Yi ada ndǝrɛ ata kǝra ndzǝ nam tǝ bikǝr dar adi ada mwari aka ndɛ akwa nti wɛ. Biku adai nam nǝr nti. Yi adi ada nkǝrɛ apǝri ka ndǝ 'ya aduwa ata kǝra ǝnda wɛ.

¹⁷ Kǝlara 'ya sǝ nam kura kal-kal dzǝ biku, ba biku adai nam kura nǝr nti.

¹⁸ Muri zǝndi apǝri kǝlara ndǝ nam tara ɓui yabadzi nǝr Hyal dzǝ adi ada lǝkǝma aka 'ya biku wɛ; Zǝrǝr Hyal ni ada ɓǝla tǝni, ba ndǝ kulɗa ni adi awa mǝzi tsǝkwar tǝni wɛ.

¹⁹ Muri zǝndi apǝri muri madar Hyal, ba sanga dunya ni akwa tsiya ndǝ kulɗa ni.

²⁰ Muri kurtaka zǝndi Zǝrǝr Hyal ni kǝ si, ba dzǝ la muri ngaba su, ani ka muri zǝndi tǝni dzǝ nam dzǝri. Ba muri akwa paktsǝnidzi kaka dza dzǝ nam dzǝri ni—ani muri akwa Zǝrǝrni Yɛsu Kǝrsti. Dza ani Hyal nam dzǝri ba mpikǝ nam kura kurkuri.

²¹ Madarna yarɛ nam tǝ Yi yiɗɛ ka gǝri 'ya pǝɗǝm ta mǝlǝm yarɛ.