1 Timathlawus 1 - Kibaku NT

¹ Kakadu ǝni hyati aka Bulusu, ndǝr hyar Kǝrsti Yɛsu atar tsawur Hyal Ndǝr Mbati ba nǝr Kǝrsti Yɛsu tǝmatsǝniyir muri.

² Yi ada rǝbwa ala Timathlawus, zǝrna nam dzǝri akwa hamnta dzǝri: Ka Hyal Tada ni ba Kǝrsti Yɛsu Thlakǝr muri la gǝri ɗakur Hyal, kǝtǝrdzi ba ndzai lapiyakur.

Ɗǝmnya ta Malǝmǝr Hawi nǝr Mabari yarni

³ Apa tǝ Yi kǝgyǝ tǝngɛ sakatǝ Yi tara tǝra akwa Makidauniya, ka gǝ ndzai akwa Afisa, ani ka gǝ tsau ala sǝli yarɛ laka ta dar ta hyipǝ sǝr hyipɛ yarɛ nam hawi kǝra

⁴ wala ta dar ta hau kǝr dar akwa tsǝdzǝ sǝr watsi yarɛ nam kura dzǝri ba tsǝ thlǝma kaká yarɛ nam kura dǝnta. Sǝ yarɛ ni ada dzakti lǝkǝdzi ata vuiya whal mbatǝdzi nam tǝ Hyal ɗǝmhǝi, nam atar hamnta dzǝri.

⁵ Sǝ nam tǝ mabari ni ada bara ani yiɗǝdzi, nam ada hyati akwa ɗǝngar ɗǝfu nam ɗaku, ba hamnta dzǝri nam akwa dzǝrkur.

⁶ Ndzǝ laka pǝranta atǝra ka ngyar sǝ yarɛ ni ba dar ka lǝkwa nkǝrɛ sǝ yarɛ nam kura paida.

⁷ Dar ada bara ka dar ndzai malǝmǝr mabari yarni, ama dar ta ngaba sǝ nam tǝ dar ada ndǝrɛ ata kǝr wɛ wala sǝ nam tǝ dar awa nkǝrɛ apǝri dar ngaba sǝ ata kǝri.

⁸ Mur zǝndi apǝri mabari ni ɗaku, ma apǝri ndǝ 'ya kǝthlǝr akǝr akwa whal nam kal-kal.

⁹ Muri yɛ muri zǝndi apǝri ndǝ ta 'ya mabari ala ndǝ nam kal-kal wɛ ama akuya ka ndzǝr ɓǝlnta mabari ba ndzǝ nam kura ngandǝrɛ, ndzǝ nam kura ada ndzai nǝr Hyalkur ba ndzǝr biku, ndzǝ nam kura ada vǝkǝr sǝlai Hyal; akuya ndzǝ nam ada tsai tada dar wala mama dar, akuya ka ndzǝr tsa ndɛ,

¹⁰ ka ndzǝr badawi, ka sǝliyir pi aka sǝli ba mwahyir pi aka kǝma dar, ka ndzǝr ɗǝl fali, ka ndzǝr hawi, ka ndzǝr kǝl sakǝidar hawi, ba akuya ka sǝ yarɛ damwa nam kura kal-kal aka sǝr tsǝlǝr Hyal nam dzǝri,

¹¹ nam tara ɓuidzi atar nggakur ndǝrǝr Hyal nam sǝɗa nǝr Hyal nam aka barka, nam tǝ dzǝ hau akwa tsiyawai.

Ɗakur Thlaku ni ala Bulusu

¹² Yi gwaditsǝni ala Kǝrsti Yɛsu Thlakǝr muri, dzǝ nam tara lai dǝna, ba dzǝ tsǝ tǝra ndɛ aka dzǝrkur, tǝ dzǝ ka kǝtǝ tǝra akwa kǝthlǝr ni.

¹³ Wala apani watsi Yi ndǝr ngǝngǝlɛ Hyal ba ndǝr la bwanai ala ndzi. Hyal 'ya alai kǝtǝrdzi kadǝbar Yi 'ya sǝ yarɛ ni akwa tǝrkur zǝndi ba akwa kura mbǝrsa.

¹⁴ Ɗakur Thlakǝr muri pukǝrdzi alai hangkurari, atakǝmaduku kaka hamnta dzǝri ba yiɗǝdzi nam akwa Kǝrsti Yɛsu.

¹⁵ Əni ndǝrɛ nam aka dzǝrkur nam tara mǝzi ka kǝlara ndǝ dlutsi ghǝi-ghǝi: Kǝrsti Yɛsu si akwa dunya ni ka dzǝ mbati ndzǝr biku—nam tǝ Yi dza kulɗa ta sang.

¹⁶ Ama akuya ka ǝnda Hyal 'ya alai kǝtǝrdzi ani ka akwa Yɛ, ndǝr biku nam kulɗa ta sang ni, Kǝrsti Yɛsu kǝ tsanti kǝmarǝrni nam kura dǝnta apa sǝr tsǝlɛ akuya ka ndzǝ nam ata mbǝrsa akwa dza ba dlutsi mpikǝ nam kura kurkuri.

¹⁷ Kulini ala kuhyi kura kurkuri ni, kura nti ni, kura ada wuladzi ni, Hyal duku ni, kǝ ndzai hǝmɛ ba nggakur har kura kurkuri. Apani.

¹⁸ Timathlawus, zǝrna, Yi la gɛ gala ǝni tsu apa ndǝrǝr nabi yarɛ nam tara nkǝrɛ ata kǝra gɛ, ani ka atar nu ndǝrɛ yarni gɛ ata mpai mpa nam ɗaku.

¹⁹ Ka gǝ ngǝzi hamnta dzǝri ba ɗǝngar ɗǝfu nam ɗaku. Ndzǝ laka ngǝla sǝ yarɛ ni ba dar ka whuzanta hamnta dzǝrǝr dar.

²⁰ Akwa ntsa dar Himinayus ba Alizanda, nam tǝ Yi tara la tǝ dar ala Satan, kadǝbar ka 'yi tǝ dar kura dar tsu awa ngǝngǝl Hyal.