1 Ndzǝr Kwaranti 13 - Kibaku NT

Yiɗǝdzi

¹ Ma Yi ada mǝzi ka ndǝrɛ akwa nya yarɛ nǝr ndzi ba nǝr ndzǝr hyantǝr Hyal, ama Yi adi aka yiɗǝdzi wɛ, Yi ada 'ya nya apa tuwar yang tǝ ndɛ ada tsa wala tuwar kararau.

² Ma Yi aka sǝgar nabikur ba Yi ada zǝndi sanga dzǝri ɗǝwa-ɗǝwa ba sanga zǝndi su, ba ma Yi aka hamnta dzǝri nam ada mǝzi ka mbǝyanta paya yarɛ, ama Yi adi aka yiɗǝdzi wɛ, Yi adi mima wɛ.

³ Ma Yi hamnta sanga sǝ nam tǝ Yi akǝri ala ndzǝ nam ngudi ba ma Yi hamnta kǝrna ka ndǝ mbanta, ama Yi adi aka yiɗǝdzi wɛ, ta 'ya alai paidar mima wɛ.

⁴ Yiɗǝdzi ani kǝmar, yiɗǝdzi ani hankal. Dzǝ adi ada vǝ ndǝ wɛ, dzǝ adi ada agula wɛ, dzǝ adi ada haɓǝkǝr wɛ.

⁵ Dzǝ adi kura hankal wɛ, dzǝ adi ada bara si nǝni wɛ, ɗǝfari adi ada sǝwa sam wɛ, dzǝ adi ada ngǝzi su kulɗa akwa ɗǝfu wɛ.

⁶ Yiɗǝdzi adi ada kutsari ala 'ya su kulɗa wɛ ama dzǝ ada kutsari aka dzǝrkur.

⁷ Yiɗǝdzi adi ada sǝkur su wɛ, dzǝ ada mbǝrsa aka sanga su, dzǝ ada tǝmatsǝni sanga su, dzǝ ada ɓati sanga su.

⁸ Yiɗǝdzi adi ada kuri wɛ. Ama ma nabikur yarɛ adai, dar ata kuri! Ma ndǝrɛ akwa nya yarɛ pam-pam adai, dar ata kuri; ma zǝndi su adai, ata kwatsǝni atǝra.

⁹ Akuya mur ta zǝndi su sang wɛ ba muri adi ada 'ya nabikur ata kǝra su sang wɛ,

¹⁰ ama sakatǝ sǝ nam ghǝi-ghǝi ni si, sǝ nam kura ghǝi-ghǝi ni ata santadzi.

¹¹ Sakatǝ Yi waza, Yi ada ndǝrɛ apa waza, Yi ada ɗǝnga su apa waza, Yi ada kwamtsǝni su apa waza. Sakatǝ Yi 'ya ndǝ ngga, Yi ngyar 'ya su apa waza aghǝlawai.

¹² Kulini muri ada wula parsu ama mbalmbali apa akwa kutǝram; muri ata siya wula tǝni ntsɛ aka ntsɛ. Kulini bwadukwa sǝ yari ɗiɗi ani tǝ Yi zǝndi; ama Yi ata siya zǝndi sang-sang, tsu apa tǝ Hyal zǝndi tǝra sang-sang.

¹³ Ba kulini sǝ yarni makǝr ni ata ndzai kura kurkuri: hamnta dzǝri, tǝmatsǝni, ba yiɗǝdzi. Ama nam ngga ta sang akwa ntsa dar ani yiɗǝdzi.