1 Ndzǝr Tasalaunika 2 - Kibaku NT

Kǝthlǝr Bulusu akwa Tasalaunika

¹ Gǝri zǝndi, madar mama, apǝri mwari yar adzǝ gǝri nda adi ɓǝrtu wɛ.

² Yar kǝ ɗar bwanai akwa tara kwatsǝni ba ngǝngǝlɛ akwa Filibi, apa tǝ gǝri zǝndi, ama Hyal la yar mbwai ɗǝfu ka yar nkǝr ala gǝri labarǝrni nam sǝɗa ata babal, wala apani ndzǝ hang hau tǝ yar akwa bwanai.

³ Kadǝbar labar yar ala gǝri adi ada si aka zǝla wala hal nam kulɗa wala dlǝrpǝkur wɛ.

⁴ Ata vuiya ǝni yar ada labar apa tǝ Hyal ada bara ka yar 'ya, kadǝbar dzǝ nkǝrti tǝ yar ɗaku ka ndǝ mbǝrsa aka labar nam ɗaku. Yar ta nkǝrɛ ka ndzǝ nga sǝɗa wɛ, ama ka Hyal ngati sǝɗa dzǝ nam tara nkǝrti halǝr yar.

⁵ Gǝr zǝndi dzǝri, apǝri yar ta si adzǝ gǝri aka labarǝr zǝla wɛ, wala yar ta mbui sǝ laka akuya ka lambwakur yar wɛ. Hyal dza sakǝidar yar.

⁶ Yar ta nkǝrti ka ɓui hǝmɛ adzǝ ndzǝ wɛ, wala adzǝ ngɛ wala adzǝ ndzǝ laka.

⁷ Apa ndzǝr hyar Kǝrsti yar aka whalɛ nam tǝ yar ata bara su aka gǝri, ama yar aka kanadi akwa ntsa gǝri, apa tǝ mama ada wul madarni nam nkyǝnkyiɗu.

⁸ Kadǝbar yiɗǝdzǝr yar ala gǝri aka dzǝrkur, yar aka kutsari ka yar ndǝghǝi aka gǝri adi ndǝrǝr Hyal nam sǝɗa ni ɗiɗi aka Hyal wɛ ama wala mpikɛ yarɛ. Kadǝbar yar si ka yar yiɗǝ tǝ gǝri!

⁹ Dzǝri gǝr ɗǝngati, madar mama, kǝthlǝr yar aka dzaukur; yar kǝthlǝr vǝri aka tsǝtsi ata vuiya ta yar ta ndzai kǝlɛ ala kǝlara ndɛ ma yar ada nkǝr ndǝrǝr Hyal nam sǝɗa nǝr Hyal ala gǝri.

¹⁰ Gǝri dza sakǝida yarɛ, ba ani ahani Hyal, apǝri 'yar yar akwa ntsa gǝri nam tara mbǝrsa ani kartǝ, kal-kal akǝma Hyal, ba kura aka aibai.

¹¹ Kadǝbar gǝr zǝndi apǝri yar 'ya ala waima akwa ntsa gǝri, apa tǝ tada ada 'ya ala madarni.

¹² Yar ada 'ya kǝlara su ka yar dǝnautsǝni tǝ gǝri ka ndzai akwa whal nam nǝr vǝkǝr sǝlai ala Hyal, ndzǝ nam tara kǝga tǝ gǝri alǝkwa kuhyikurni ba nggakurni.

¹³ Ba yar tsuwɛ yar ada gwaditsǝni ala Hyal kura ngyar-ngyar, kadǝbar sakatǝ gǝri dlutsi ndǝrǝr Hyal, nam tǝ gǝri ngati aka yar, gǝr yiɗɛ tǝni adi apa ndǝrǝr ndzǝ wɛ ama apa tǝ dzǝ dzǝri ani ndǝrǝr Hyal, nam ada kǝthlǝr akwa gǝr ndzǝ nam tara mbǝrsa.

¹⁴ Akuya gǝri, madar mama, gǝri ndzai ndzǝr nuwur ndzǝr nu Hyal akwa Yahudiya, nam akwa Kǝrsti Yɛsu: gǝr ɗar bwanai aka ndzǝr diyir gǝri tsu apa tǝ ndzǝr nu nda tara ɗar bwanai aka ndzǝr Yahudi.

¹⁵ Dar tsai Thlaku Yɛsu kaka nabi yarɛ, ba tsuwɛ kǝdlǝnta tǝ yar. Dar adi ada 'ya sǝ tǝ Hyal ada bara wɛ, dar ani ndzǝr ɓwalnya ala sanga ndzi.

¹⁶ Yar 'ya labar ala ndzǝ nam kura ata zǝndi Hyal kadǝbar ka dar mbatǝdzi, ama dar 'ya ka dar kanti ala yar. Ani ahani kǝlara saka dar ada ghǝiyaba aunar bikǝr dar. Ama sǝwakur ɗǝfa Hyal kǝ ɗǝkǝr ala dar ata dǝnta.

Bulusu Ada Bara ka Dzǝ Wula Ndzǝr Tasalaunika

¹⁷ Madar mama, sakatǝ ndǝ ndǝrnta tǝ yar adzǝ gǝri akwa saka nkyiɗu laka, wala muri adi atakǝmaduku wɛ, ama tsu gǝri akwa ɗǝfa yar. Yar hau akwa ɗǝfa yar ngga dzǝr dzǝri apǝri ka yar wula tǝ gǝri ntsɛ aka ntsɛ,

¹⁸ akwa dzǝrkur yar bara ka yar si adzǝ gǝri. Yi aka kǝrna Bulusu, Yi 'ya kǝi mwari hang ta ka duku, ama Satan kanti ala yar.

¹⁹ Akuya mǝ dza tǝmatsǝniyir muri, kutsariyir muri wala aliyapu nam tǝ muri ata agula akǝma Thlaku Yɛsu sakatǝ dzǝ si? Adi gǝr wɛ?

²⁰ Akwa dzǝrkur, gǝri dza ndzǝr agular yar ba kutsariyir yar!