1 Yawhana 3 - Kibaku NT

¹ Mǝmi nggakur yiɗǝdzi nam tǝ Tada ni tara tsanti ala muri, nam tǝ ndǝ ata kǝga tǝ muri madar Hyal! Ba ani muri ahani! Sǝ nam tara 'ya kura dunya ta zǝndi tǝ muri ni ani apǝri dzǝ ta zǝndi tǝni wɛ.

² Pazǝrna yarɛ nam tǝ Yi yiɗɛ, kulini muri madar Hyal, ba muri ta zǝndi kwataku wala muri ata siya ndzai sǝr mi wɛ. Ama muri zǝndi apǝri sakatǝ Kǝrsti tsantǝdzi, muri ata ndzai apa dza, akuya muri ata wula tǝni apa ndziyirni.

³ Kǝlara ndǝ nam aka tǝmatsǝni ǝni akwa dza ka dzǝ kǝtsǝnta kǝrni, tsu apa tǝ dzǝ kǝtsǝkǝtsi.

⁴ Kǝlara ndǝ nam ada 'ya biku dzǝ ada ɓǝlnta mabari; dzǝri biku ani ɓǝlnta mabari.

⁵ Ama gǝri zǝndi apǝri Kǝrsti tsantǝdzi ani ka dzǝ kǝlnta bikǝr muri yarɛ. Ba akwa dza biku adi wɛ.

⁶ Ndɛ adi nam ada ndzai akwa paktsǝnidzi aka dza nam tǝ dzǝ ada lǝkǝma aka 'ya biku wɛ. Ndɛ adi nam ada lǝkǝma aka 'ya biku nam tǝ dzǝ wula tǝni wala zǝndi tǝni wɛ.

⁷ Madausai yarɛ nam tǝ yiɗɛ, ta gǝri ta ngyar ka kǝlara ndɛ zǝlanta gǝri. Ndǝ nam ada 'ya sǝ nam kal-kal dzǝ ndǝ kal-kal, tsu apa tǝ Kǝrsti kal-kal.

⁸ Ndǝ nam ada lǝkǝma aka 'ya sǝr biku dzǝ nǝr Satan, kadǝbar Satan ni dzǝ ada 'ya biku tsu akwa baditsǝni. Sǝ nam tara 'ya tǝ Zǝr Hyal tara tsantǝdzi ani ka dzǝ whuzanta kǝthlǝr Satan.

⁹ Ndɛ adi nam tara ɓui yabadzi nǝr Hyal ada lǝkǝma aka 'ya biku wɛ, kadǝbar munyar Hyal ada ndzai akwa dza; dzǝ adi awa lǝkǝma aka 'ya biku wɛ, kadǝbar dzǝ ɓui yabadzi nǝr Hyal.

¹⁰ Əni ani whal nam tǝ muri zǝndi ndzǝ madi yarɛ ani madar Hyal ba wa yarɛ ani madar Satan: Kǝlara ndǝ nam kura ada 'ya sǝ nam kal-kal dzǝ adi zǝr Hyal wɛ; wala kǝlara ndǝ nam kura ada yiɗǝ zǝrangǝri.

Ka Muri Yiɗǝ Kǝma Muri

¹¹ Əni ani ndǝrɛ nam tǝ gǝri ngati tsu akwa baditsǝni ni: ka muri yiɗɛ kǝma muri.

¹² Ta muri ta ndzai apa Kayinu, dzǝ nam tara ndzai nǝr Satan ni ba dzǝ tsi zǝrangǝri. Kami tǝ dzǝ tsi tǝni? Kadǝbar sǝ yarɛ nam tǝ dzǝ 'ya ni kulɗa ama nǝr zǝrangǝri 'ya kal-kal.

¹³ Ta gǝri ta ndatǝdzi, madar mama kaka nkwaiyir mama yarɛ, ma dunya ngǝla tǝ gǝri.

¹⁴ Muri zǝndi apǝri muri kurtaka kwatsǝni nti muri ka lǝkwa mpikɛ, kadǝbar muri yiɗǝ madar mama kaka nkwaiyir mama muri yarɛ. Kǝlara ndǝ nam kura aka yiɗǝdzi, dzǝ ada ndzai ata kwar nti.

¹⁵ Kǝlara ndǝ nam ada ngǝla zǝrangǝri, dzǝ ndǝr tsa ndɛ, ba gǝri zǝndi apǝri ndǝr tsa ndɛ dzǝ adi aka mpikǝ nam kura kurkuri wɛ.

¹⁶ Əni ani whal nam tǝ muri ata zǝndi sǝr mi ani yiɗǝdzi: Yɛsu Kǝrsti hamnta mpikari akuya ka muri. Ba muri yɛ kal-kal ka muri hamnta mpika muri akuya madar mama kaka nkwaiyir mama muri yarɛ.

¹⁷ Ma kǝlara ndǝ nam aka sǝ akwa tsiyari, ba dzǝ wula zǝrangǝri kura akǝri ama dzǝ ta 'ya kǝtǝrdzi alari wɛ, mǝmi tǝ yiɗǝdzǝr Hyal awa 'ya adai akwa dza?

¹⁸ Madausai yarɛ nam tǝ Yi yiɗɛ, ta muri ta 'ya yiɗǝdzi tǝ nya wala tǝ labar ama aka 'ya su ba akwa dzǝrkur.

¹⁹ Əni dzá ani whal nam tǝ muri ata zǝndi apǝri muri nǝr dzǝrkur, ba whal nam tǝ muri ata vi ɗǝfa muri akwa vui ghǝrbadzi akǝma Hyal

²⁰ kǝlara sakatǝ ɗǝfa muri nkǝrɛ sǝ tǝ muri 'ya adi kal-kal wɛ. Akuya Hyal kwatsǝni ɗǝfa muri yarɛ, ba dzǝ zǝndi sanga su.

²¹ Pazi yarɛ nam tǝ Yi yiɗɛ, ma ɗǝfa muri ta nkǝrɛ apǝri mur sǝwati sǝ wɛ, muri aka dǝnautsǝnidzi akǝma Hyal

²² ba muri ada ɓui kǝlara sǝ nam tǝ mur kǝgyɛ, kadǝbar muri ada ngandǝrǝr tsawurni yarɛ ba muri ada 'ya sǝ nam ada panyi ɗǝfari.

²³ Ba ǝni ani tsawurni: ka muri mbǝrsa aka thlǝma zǝrǝrni, Yɛsu Kǝrsti, ba ka muri yiɗǝ kǝma muri apa tǝ dzǝ tara tsau ala muri.

²⁴ Ndzǝ nam ada ngandǝrǝr tsawurni yarɛ dar ada ndzai akwa paktsǝnidzi aka Hyal, ba Hyal ada ndzai akwa ɗǝfa dar. Ba ǝni ani whal nam tǝ muri zǝndi apǝri dzǝ ada ndzai akwa muri: muri zǝndi atar Mambǝl tǝ dzǝ tara la muri ni.