1 Ndzǝr Kwaranti 5 - Kibaku NT

Haka ata Kǝra Badawikur

¹ Ndɛ ada nkǝrɛ apǝri badawikur adai akwa ntsa gǝri, ba dzǝli su kura ta saga 'ya akwa ntsa ndzǝ nam kura ta zǝndi Hyal ma: Sal ada pi aka mwalar atǝgǝri.

² Ba gǝri ada agula aka kǝr gǝri! Adi kudzǝ tǝ gǝri ada tuwa aka ɗǝfu sǝwa-sǝwa ba ka gǝri kǝlba ndǝ nam tara 'ya sǝ ǝni akwa mwardzǝr gǝri wɛ?

³ Wala ahani adi akwa ntsa gǝri wɛ, akwa mambǝlɛ Yi akwa ntsa gǝri. Ba Yi kurtaka thlanta haka ata kǝra ndǝ nam tara 'ya sǝ ǝni tsu apa ma Yi akwa ntsa gǝri.

⁴ Sakatǝ gǝri tsaɓtsǝnidzi akwa thlǝma Thlakǝr muri Yɛsu ba Yi kaka gǝri akwa mambǝlɛ, ba dǝnar Thlakǝr muri Yɛsu adai,

⁵ lamɛ ndǝ ni ala Satan, ani ka dzǝr biku ni 'yantadzi ba ka mambǝlǝrni ɓui mbatǝdzi ata vǝrǝr Thlaku ni.

⁶ Agular gǝri adi ɗaku wɛ. Gǝr ta zǝndi apǝri thlǝlam nkyiɗu laka ada mbihǝti sang mpwɛ nam tǝ ndǝ hǝrti akǝri wɛ?

⁷ Faba mɛ thlǝlam halhali ni nam tǝ gǝri ata ndzai mpwɛ hǝrhǝri nam bǝlin kura aka thlǝlam—nam ani ndzaiyir gǝri. Akuya Kǝrsti, zǝr agamǝr Wudzǝr Ngǝmbar muri, ndǝ kurtaka 'ya kǝdlǝrsu.

⁸ Kadǝbar ǝni, ngyar ka muri lǝkǝma aka 'ya wudzǝr ni, adi aka thlǝlam halhali ni wɛ, thlǝlamǝr imaikur ba kǝmangarkur, ama aka mantsǝkǝl nam kura aka thlǝlam, mantsǝkǝlǝr nkǝr dzǝri ba dzǝrkur.

⁹ Yi rǝbwai ala gǝri akwa kakadǝrna ta gǝr ta kǝltsǝni kǝr kaka ndzǝr 'ya badawikur—

¹⁰ adi apǝri Yi ada ɗǝnga ndzǝ nam akwa dunya nam ada 'ya badawikur wala lambwakur ba dlǝrpǝkur, wala vǝkǝr sǝlai ala mǝlǝm yarɛ. Ma apǝri apani tar ma gǝri sǝba ka ngyar dunya.

¹¹ Ama kulini Yi ada rǝbwa ala gǝri apǝri kǝ ndzai ntsakǝr ta gǝr ta kǝltsǝni kǝr aka kǝlara ndɛ nam tara ka kǝrni zǝr mama ama dzǝ ada 'ya badawikur wala dzǝ nyanyam, ndǝr vǝkǝr sǝlai ala mǝlǝm wala ndǝr gha ndɛ, mbalma wala ndǝ dlǝrpu. Aka dzǝli ndǝ ǝni ta gǝr ta sǝmɛ akwa kyahǝla.

¹² Sǝr mi tara damitsǝni tǝra tǝ Yi awa thla haka ala ndzǝ nam kura akwa ikǝlizǝya? Adi ala ndzǝ nam akwa ikǝlizǝya ani tǝ gǝri ata thla haka wɛ?

¹³ Hyal ata 'ya haka ala ndzǝ nam abǝla. Apa rǝbwa-rǝbwa, “Kǝdlǝba mɛ ndzǝ nam kǝmangar akwa ntsa gǝri.”