1 Timathlawus 3 - Kibaku NT

Ndzǝ Ngganggar Ikǝlizǝya ba Ndzǝr Mbana

¹ Əni labar nam dzǝri, ma ndǝ nam tara hau akwa ɗǝfari apǝri dzǝ ada bara ka dzǝ ndzai ndǝ nggar ikǝlizǝya, dzǝ bara kǝthlǝr nam ɗaku.

² Ndǝ ngga akwa ikǝlizǝya ntsakǝr ka dzǝ ndzai ndǝ nam kura aka sǝr ngǝlɛ, salǝr mwala duku, ndǝ nam ada tsǝlpi kǝrni, ada ngǝngǝuti kǝrni, ada la sǝlai ala kǝrni, ada dlu mǝthlǝɓi, ndǝ nam ada mǝzi hyipǝ su ala ndɛ,

³ adi ndǝr sǝsa su wur-wur wɛ, adi ndǝr 'ya sǝ mpa-mpa wɛ, ama ndǝ nam aka kanadi, adi ndǝr kampiku wɛ, adi ndǝr yiɗɛ kwapa wɛ.

⁴ Ntsakǝr ka dzǝ ngǝzi kǝiyirni ɗaku ba ka dzǝ wula apǝri madarni ada ngandǝrǝrni ba dar ada lari sǝlai kal-kal.

⁵ (Akuya ma ndǝ nam kura ta zǝndi whal vǝ kǝiyirni, mǝmi tǝ dzǝ awa wulhǝ ikǝlizǝyar Hyal?)

⁶ Ntsakǝr ta dzǝ ta ndzai ndǝr nu nam bǝlin, ta agula ta kǝtǝ tǝni ka dzǝ dla akur haka apa Satan ni.

⁷ Ntsakǝr ka dzǝ 'ya apǝri ndzǝ nam abǝla yɛ ada nkǝr sǝ nam ɗaku ata kǝrari, ani ka ta dzǝ ta ɗu akwa sǝr kǝl sǝlai ba akwa kyalǝr Satan.

⁸ Tsu apani, ndzǝr mbana akwa ikǝlizǝya, ka dar ndzai sǝli nam tǝ ndɛ ada la dar sǝlai, ndzǝ nam ada 'ya su aka dzǝrkur, kura ada sa yimǝr inabi wur-wur, kura ada bara sǝr ɗǝru nam kura kal-kal.

⁹ Ntsakǝr ka dar ngǝzi dzǝrkur nǝr hamnta dzǝri ɗǝngar ɗǝfu nam kura aka aibai.

¹⁰ Ntsakǝr tangkǝma ka ndǝ wulba tǝ dar; ba ma sǝ kulɗa adi ata kǝra dar wɛ, ka dar 'ya kǝthlǝr ndzǝr mbana akwa ikǝlizǝya.

¹¹ Tsu apani, mwahyir dar ka dar ndzai mwahyi nam tǝ ndǝ ata mǝzi la dar sǝlai, kura dar aka nya dlawarwar ama ndzǝ nam ada tsǝlpi kǝr dar ba ndzǝ nam aka dzǝrkur akwa sanga su.

¹² Ndǝr mbana akwa ikǝlizǝya ntsakǝr ka dzǝ ndzai sal nam aka mwala duku, ba ntsakǝr ka dzǝ wulhǝ madarni ba kǝiyirni kal-kal.

¹³ Ndzǝ nam 'yati kǝthlǝr ni ɗaku, dar ata ɓui thlǝmɛ nam ɗaku ba mbǝrsa kura hyivǝr akwa hamnta dzǝrǝr dar akwa Kǝrsti Yɛsu.

¹⁴ Wala tǝ Yi aka tǝmatsǝniyir si adzǝ ngɛ kura aka santa saka, Yi ada rǝbwa ala gɛ gala yarɛ ni ani ka,

¹⁵ ma Yi ta ngwatiya si wɛ, ka gǝ zǝndi whal nam tǝ ndzǝ ata ndzai akwa kǝiyir Hyal, kǝiyir Hyal ani ikǝlizǝyar Hyal nam aka mpikɛ, mǝtǝnga ba piyartsǝniyir dzǝrkur ni.

¹⁶ Aghǝla sanga sǝr yuwɛ, dzǝri ɗǝwa-ɗǝwa ni nǝr Hyalkur ani ngga: Kǝrsti tsantǝdzi akwa kumǝr dzɛ, Mambǝl ni tsanti apǝri ǝni dzǝri, Ndzǝr hyantǝr Hyal wula tǝni, tǝ ndǝ 'ya ndǝrǝrni nam sǝɗa akwa ntsa ndzǝr di yarɛ, Ndzǝ mbǝrsa aka dza akwa dunya, Hyal kǝtǝ tǝni alǝti akwa nggakur.