1 Ndzǝr Kwaranti 9 - Kibaku NT

Sǝ yarɛ tǝ Ndzǝr Hya ata Mǝzi ka 'Ya

¹ Yi adi aka whalǝr 'ya sanga sǝ nam tǝ Hyal ngyar ka Yi 'ya wɛ? Yi adi ndǝr hya wɛ? Yi ta wula Yɛsu Thlakǝr muri wɛ? Adi Yi dza 'ya kǝthlǝrǝr si aka gǝri akwa Thlaku wɛ?

² Ma ndzǝ laka yarɛ ta dlu tǝra apǝri Yi ndǝr hya wɛ ala gǝri kalari Yi ndǝr hya, akuya akwa Thlaku ni gǝr ani nta nam ata tsanti ndǝr hyakurna.

³ Əni ani sǝnawurna ala ndzǝ nam ada yihǝ tǝra.

⁴ Yar adi aka whalɛ tǝ yar awa sǝmɛ ba sa wɛ?

⁵ Yar adi aka whalɛ tǝ yar awa kǝtǝ mwala nam aka hamnta dzǝri ata dǝrba yar wɛ, apa tǝ ndzǝr hya yar damwa ba madar angǝra Thlaku ba Kyafas 'ya?

⁶ Kǝna ɗiɗi yɛ ba Barnabas ani awa 'ya kǝthlǝr kǝ ndzai ntsakǝr akuya ka ndzaiyir yar?

⁷ Wa ani ada 'ya kǝthlǝr saudza tǝ dzǝ ani ada nkyɛ kǝrni? Wa ani ada thlǝka fwakǝr inabi ba kura dzǝ awa kwasǝ munyar inabi yari? Wa ani ada ɓǝla kura dzǝ ada sa u'uwari?

⁸ Yi ada gha ǝni adi ɗiɗi apa tǝ kum aka masi ada wul wɛ. Mabariyir Musa ma gha su tsu apa ǝni.

⁹ Akuya rǝbwa-rǝbwa akwa Mabariyir Musa: “Ta gǝ ta mbunya tsǝmbwam ala nya thla nam ata kǝra tǝ gǝ uhyi.” Ata kǝra thla yarɛ antǝ Hyal damitsǝnidzi ya?

¹⁰ Dzǝri dzǝ ta nkǝr ǝni ka yar wɛ? A, ndǝ rǝbwai ǝni akuya ka yar kadǝbar sakatǝ ndǝr ngǝzi galma ada kukulɛ ba ndǝr tǝgɛ ada tǝgɛ, kal-kal ka dar 'ya akwa tǝmatsǝniyir ɓui su akwa kari fwaku ni.

¹¹ Ma apǝri yar thlǝkati munyar mambǝlɛ akwa ntsa gǝri, 'ya dzau wur-wur ya ma yar ɓui sǝr santar yar aka gǝri?

¹² Ma ndzǝ laka aka whalɛ tǝ gǝri ada mbana tǝ dar, adi yar ani ata 'ya akǝri hang wɛ? Ama yar ta kǝthlǝr aka whal ǝni wɛ. Ata whal pam yar ɓati sanga su kudzǝ ta tǝ yar awa kanti ndǝrǝr Hyal nam sǝɗa nǝr Kǝrsti.

¹³ Gǝr ta zǝndi apǝri ndzǝ nam ada kǝthlǝr akwa fǝr Hyal dar ada ɓui ɗǝvǝr dar akwa fǝr Hyal ni, ba ndzǝ nam ada 'ya kǝthlǝr ata muɓwɛ dar ada ɓui su akwa sǝ nam tǝ ndǝ hamnta ata muɓwɛ ni wɛ?

¹⁴ Tsu akwa whal ǝni Thlaku ni tsau apǝri ndzǝ nam ada nkǝrɛ ndǝrǝr Hyal nam sǝɗa ka dar ɓui sǝr santar dar atar ndǝrǝr Hyal nam sǝɗa ni.

¹⁵ Ama Yi ta kǝthlǝr aka sanga whal ǝni yarni tǝ Yi akǝr ni wɛ. Ba Yi adi ada rǝbwa sǝ ǝni akwa tǝmatsǝni apǝri gǝri ata 'ya alai sǝ yarni wɛ. Kudzǝ ka Yi nti ta tǝ kǝlara ndɛ awa kanti alai agularna ni.

¹⁶ Kwa ahani sakatǝ Yi ada nkǝr ndǝrǝr Hyal nam sǝɗa, Yi adi awa mǝzi ka agula wɛ, akuya ndǝ vǝkǝr alai ka Yi nkǝrɛ. Bwasam alai ma Yi ta nkǝrɛ ndǝrǝr Hyal nam sǝɗa ni wɛ!

¹⁷ Ma Yi nkǝr ndǝrǝr Hyal aka yiɗǝrna, Yi aka wadzǝɓa; ma adi aka yiɗǝrna wɛ Yi ada 'ya kǝthlǝr nam tǝ ndǝ hau akwa tsiyawai ɗiɗi.

¹⁸ Mǝ dzá ani wadzǝɓarna? Ɗiɗi ǝni: apǝri akwa nkǝr ndǝrǝr Hyal nam sǝɗa ni ka Yi hamnta tǝni kura aka nkyɛ, ba ta Yi ta kǝthlǝr aka whal nam tǝ Yi akǝri akwa nkǝr ndǝr ni.

¹⁹ Wala tǝ Yi adi akwa tsiya ndǝ wɛ, Yi mǝrti kǝrna fali ala kǝlara ndɛ, ka Yi si aka ndzǝ hang ala Kǝrsti.

²⁰ Ala ndzǝr Yahudi Yi ndzai apa ndǝr Yahudi, ka si aka ndzǝr Yahudi. Ala ndzǝ nam akwi mabari ni Yi ndzai apa ndɛ akwi mabari (wala ahani Yi tǝ kǝrna Yi adi akwi mabari wɛ), ka Yi si aka ndzǝ nam akwi mabari.

²¹ Ala ndzǝ nam kura aka mabari Yi ndzai apa ndǝ kura aka mabari (wala ahani Yi adi kura aka mabariyir Hyal wɛ ama Yi akwi mabariyir Kǝrsti), ani ka Yi si aka ndzǝ nam kura aka mabari.

²² Ala ndzǝ nam kura dǝna Yi ndzai kura dǝna, ka Yi si aka ndzǝ nam kura dǝna. Yi ndzai sanga su ala sanga ndzi ani ka atar sanga whal nam ata mǝzi ka 'ya ka Yi mbati nakuma dar.

²³ Yi 'ya sanga sǝ yarni akuya ka ata nyar ndǝrǝr Hyal nam sǝɗa, apǝri ka Yɛ kaka ndzǝ nam tara mbǝrsa yarɛ damwa ɓui barkarni.

²⁴ Gǝr ta zǝndi apǝri akwa kǝ abarabara sanga ndzǝr pa whuiyari ada whui, ama ɗiɗi duku ani ada ɓui wadzǝɓa? Whuiyamɛ akwa whal nam apa tǝ gǝri ata ɓui wadzǝɓa.

²⁵ Kǝlara ndɛ nam tara lǝkwa gyali dzǝ ada lǝkwa tsǝlɛ nam dzau. Dar ada 'ya ka dar ɓui aliyapu nam kura ada sǝkar; ama muri ada 'ya tǝni ka ɓui aliyapu nam ada ndzai kura kurkuri.

²⁶ Kadǝbar ǝni Yi adi ada whui apa ndǝ nam ada whui kura ta zǝndi vui dǝntari wɛ; Yi adi ada mpa apa ndǝ laka nam ada tsa sambar wɛ.

²⁷ A á, Yi ada tsa dzawai ba Yi ada mǝrti tǝni ka dzǝ 'ya faliyirna ani ka aghǝla tǝ Yi nkǝr ndǝrɛ ala ndzǝ damwa, Yi tǝ kǝrna ta Yi ta ɗi kura Yi awa ɓui wadzǝɓa.