1 Ndzǝr Kwaranti 16 - Kibaku NT

Tsǝm Su ala Ndzǝr Hyal

¹ Kulini ata kǝra tsǝm su akuya ndzǝr Hyal: 'yamɛ sǝ nam tǝ Yi gha ala ikǝlizǝya yarɛ nǝr Galatiya ka dar 'ya.

² Ata vǝr nam tang akwa kǝlara kasuku, kǝlara ndɛ akwa ntsa gǝri ka dzǝ vi sǝ laka tǝ ngwam, apa tǝ dzǝ ada ɓui, ani ka sakatǝ Yi si kura awa ndzai kǝ ndzai ntsakǝr ka ndǝ tsǝm su.

³ Antǝ, sakatǝ Yi si, Yi ata la gǝri kakadu yarɛ nǝr nkǝrba ndɛ ala sǝli nam tǝ gǝri ata tsarba ka hya tǝ dar aka sǝgar gǝri atǝra akwa Ursalima.

⁴ Ma apǝri kǝ ndzai kal-kal alai yɛ ka Yi mwari, yar ata mwari kaka dar.

Ɗǝmhǝdzi ka Buraburá

⁵ Aghǝla tǝ Yi mwari ka kwatsǝni akwa Makidauniya, Yi ata si adzǝ gǝri—akuya Yi ata tǝra ata Makidauniya.

⁶ Tar Yi ata ɗar ndzai kaka gǝri, wala Yi ata kurai sakar lang-lang, ani ka gǝri mbana tǝra akwa buraburarna, kǝlara vui nam tǝ Yi ata lǝkwa.

⁷ Yi ta bara ka Yi wula tǝ gǝri kulini ba ka Yi ngwatiya kwatsǝni wɛ; Yi ada tǝmatsǝni ka Yi santa saka kaka gǝri ma Thlaku lai whalɛ.

⁸ Ama Yi ata ndzai akwa Afisa har vǝr Pɛntǝkus,

⁹ kadǝbar nyavǝrǝr kǝthlǝr ngga mburntadzi alai, ba ndzǝ hang adai nam ada kanti alai whalɛ.

¹⁰ Ma Timathlawus si, ka gǝri wuti apǝri ta sǝr hyivǝr ta ɓui tǝni sakatǝ dzǝ kaka gǝri, akuya dzǝ ada lǝkǝma aka kǝthlǝr nǝr Thlaku, tsu apa Yɛ.

¹¹ Ta ndɛ wala duku ta ngǝla dlu tǝni. Pwartamɛ tǝni aka lapiyakur ani ka dzǝ ɓakta si ɓui tǝra. Yɛ ada sǝkǝ tǝni vwam kaka madar mama.

¹² Kulini ata kǝra zǝr mama muri Apaulaus: Yi gala tǝni aka dǝna ka dzǝ mwari adzǝ gǝri kaka madar mama yarni. Dzǝ ta bara ka dzǝ mwari kulini wɛ, ama dzǝ ata mwari sakatǝ dzǝ ɓui whalɛ.

¹³ Ɓǝlamɛ kǝr gǝri; hyatamɛ ɓaɓal akwa hamnta dzǝri; ndziyamɛ aka dǝna; ka gǝr 'ya ɓaɓal.

¹⁴ 'Yamɛ sanga su akwa yiɗǝdzi.

¹⁵ Gǝr zǝndi ata kǝra Istafanus ba yalǝrni; dar dza nam tangkǝma tara mbǝrsa aka Thlaku akwa Akaya ba dar hamnta kǝr dar ala kǝthlǝr ndzǝr Hyal. Yi kǝgyǝ tǝ gǝri, madar mama kaka nkwaiyir mama,

¹⁶ ka gǝr kǝlǝngkǝr ala ndzi apa ǝni ba kǝlara ndɛ damwa nam ada kǝthlǝr ba 'ya su kaka dar.

¹⁷ Yi ada kutsari ata kǝra siyir Istafanus, Fatunatus, ba Akaikus; dar ani tara hamnta mbana nam kura gǝri ta ɓui ka 'ya alai.

¹⁸ Akuya dar la dǝna ala mambǝlǝrna ba nǝgǝri yɛ. Dzǝli ndzǝ ǝni ka mur ɗǝngati tǝ dar.

Thlawardzi nǝr Dǝnta

¹⁹ Ikǝlizǝya yarɛ nǝr diyir Asiya dar ada thlawar tǝ gǝri. Akila ba Pǝrsila ba ikǝlizǝya yarɛ nam ada tsaɓtsǝnidzi ahar dar, dar ada thlawar tǝ gǝri ɗa-ɗa akwa Thlaku.

²⁰ Sanga madar mama nam akwani ada hyanti thlawardzi ala gǝri. Ka gǝri thlawar kǝma gǝri aka yiɗǝdzǝr Kǝrsti.

²¹ Yɛ, Bulusu, Yi dza rǝbwa thlawardzi ǝni aka tsiyawai.

²² Ma kǝlara ndǝ nam kura ada yiɗɛ Thlaku—ka Hyal kǝlnta barkarni. Si, ya Thlaku!

²³ Ka ɗakur Thlaku Yɛsu ka dzǝ ndzai adzǝ gǝri.

²⁴ Yiɗǝdzǝrna ala gǝr sang akwa thlǝma Kǝrsti Yɛsu. Apani.