1 Yawhana 4 - Kibaku NT

Dzaba Mambǝl yarɛ ni

¹ Pazi yarɛ nam tǝ Yi yiɗɛ, ta gǝri ta mbǝrsa aka kǝlara mambǝlɛ, ama dzabamɛ mambǝl yarɛ ni ka gǝr wula wala dar hyati adzǝ Hyal, akuya nabiyir hawi yarɛ hang tara sǝba akwa dunya ni.

² Əni ani whal nam tǝ muri ata zǝndi Mambǝlǝr Hyal: kǝlara mambǝl nam ada nkǝrɛ apǝri Yɛsu Kǝrsti si akwa kumǝr dzɛ dzǝ hyati adzǝ Hyal,

³ ama kǝlara mambǝl nam kura ta nkǝrba Yɛsu dzǝ adi nǝr Hyal wɛ. Əni ani mambǝlǝr dǝgunmar Kǝrsti ni, nam tǝ gǝri ngati apǝri dzǝ ata si ba kulini ma dzǝ akwa dunya ni.

⁴ Gǝri, madausai yarɛ nam tǝ Yi yiɗɛ, gǝri nǝr Hyal, ba gǝr sǝmkǝr ata kǝra dar, kadǝbar dzǝ nam akwa gǝri dzǝ ɓwalta dzǝ nam akwa dunya ni.

⁵ Dar nǝr dunya ni ani tara 'ya tǝ dar ada ndǝrɛ apa dzǝli nǝr dunya, ba dunya ada sǝthlǝmɛ ala dar.

⁶ Muri nǝr Hyal, ba kǝlara ndǝ nam tara zǝndi Hyal dzǝ ada sǝthlǝmɛ ala muri; ama kǝlara ndǝ nam kura nǝr Hyal dzǝ adi ada sǝthlǝmɛ ala muri wɛ. Əni whal nam tǝ muri ada zǝndi Mambǝl nam dzǝri ba mambǝl nam nǝr hawi.

Yiɗǝdzǝr Hyal ba Nǝmuri

⁷ Pazi yarɛ nam tǝ Yi yiɗɛ, ka muri yiɗǝ kǝma muri, akuya yiɗǝdzi nǝr Hyal. Kǝlara ndǝ nam ada yiɗǝ ndɛ dzǝ zǝr Hyal, ba dzǝ zǝndi Hyal.

⁸ Kǝlara ndǝ nam kura ada yiɗǝ ndɛ dzǝ ta zǝndi Hyal wɛ, akuya Hyal dzǝ ani yiɗǝdzi.

⁹ Əni ani whal nam tǝ Hyal tara tsanti yiɗǝdzǝrni ala muri: dzǝ hyanti Zǝrǝrni duku ngyalang akwa dunya ni kadǝbar ka muri ɓui mpikɛ atarni.

¹⁰ Əni ani yiɗǝdzi: Adi apǝri muri yiɗǝ Hyal wɛ, ama Hyal dzǝ ani tara yiɗǝ tǝ muri ba dzǝ ka hyanti Zǝrǝrni apa sǝr kǝdlǝr sǝ nam tara kǝlnta bikǝr muri yarɛ.

¹¹ Pazi yarɛ nam tǝ Yi yiɗɛ, tǝng tǝ Hyal yiɗǝ tǝ muri ahani, muri yɛ ka muri yiɗǝ kǝma muri.

¹² Ndɛ nam tara saga wula Hyal adi wɛ; ama ma muri ada yiɗǝ kǝma muri, Hyal ada ndzai akwa muri ba yiɗǝdzǝrni ndzai ghǝi-ghǝi akwa muri.

¹³ Muri zǝndi apǝri muri ada ndzai akwa paktsǝnidzi kaka Hyal ba dzǝ akwa muri, kadǝbar dzǝ la muri Mambǝlǝrni.

¹⁴ Muri wula ba muri ada hamnta sakǝida ata kǝri apǝri Tada ni hyanti Zǝrǝrni ka dzǝ ndzai Ndǝr Mbati dunya ni.

¹⁵ Kǝlara ndǝ nam ada nkǝrɛ apǝri Yɛsu ani Zǝrǝr Hyal, dzǝ ada ndzai akwa paktsǝnidzi aka Hyal ba Hyal akwa dza.

¹⁶ Ani mur zǝndi ba mur mbǝrsa aka yiɗǝdzi nam tǝ Hyal akǝri ala muri. Hyal dzǝ ani yiɗǝdzi. Ndǝ nam ada ndzai akwa yiɗǝdzi dzǝ ada ndzai akwa paktsǝni aka Hyal, ba Hyal akwa dza.

¹⁷ Akwa whal ǝni, antǝ yiɗǝdzi tara mǝrtǝdzi ghǝi-ghǝi akwa ntsa muri ani ka muri 'ya aka mbǝrsa akwa vǝr haka, kadǝbar akwa dunya ǝni muri apa dza.

¹⁸ Hyivǝr adi akwa yiɗǝdzi wɛ, ama yiɗǝdzi nam ghǝi-ghǝi ada kǝdlǝnta hyivǝr. Ma muri ada hyivǝr, ani kadǝbar ka hyivǝr haka, ndǝ nam ada hyivǝr dzǝ adi aka yiɗǝdzi nam ghǝi-ghǝi wɛ.

¹⁹ Muri ada yiɗǝdzi kadǝbar dzǝ ani tara yiɗǝ tǝ muri tangkǝma.

²⁰ Kǝlara ndǝ nam tara nkǝrɛ, “Yi yiɗǝ Hyal,” ama dzǝ ngǝla zǝrangǝri, dzǝ ndǝr hawi. Akuya ndǝ nam kura ada yiɗǝ zǝrangǝri, nam tǝ dzǝ ada wula, dzǝ adi ata mǝzi yiɗǝ Hyal nam kura dzǝ ta wula wɛ.

²¹ Ba dzǝ la muri tsau ǝni: Kǝlara ndǝ nam ada yiɗǝ Hyal ntsakǝr ka dzǝ yiɗǝ zǝrangǝri yɛ.