1 Ndzǝr Kwaranti 4 - Kibaku NT

Ndzǝr Hya yarɛ Nǝr Kǝrsti

¹ Ani dzá, kal-kal ka ndzǝ kǝtǝ tǝ yar apa madar kǝiyir Kǝrsti ba apa ndzǝ nam tǝ ndǝ hau akwa tsiya dar sǝ yarɛ nǝr Hyal nam ɗǝwa-ɗǝwa.

² Kadamwa ndɛ ada bara apǝri ndzǝ nam tǝ ndǝ tara hau su akwa tsiya dar kǝ ndzai ntsakǝr ka dar 'ya su aka dzǝrkur.

³ Yi adi aka damitsǝnidzi ɓwal wɛ tǝbwar gǝri ma gǝri wala ɗǝngar ndzi ghyǝnga tǝra ka haka; dzǝri Yi adi ada ghyǝnga kǝrna ka haka wɛ.

⁴ Ɗǝngar ɗǝfawai adi aka aibai wɛ, ama ǝnda ta mǝrti tǝra kura Yi aka aibai wɛ. Thlaku dzǝ ani ndǝr 'ya alai haka.

⁵ Kadǝbar ǝni, ta gǝ 'ya haka ala mima kǝmata sakari; sǝkɛ har si ma Thlaku ni si. Dzǝ ata sǝba akǝri ata babal sǝ nam ɗǝwa-ɗǝwa akwa kuthlɛ ba dzǝ ata tsanǝba sǝ nam akwa ɗǝfa ndzi. Ata saka ǝnda, kǝlara ndɛ ata dlutsi hǝmǝr ni aka Hyal.

⁶ Kulini, madar mama, Yi tsanti sǝ yarɛ ǝni ata kǝrna ba Apaulaus akuya ka paida ala gǝri, ani ka gǝr tsǝli su aka yar ɗǝngar nkǝrɛ apǝri, “Ta gǝ ta mwari abǝla kǝma Labar Hyal.” Antǝ gǝ adi ata agula akwa ndǝ duku ata kǝra kǝmani wɛ.

⁷ Akuya wa tara mǝrti tǝngɛ pam ta kǝlara ndǝ damwa? Sǝr mi tǝ gǝ akǝri nam kura gǝ ta dludluwɛ? Ba ma gǝ dludluwɛ, kami tǝ gǝ ada agula apa gǝ ta dludluwɛ?

⁸ Gǝri kurtaka ɓui sanga su tǝ gǝri bara! Gǝri kurtaka ndzai bǝrba! Gǝri kurtaka ndzai kuhyi yarɛ—ba ǝnda yar adi akwa wɛ! Yi yiɗɛ dzǝri tǝ gǝri 'ya kuhyi yarɛ ani ka yar ndzai kuhyi yarɛ kaka gǝri!

⁹ Akuya Yi ada wulɛ apǝri Hyal pui tǝ yar ndzǝr hya yarɛ ata dǝntar lai ka tsan tǝ yar apa ndzi tǝ ndǝ thlanta ala dar hakar nti. Ndǝ mǝrti tǝ yar sǝr wulɛ ala dunya sang, ala ndzǝr hyantǝr Hyal yarɛ ba ala ndzi sang.

¹⁰ Yar ndzai dlang akuya ka Kǝrsti, ama gǝri bǝrkawa akwa Kǝrsti! Yar kura dǝna, ama gǝr aka dǝna! Gǝr aka sǝlai, yar adi aka sǝlai wɛ!

¹¹ Har ka la saka ǝni yar aka mi ba thlǝlai, yar ada ha dina, ndɛ ada 'ya ala yar kulɗakur, yar adi aka kǝi wɛ.

¹² Yar ada 'ya kǝthlǝr dzau aka tsiya yar. Sakatǝ ndɛ ada ngǝngǝl tǝ yar, yar ada vǝkǝr barka ala ndɛ; sakatǝ ndɛ ada la yar bwanai, yar ɓati tǝni;

¹³ sakatǝ ndǝ ada gha sǝ kulɗa ata yar, yar ada sǝnau tǝ hankal. Har ka la saka ǝni yar kǝ ndzai ghyǝmbur ala dunya, humbǝkǝr dunya ni.

¹⁴ Yi adi ada rǝbwa sǝ ǝni ka hau tǝ gǝri akwa sǝlai wɛ ama ka gala tǝ gǝri, apa madarna tǝ Yi yiɗɛ.

¹⁵ Akuya tǝ gǝri aka ndzǝr wul tǝ gǝri kumthlani kumɛ akwa Kǝrsti, gǝr adi aka tada yarɛ hang wɛ, akuya akwa Kǝrsti Yɛsu Yi dza ndzai tada gǝri atar ndǝrǝr Hyal nam sǝɗa.

¹⁶ Ani ka ǝni, Yi kǝgyǝ tǝ gǝri ka gǝri nuwɛ sǝr 'yarna.

¹⁷ Akuya ka ǝni Yi ada hya tǝ gǝri ala Timathlawus, zǝrna nam tǝ Yi yiɗɛ, nam aka dzǝrkur akwa Thlaku ni. Dzǝ ata ɗǝngati ala gǝri whal nam tǝ Yi ada ndzai akwa Kǝrsti Yɛsu, nam tara si kal-kal aka sǝ nam tǝ Yi ada hyipɛ kǝlara vui akwa kǝlara ikǝlizǝya.

¹⁸ Nakuma gǝri kǝ 'ya kǝngɛ, apa Yi adi ata si adzǝ gǝri wɛ.

¹⁹ Ama Yi ata si adzǝ gǝri kura aka santa saka, ma Thlaku yiɗɛ, antǝ Yi ata ɓui adi ɗiɗi whal tǝ ndzǝ kǝngɛ yarɛ ni ada ndǝrɛ akwa wɛ, ama dǝna madi tǝ dar akǝri.

²⁰ Akuya kuhyikur Hyal ni adi labar tǝ nya ɗiɗi wɛ, ama aka dǝna.

²¹ Sǝ madi tǝ gǝri yiɗɛ? Ka Yi si aka kwangyang, kǝna akwa yiɗǝdzi ba aka mambǝlǝr kanadi?