1 Ndzǝr Tasalaunika 4 - Kibaku NT

Ndzai nam Kal-kal Akǝma Hyal

¹ Ata dǝnta tsuwɛ madar mama kaka nkwaiyir mama, yar ada kǝgyǝ tǝ gǝri, ba la gǝri whal 'ya su, akwa thlǝma Thlaku Yɛsu, ka gǝr ndzai akwa whal nam ata mǝrti ɗǝfa Hyal sǝɗa, apa tǝ yar tsǝlɛ ala gǝri. Gǝr kurtaka ndzai akwa whal ni ama kulini yar dǝnautsǝni tǝ gǝri ka gǝri 'ya ɓwalta ǝni.

² Kadǝbar gǝri zǝndi dzǝli whal 'ya sǝ nam tǝ yar la gǝri atar wada nǝr Thlaku Yɛsu ni.

³ Akuya ǝni ani yiɗǝr Hyal, apǝri ka gǝri ndzai nǝr Hyal: ka gǝri ngǝla badawikur,

⁴ nam tǝ kǝlara akwa ntsa ka dzǝ zǝndi whal nam tǝ dzǝ awa ngǝngǝuti dzari akwa whal nam ata panyi ɗǝfa Hyal,

⁵ ama adi ata whal nǝr ghyǝmburkur wɛ, apa dzǝli tǝ ndzǝ nam kura aka hamnta dzǝri ada 'ya, ndzǝ nam kura ata zǝndi Hyal.

⁶ Akwa lamar ǝni, ta waima ta 'ya kulɗakur ala zǝrangǝri akwa Kǝrsti, wala bara mwalarni. Thlaku ata hakatsǝni dzǝ nam tara 'ya sanga sǝ yarni, apa tǝ yar kurtaka gha ala gǝri ka ɗǝmnya ala gǝri.

⁷ Kadǝbar Hyal ta kǝga tǝ muri ka mur ndzai ghyǝmbur wɛ ama ka ndzai akwa whal nam nǝr Hyal.

⁸ Kadǝbar ǝni, ndǝ nam tara ngǝla gala ni, dzǝ ta ngǝla ndǝ wɛ ama Hyal nam tara la gǝr Mambǝlǝrni.

⁹ Ata kǝra yiɗǝdzǝr madar mama, yar ta bara ka yar rǝbwa ala gǝri wɛ. Kadǝbar gǝr aka kǝr gǝri ma Hyal hyipti ala gǝri ka gǝri yiɗɛ kǝma gǝri.

¹⁰ Dzǝrkurari ani, ka gǝri yiɗɛ sanga madar mama akwa sanga diyir Makidauniya. Ama yar ada gala tǝ gǝri, madar mama ka gǝri 'ya ahani hang ka hang.

¹¹ Ka gǝri nkǝrti kwakwaliyir gǝri, ka gǝri ndzai aka hankal, ka gǝri dzǝkuti sǝr 'yar gǝri, ba ka kǝthlǝr dzau, apa tǝ yar tsǝlɛ ala gǝri ka gǝr 'ya,

¹² ani ka akwa ndzaiyir gǝri tatang gǝri ata ɓui sǝlai aka ndzǝ nam kura aka mbǝrsa ba ani ka gǝri adi ata bara su aka ndǝ wɛ.

Siyir Thlaku ni

¹³ Madar mama kaka nkwaiyir mama, yar adi ada bara ka gǝri ndzai bǝlku ata kǝra ndzǝ nam tara nti wɛ, wala ka sǝngǝlɛ apa tǝ laka ndzi ada 'ya, apa ndzǝ nam kura aka hau akwa ɗǝfu.

¹⁴ Mur mbǝrsa apǝri Yɛsu nti, ka ɓakta hyati, ani ahani tsuwɛ mur mbǝrsa apǝri Hyal ata si aka ndzǝ nam tara nti akwa dza vwam kaka Yɛsu.

¹⁵ Yar ada nkǝrɛ ala gǝri tsuwɛ, apa tǝ Thlaku tara nkǝrɛ, apǝri muri nam tsu ata mulɛ, tǝ muri nam tsu adai har ka la vǝr nam tǝ Thlaku ata si, muri adi ata lǝkǝma akǝma ndzǝ nam tara nti wɛ.

¹⁶ Kadǝbar Thlaku tǝ kǝrni ma dzǝ ata sǝgǝl atahyal, aka gala nam ngga, ba kuɗahu nǝr nggar ndǝr hyantǝr Hyal, ba tsuwɛ mbǝr tǝmbǝlǝr Hyal, ndzǝ nam tara nti akwa Kǝrsti dar dza ani ata baditsǝni hyati.

¹⁷ Aghǝla ǝnda mur nam tsu aka mpikɛ, tara mbi akwa dunya muri ata tsaɓtsǝnidzi kaka dar akwa dlamba ka ɓui Thlaku ati, ba ani muri ata ndzai kaka Thlaku har kura kurkuri.

¹⁸ Kadǝbar ǝni, ka gǝri dǝnautsǝni kǝma gǝri aka labar yarni.