1 Ndzǝr Kwaranti 2 - Kibaku NT

¹ Sakatǝ Yi tara si adzǝ gǝri, madar mama, Yi adi si aka sǝɗakur kuɗahɛ wala bǝrkawakur wɛ apa tǝ Yi nkǝrnta ala gǝri ndǝrɛ ata kǝra Hyal.

² Akuya Yi hau akwa ɗǝfawai kura Yi awa zǝndi mima akwa ntsa gǝri ɗiɗi Yɛsu Kǝrsti ba tǝ ndǝ kukwanta tǝni.

³ Yi si adzǝ gǝri akwa kura dǝnakur ba hyivǝr, ba aka yakatsǝnidzi hang.

⁴ Ndǝrǝrna ba labar nam tǝ Yi ada nkǝrɛ adi aka masǝkukur labar ba labar bǝrkawakur wɛ, ama aka tsanti dǝnar Mambǝlǝr Hyal,

⁵ ani ka ta hamnta dzǝrǝr gǝri ta ndzai ata bǝrkawakur ndzi, ama ka dzǝ ndzai akwa dǝnar Hyal.

Bǝrkawakur Hyati aka Mambǝl Kartǝ

⁶ Kulini yar ada nkǝrɛ labar nǝr bǝrkawakur akwa ntsa ndzǝ nam tara kǝlí akwa hamnta dzǝri, ama adi bǝrkawakur nǝr zaman ǝni wɛ wala nǝr kuhyi yarɛ nǝr zaman ǝni wɛ nam ata siya 'ya sǝ ɓǝrtu.

⁷ A'a, yar ada ndǝrɛ ata kǝra bǝrkawakur Hyal nam ɗǝwa-ɗǝwa, bǝrkawakur nam tǝ ndǝ ɗǝwar ba tǝ Hyal vi akuya ka la muri nggakur kǝmata baditsǝniyir dunya,

⁸ duku akwa ntsa kuhyi yarɛ nǝr zaman ǝni tara zǝndi adi wɛ, ma dar kara zǝndi, dar adi ata kukwanta Thlaku nǝr nggakurni wɛ.

⁹ Ama apa rǝbwa-rǝbwa, “Sǝ nam kura ntsɛ ta wula, thlǝmɛ adai ta ngati wɛ, Ɗǝfu adai tara kwamtsǝni wɛ, Sǝ nam tǝ Hyal tara ɗǝmhǝi akuya ka ndzǝ nam tara yiɗǝ tǝni”—

¹⁰ Ama Hyal tsanǝba tǝni ala yar tǝ mambǝlǝrni. Mambǝl ni ada wula ba zǝndi sanga su, wala sǝ yarɛ ɗǝwa-ɗǝwa pǝɗǝm alǝghǝl nǝr Hyal.

¹¹ Akuya wa akwa ntsa ndzǝ nam tara zǝndi ɗǝngar ndɛ ɗiɗi mambǝlǝr ndari nam akwa dzá? Tsu apa ǝni ndɛ adai nam tara zǝndi ɗǝngar Hyal wɛ ɗiɗi Mambǝlǝr Hyal.

¹² Muri ta dlu mambǝlǝr dunya wɛ ama Mambǝl nam tara hyati adzǝ Hyal nam tǝ muri ata ngaba sǝ yarɛ nam tǝ Hyal tara la muri ɓǝrtu.

¹³ Antǝ sǝ nam tǝ yar ada nkǝrɛ, adi akwa ndǝrɛ nam tǝ ndǝ tsǝlɛ ala yar tǝ bǝrkawakur ndǝ wɛ ama akwa ndǝr yarɛ nam tǝ Mambǝl ni hyipɛ ala yar; yar ada nkǝrba sǝ yarɛ nǝr mambǝlɛ ala ndzǝ nam akwa mambǝlɛ.

¹⁴ Ndǝ nam kura aka Mambǝl ni dzǝ adi ada dlu sǝ yarɛ nam tǝ Mambǝlǝr Hyal tara si akǝri wɛ, akuya dar sǝr dlangkur alari, ba dzǝ adi awa mǝzi ka ngaba tǝ dar wɛ, kadǝbar ndɛ ada ghyǝnga ka ngaba tǝ dar ɗiɗi aka mbanar Mambǝlǝr Hyal.

¹⁵ Ndǝ nam aka mambǝlɛ ada nkǝrba haka nam ata kǝra sanga sǝ yarɛ, ama dzǝ tǝ kǝrni ndǝr mǝzi 'yati alari haka adi wɛ:

¹⁶ “Akuya wa tara zǝndi sǝ nam tǝ Thlaku ada ɗǝnga nam tǝ dzǝ awa gala tǝni?” Ama yar zǝndi ɗǝngar Kǝrsti.