1 Yawhana 2 - Kibaku NT

¹ Madarna nam tǝ Yi yiɗɛ, Yi rǝbwai sǝ ǝni ala gǝri ani ka ta gǝri ta 'ya biku. Ama ma ndǝ laka 'ya biku, muri aka ndǝr ndǝrɛ ala Tada ni ata nyar muri—Yɛsu Kǝrsti, Ndǝ nam Kal-kal ni.

² Dzǝ dza sǝr kǝdlǝr sǝ nam tara kǝlnta bikǝr muri yarɛ, ba adi ɗiɗi ka nǝmuri wɛ ama akuya ka bikǝr sanga dunya.

³ Muri zǝndi apǝri muri kǝ si ka zǝndi tǝni ma muri ngandǝrǝr tsawurni yarɛ.

⁴ Ndǝ nam ada nkǝrɛ apǝri “Yi zǝndi tǝni,” ama dzǝ adi ada 'ya sǝ yarɛ nam tǝ dzǝ tsau wɛ dzǝ ndǝr hawi, ba dzǝrkur adi akwa dza wɛ.

⁵ Ama kǝlara ndǝ nam ada ngandǝrɛ ala ndǝrǝrni, yiɗǝdzǝr Hyal dzǝri adai ghǝi-ghǝi akwa dza. Əni ani whal nam tǝ muri zǝndi apǝri muri ada ndzai akwa paktsǝnidzi kaka dza.

⁶ Kǝlara ndǝ nam tara nkǝrɛ apǝri dzǝ ada ndzai akwa paktsǝnidzi aka Hyal ntsakǝr ka dzǝ 'ya su apa tǝ Yɛsu tara 'ya.

⁷ Pazi yarɛ nam tǝ Yi yiɗɛ, Yi adi ada rǝbwa ala gǝri tsau nam bǝlin wɛ ama nam watsi nda, nam tǝ gǝri akǝri tǝng akwa baditsǝni. Tsau nam watsi ǝni ani ndǝr nam tǝ gǝri ngati ni.

⁸ Tsu ahani Yi ada rǝbwa ala gǝri tsau bǝlin; dzǝrkurǝrni ndǝ ada wula akwa Kǝrsti ba akwa gǝri, kadǝbar kuthlǝ ni ada kwatsǝni ba paraku nam dzǝri ni kurtaka si ada mbǝli.

⁹ Kǝlara ndǝ nam tara nkǝrɛ apǝri dzǝ akwa paraku ama dzǝ ada ngǝla zǝrangǝri dzǝ tsu akwa kuthlɛ.

¹⁰ Ndǝ nam ada yiɗǝ zǝrangǝri dzǝ ada ndzai akwa paraku, ba sǝ adi akwa dza nam ata hau tǝ ndǝ awa mbuthlǝl wɛ.

¹¹ Ama ndǝ nam ada ngǝla zǝrangǝri dzǝ akwa kuthlɛ ba dzǝ ada nuɗɛ akwa kuthlɛ; dzǝ ta zǝndi vui nam tǝ dzǝ ada mwari akwa wɛ, kadǝbar kuthlǝ ni mǝrti tǝni ka 'ya ghyang.

¹² Yi ada rǝbwa ala gǝri, madar mama yarɛ nam tǝ Yi yiɗɛ, kadǝbar bikǝr gǝri yarɛ kǝ kyifǝntadzi ata nyar thlǝmari.

¹³ Yi ada rǝbwa ala gǝri, tada yarɛ, kadǝbar gǝri zǝndi tǝni dzǝ nam akwa baditsǝniyari ni. Yi ada rǝbwa ala gǝri, gǝri nam dakurai, kadǝbar gǝri sǝmkǝr ata kǝra ndǝ kulɗa ni. Yi ada rǝbwa ala gǝri, gǝri nam madausai, kadǝbar gǝri zǝndi Tada ni.

¹⁴ Yi ada rǝbwa ala gǝri, tada yarɛ, kadǝbar gǝri zǝndi tǝni dzǝ nam akwa baditsǝniyari ni. Yi ada rǝbwa ala gǝri, gǝri nam dakurai, kadǝbar gǝri aka dǝna, ba ndǝrǝr Hyal ada ndzai akwa gǝri, ba gǝri kǝ sǝmkǝr ata kǝra ndǝ kulɗa ni.

Ta gǝri Ta Yiɗǝ Dunya

¹⁵ Ta gǝri ta yiɗǝ dunya wala kǝlara sǝ nam akwa dunya. Ma kǝlara ndǝ nam ada yiɗǝ dunya, yiɗǝdzi nam ada hyati adzǝ Tada ni adi akwa dza wɛ.

¹⁶ Akuya sanga sǝ nam akwa dunya ni—ani sǝ yarɛ nam tǝ ndǝr biku ada bara, sǝ nam tǝ ntsari ada mauwɛ ba agula aka sǝ nam tǝ dzǝ akǝri ba sǝ nam tǝ dzǝ ada 'ya—adi ada hyati adzǝ Tada wɛ ama akwa dunya ni.

¹⁷ Dunya ni ba sǝ yarɛ nam tǝ dzǝ ada bara ata kwatsǝni, ama ndǝ nam ada 'ya sǝ nam tǝ Hyal ada bara dzǝ ata ndzai kura kurkuri.

Ɗǝmnya Ata kǝra Dǝgunmar Kǝrsti

¹⁸ Madarna yarɛ nam tǝ Yi yiɗɛ, ǝni ani saka nǝr dǝnta; apa tǝ gǝri ngati apǝri dǝgunmar Kǝrsti ni aghǝli ada si, wala kulini dǝgunmar Kǝrsti hang tara si. Əni ani whal nam tǝ muri zǝndi saka nǝr dǝnta ni.

¹⁹ Ndzǝ yarni sǝba akwa albwar muri, ama dzǝri dar adi atakǝmaduku kaka muri wɛ. Ma apǝri dar atakǝmaduku kaka muri, dar ndzai kaka muri. Ama dar tǝrar dar, nam ada tsanti apǝri dar adi nǝr albwar muri wɛ.

²⁰ Ama Kǝrsti, Ndǝ nam Kartǝ ni, dzǝ vi tǝ gǝri pam atar Mambǝlǝrni, ba sanga gǝri zǝndi dzǝrkur ni.

²¹ Yi ta rǝbwa ala gǝri kadǝbar kura gǝri ta zǝndi dzǝri wɛ, ama kadǝbar gǝri zǝndi tǝni kadǝbar hawi adi ada si atar dzǝrkur wɛ.

²² Wa dza ndǝr hawi ni? Dzǝ ani ndǝ nam tara ɓwalnta nya apǝri Yɛsu adi ani Kǝrsti wɛ. Dzǝli ndǝ ni ani dǝgunmar Kǝrsti—dzǝ ɓwalnyar zǝndi Tada ni ba Zǝr ni.

²³ Ndɛ adi nam tara ɓwalnyar zǝndi Zǝr ni tǝ dzǝ aka Tada wɛ; kǝlara ndǝ nam tara nkǝrba apǝri dzǝ mbǝrsa aka Zǝr ni dzǝ aka Tada ni tsuwɛ.

²⁴ Sǝ nam tǝ gǝri ngati akwa baditsǝniyari ka dzǝ ndzai akwa ɗǝfa gǝri. Ma kǝ 'ya ahani, gǝri yɛ gǝri ata ndzai akwa paktsǝnidzi kaka Zǝr ni ba Tada ni.

²⁵ Əni ani sǝ nam tǝ dzǝ 'ya alkawalari ala muri—mpikǝ nam kura kurkuri.

²⁶ Yi ada rǝbwa sǝ ǝni yarɛ ni ala gǝri ata kǝra ndzǝ nam ada bara whalǝr zǝlanta tǝ gǝri.

²⁷ Ama gǝri, Kǝrsti kǝ pukǝr Mambǝlǝrni ala gǝri ba dzǝ ka tsǝrkuba tǝ gǝri ala Hyal. Har tǝ Mambǝlǝrni ada ndzai akwa gǝri, gǝri adi ada bara kǝlara ndɛ ka dzǝ hyipɛ ala gǝri wɛ. Akuya Mambǝlǝrni ada hyipɛ ala gǝri ata kǝra kǝlara su, ba sǝ nam tǝ dzǝ ada hyipɛ ani dzǝri, adi hawi wɛ. Ka gǝri kǝlǝngkǝr ala hyipǝr Mambǝl ni, antǝ, gǝri ata ndzai akwa paktsǝnidzi kaka Kǝrsti.

Madar Hyal

²⁸ Ba kulini, madarna nam tǝ Yi yiɗɛ, ka gǝri lǝkǝma aka ndzai akwa dza, ani ka sakatǝ dzǝ tsantǝdzi muri ata ndzai aka mbǝrsa kura aka nga sǝlai akǝmari ata vǝr siyirni.

²⁹ Ma gǝri zǝndi apǝri dzǝ ndǝ nam kal-kal, gǝri zǝndi apǝri kǝlara ndǝ nam ada lǝkǝma aka 'ya sǝ nam kal-kal dzǝ zǝrǝr Hyal.