1 Timathlawus 4 - Kibaku NT

Gala yarɛ ala Timathlawus

¹ Mambǝl ni nkǝrɛ ata babal apǝri akwa saka yarɛ ata si ndzǝ laka ata ɗalnta hamnta dzǝri ni ba dar ata nu mambǝlɛ yarɛ nǝr hawi ba sǝ yarɛ nam tǝ mambǝl nam kulɗa yarɛ ani ada hyipɛ ala ndɛ.

² Dzǝli sǝr hyipɛ yarɛ ni ada hyati adzǝ ndǝr hawiyir kǝlikatsaɗǝm, ndzǝ nam tǝ ɗǝfa dar kurtaka nti apa ndǝ mbanta tǝ u'ur yang ta-ta.

³ Dar ada kanti kǝldzi ala ndzi ba dar ada tsau ala dar apǝri ta dar ta sǝm sǝr sǝm yarɛ laka, nam tǝ Hyal tara mǝrti ka ndzǝ nam aka mbǝrsa ba tara zǝndi dzǝrkur ni ka dar sǝmɛ aka gwaditsǝni.

⁴ Akuya kǝlara sǝ tǝ Hyal tara mǝrti ɗaku, ba sǝ adi nam tǝ ndɛ awa ngǝla wɛ ma apǝri ndǝ dlutsi aka gwaditsǝni,

⁵ kadǝbar dzǝ kǝ ndzai nǝr Hyal atar ndǝrǝr Hyal ba aduwa.

⁶ Ma gɛ tsanti sǝ ǝni yarni ala madar mama yarɛ, gɛ ata ndzai ndǝr kǝthlǝr Kǝrsti Yɛsu nam ɗaku, nam tara kǝlí akwa dzǝrkurǝr hamnta dzǝri ba akwa tsǝl sǝ nam ɗaku nam tǝ gǝ tara nuwɛ.

⁷ Ka gǝ tabardzi ta tsǝdzǝ sǝr watsi yarɛ nam kura nǝr Hyalkur ba tsǝdzǝ sǝ yarɛ nam kura kal-kal ka ndǝ tsɛ; ata vuiya ǝni ka gǝ tsǝlu kǝrngɛ akwa ndzai Hyalkur.

⁸ Akuya tsǝl sǝ nǝr kumǝr dzɛ aka paida, ama ndzaiyir Hyalkur aka paida akuya ka sanga sǝ, dzǝ ada ngǝzi alkawal ka mpikǝ nam kulini ba mpikǝ nam tsu ata si.

⁹ Ndǝrɛ ǝni mǝzi ka ndǝ mbǝrsa akǝri nam tǝ ndǝ awa dlutsi tǝni sang

¹⁰ (ba akuya ka ani tǝ yar ada 'ya kǝthlǝr ba bǝbǝkǝi), apǝri yar kurtaka hau tǝmatsǝniyir yar akwa Hyal nam aka mpikɛ, Ndǝr Mbati sanga ndzi, apamá ndzǝ nam aka mbǝrsa.

¹¹ Ka gǝ tsau ba hyipǝ sǝ ǝni yarɛ ni.

¹² Ta gǝ ta ngyar ka kǝlara ndɛ rutsǝni tǝngɛ kadǝbar ka nkyǝɗukur ngɛ, ama ka gǝ ndzai sǝr tsǝlɛ ala ndzǝ nam aka mbǝrsa akwa nkǝr su, akwa ndzaiyir mpikɛ, akwa yiɗǝdzi, akwa hamnta dzǝri ba akwa kǝtsǝkǝtsikur ɗǝfu.

¹³ Tar ma Yi si, ka gǝ hau kǝrngɛ akwa kǝra Labar Hyal akwa ntsa ndzi, aka nkǝr Labar Hyal ba akwa hyipǝ su.

¹⁴ 'Ya kǝthlǝr aka sǝgar ngɛ, nam tǝ Hyal tara la gɛ atar ndǝrǝr nabi sakatǝ ndzǝ ngganggar ikǝlizǝya pukǝr tsiya dar ala gɛ.

¹⁵ Ka gǝ vǝdzǝ hankal ala sǝ yarɛ ni; ka gǝ hamnta kǝrngɛ sang ala dar, ani ka sanga ndzi wula lǝkǝmar sǝ nam tǝ gǝ ada 'ya.

¹⁶ Ka gǝ wul sǝ nam tǝ gǝ ada 'ya akwa ndzaiyir ngɛ ba ka gǝ wul sǝ nam tǝ gǝ ada hyipɛ. Ka gǝ hau dǝna akwa dar, kadǝbar ma gɛ 'ya apani gɛ ata mbati kǝrngɛ kaka ndzǝ nam ada nga tǝ gɛ.