1 Ndzǝr Kwaranti 14 - Kibaku NT

Sǝ Gar nabikur ba Ndǝrɛ akwa Nya Pam-pam

¹ Nu whalǝr yiɗǝdzi ba ka gǝri bara aka ufti sǝga yarɛ nǝr mambǝlɛ, apamá sǝgar 'ya nabikur.

² Akuya kǝlara ndǝ nam ada ndǝrɛ akwa nya laka dzǝ adi ada ndǝrɛ ala ndzi wɛ ama ala Hyal. Dzǝri, ndɛ adai nam tara ngaba sǝ tǝ dzǝ gha wɛ; dzǝ ghaba dzǝri ɗǝwa-ɗǝwa yarɛ tǝ mambǝlǝrni.

³ Ama kǝlara ndǝ nam tara 'ya nabikur dzǝ ndǝrɛ ala ndzi akuya ka kǝlati tǝ dar, dǝnautsǝni tǝ dar ba sǝkǝtǝ ɗǝfa dar.

⁴ Ndǝ nam ada ndǝrɛ akwa nya pam-pam dzǝ ada kǝlati kǝrni ɗiɗi, ama ndǝ nam tara 'ya nabikur dzǝ ada kǝlati ikǝlizǝya.

⁵ Yi ada bara ka sanga gǝri ndǝrɛ akwa nya pam-pam, ama Yi ada bara kudzǝ ka gǝr 'ya nabikur. Ndǝ nam tara 'ya nabikur dzǝ ɓwalta ndǝ nam ada ndǝrɛ akwa nya pam-pam, tar ma dzǝ nkǝrba akwa nya tǝ ndzi zǝndi, ani ka ikǝlizǝya ɓui kǝlí akwa hamnta dzǝri.

⁶ Kulini, madar mama, ma Yi si adzǝ gǝri ba Yi ada ndǝrɛ akwa nya pam-pam, mǝni ɗakurna ala gǝri, tar ma Yi si akǝri ala gǝri sǝ nam tara tsantǝdzi wala zǝndi su wala nabikur wala labar gala?

⁷ Wala sǝ nam kura aka mpikɛ yarɛ ma nam ada tuwa, apa sala wala zǝmbǝlɛ, mǝmi tǝ gǝ awa zǝndi kuɗahu nam tǝ ndɛ ada tsa? Tar ma pampamkur kuɗahu yarni adai.

⁸ Kadamwa, ma tǝmbǝl ni ta tuwa ka kǝga su tǝ ndǝ ngati wɛ, wa ani ata ɗǝmhǝdzi ka mpa?

⁹ Ani ahani aka gǝri. Tar ma gǝ nkǝr labar nam tǝ ndǝ ada ngati aka nya gǝ mai, mǝmi tǝ ndɛ awa zǝndi sǝ nam tǝ gǝ ada gha? Ata 'ya apa gǝ ada ndǝrɛ akwa sambar.

¹⁰ Akwa dunya ni nya pam-pam hang adai, ama wala duku nam kura aka ɗǝnga adi wɛ.

¹¹ Ma dzá Yi ta ngaba nya nam tǝ ndǝ laka ada gha wɛ, Yi ata 'ya mǝthlǝɓi ala ndǝ nam ada ndǝrɛ ni, ba dzǝ ata 'ya mǝthlǝɓi alai.

¹² Ani ahani aka gǝri. Tǝng tǝ gǝri ada bara ka gǝr ɓui sǝga yarɛ nǝr mambǝlɛ, 'yamɛ ka gǝr ɓui sǝgar sǝ nam ata kǝlati ikǝlizǝya akwa hamnta dzǝri.

¹³ Akuya ka ǝni kǝlara ndǝ nam ada ndǝrɛ akwa nya pam-pam ka dzǝ 'ya aduwa apǝri ka dzǝ zǝndi ka ghaba sǝ nam tǝ dzǝ nkǝrɛ.

¹⁴ Akuya ma Yi 'ya aduwa akwa nya, mambǝlǝrna 'ya aduwa, ama hankalawai ta zǝndi sǝ nam tǝ Yi gha wɛ.

¹⁵ Ani mi tǝ Yi ata 'ya? Yi ata 'ya aduwa aka mambǝlǝrna, ama Yi ata 'ya aduwa aka hankalawai yɛ; Yi ata ha aka mambǝlǝrna, ama Yi ata ha aka hankalawai yɛ.

¹⁶ Ma apǝri gǝ ada hǝm Hyal aka mambǝlǝr ngɛ, mǝmi tǝ ndǝ nam kura ta zǝndi awa nkǝrɛ “Apani” ala gwaditsǝniyir ngɛ, tǝng tǝ dzǝ ta zǝndi sǝ yarɛ nam tǝ gǝ ada gha wɛ?

¹⁷ Gɛ ata mǝzi ka 'ya gwaditsǝni kal-kal, ama ndǝ ǝnda ni dzǝ ta ɓui kǝlí akwa hamnta dzǝri wɛ.

¹⁸ Yi gwaditsǝni ala Hyal nam tǝ Yi ada ndǝrɛ akwa nya pam-pam hang ta gǝri sang.

¹⁹ Ama akwa ikǝlizǝya kudzǝ ka Yi gha labar nya ntufu nam tǝ ndɛ ada ngati ka gala ndzǝ damwa ta labar nya kumthlani kumɛ akwa nya pam-pam.

²⁰ Madar mama, ngyaramɛ ɗǝnga apa madausai. Tǝbwar 'ya su kulɗa ka gǝri ndzai mbǝghyiwa, ama akwa ɗǝnga ka gǝri ndzai ndǝ ngga.

²¹ Akwa mabari rǝbwa-rǝbwa, “Atar sǝli nam aka nya nam kura ndǝ ta zǝndi ba atar kutsǝr nya mǝthlǝɓi yarɛ Yi ata ndǝrɛ ala ndzǝ ǝni, ama wala ahani dar adi ata sǝthlǝmɛ alai wɛ,” ndǝ Thlaku.

²² Nya pam-pam, dzá, dar sǝr parsu, adi ka ndzǝ nam aka mbǝrsa wɛ ama ka ndzǝ nam kura aka mbǝrsa; nabikur tsu dzá, ka ndzǝ nam aka mbǝrsa, adi ka ndzǝ nam kura aka mbǝrsa wɛ.

²³ Ani ma apǝri ikǝlizǝya si atakǝmaduku ba sanga ndɛ ada ndǝrɛ akwa nya pam-pam, ba ndzǝ nam kura akwa ikǝlizǝya wala ndzǝ nam kura aka mbǝrsa yarɛ laka sǝngui akwa ntsa gǝri, dar adi ata nkǝrɛ apǝri gǝri adi akwa hankala gǝr wɛ?

²⁴ Ama ma ndǝ nam kura aka mbǝrsa wala ndǝ nam kura akwa ikǝlizǝya sǝngui akwa ntsa gǝri ama kǝlara ndɛ ada 'ya nabikur, labar yarɛ nam tǝ dzǝ ngati ata tsanti alari apǝri dzǝ ndǝr biku ba sǝ yarɛ nam tǝ dzǝ ngati ata thlanta alari haka,

²⁵ ba sǝ nam akwa ɗǝfari ata sǝba ata babal. Ani dzǝ ata dla ka vǝkǝr sǝlai ala Hyal, ka nkǝrɛ, “Dzǝri Hyal akwa ntsa gǝri!”

Vǝkǝr Sǝlai ala Hyal nam akwa Whalari

²⁶ Mǝ dzá tǝ muri awa nkǝrɛ, madar mama? Sakatǝ gǝr si atakǝmaduku, kǝlara ndɛ aka ha rǝbwa-rǝbwa, wala labarǝr gala, sǝ nam tara tsantǝdzi, labar akwa nya pam-pam wala nkǝrba. Sanga sǝ ǝni yarni kǝ ndzai ntsakǝr ka ndǝ 'ya tǝ dar akuya ka kǝlati ikǝlizǝya.

²⁷ Ma kǝlara ndɛ ata ndǝrɛ akwa nya laka, ndzǝ sǝɗɛ—wala hangkur ni yɛ ndzǝ makǝr—ani ata ndǝrɛ, tǝ duku tǝ duku, ba kǝ ndzai ntsakǝr ka ndǝ laka nkǝrba sǝ nam tǝ dar nkǝrɛ.

²⁸ Ma ndǝr nkǝrba adi wɛ, ndǝr ndǝrɛ aka nya pam-pam ka dzǝ ndzai kǝɗǝk akwa ikǝlizǝya ba ka dzǝ ndǝrɛ ala kǝrni ba Hyal.

²⁹ Nabi yarɛ sǝɗɛ wala makǝr ani ata ndǝrɛ, ba nakumari ka dar dzamba tǝ hankal sǝ nam tǝ ndǝ gha.

³⁰ Ba ma sǝ nam tara tsantǝdzi si ala ndǝ laka nam ada ndzai, ndǝ nam ada ndǝrɛ kǝmani ka dzǝ ngyar.

³¹ Akuya gǝri sang ata mǝzi ka 'ya nabikur pǝgǝla-pǝgǝla ani ka kǝlara ndɛ ata ɓui gala ba dǝnautsǝnidzi.

³² Mambǝl yarɛ nǝr nabi yarɛ dar akur dǝnar nabi yarari.

³³ Akuya Hyal dzǝ adi Hyalǝr bǝlkǝtsǝni su wɛ ama dzǝ nǝr ndzai lapiyakur. Apa akwa sanga tsaɓtsǝnidzǝr ndzǝr Hyal,

³⁴ mwahyi ka dar ndzai kǝɗǝk akwa ikǝlizǝya yarɛ. Ndǝ ta ngyar tǝ dar ka dar ndǝr wɛ, ama kǝ ndzai ntsakǝr ka dar kǝlǝngkǝr, apa tǝ mabari nkǝrɛ.

³⁵ Ma dar ada bara yu sǝ laka, ka dar yu salǝr dar yarɛ aivi; akuya sǝr sǝlai ala mwala ka dzǝ ndǝrɛ akwa ikǝlizǝya.

³⁶ Ká ndǝrǝr Hyal ni baditsǝni aka gǝr ya? Kǝna gǝr ɗiɗi ani ndzǝ nam tǝ dzǝ tsǝbti?

³⁷ Ma kǝlara ndɛ ada ɗǝnga apǝri dzǝ nabi wala dzǝ aka sǝga nǝr mambǝlɛ ngyar ka dzǝ zǝndi apǝri sǝ tǝ Yi ada rǝbwa ala gǝrni ani tsawur Thlaku.

³⁸ Ama ma dzǝ ngǝla vǝdzǝ hankal, dzǝ tǝ kǝrni ndɛ adi ata ɗǝnga tǝni wɛ.

³⁹ Kadǝbar ǝni, madar mama, ka gǝr bara 'ya nabikur, ba ta gǝr ta ngǝla ndǝrɛ akwa nya pam-pam.

⁴⁰ Ama sanga su ka ndǝ 'ya akwa whal nam kal-kal tara ndzai.