1 Ndzǝr Kwaranti 12 - Kibaku NT

Sǝga yarɛ nǝr Mambǝlɛ

¹ Kulini ata kǝra sǝga yarɛ nǝr mambǝlɛ, madar mama, Yi adi ada bara ka gǝri ndzai kura aka zǝndi wɛ.

² Gǝr zǝndi apǝri saka nam tǝ gǝr kura ta zǝndi Hyal, ndǝ zǝlanta tǝ gǝri ala mǝlǝm nam kura ada ndǝrɛ.

³ Kadǝbar ǝni Yi gha ala gǝri apǝri ndɛ adi wɛ nam ada ndǝrɛ aka Mambǝlǝr Hyal awa nkǝrɛ, “Futu barkar Yɛsu,” ba ndɛ adi wɛ awa nkǝrɛ, “Yɛsu ani Thlaku,” tar ma dzǝ aka Mambǝl Kartǝ.

⁴ Sǝga yarɛ dzǝli pam-pam adai, ama mambǝl duku.

⁵ Kǝthlǝr mbana dzǝli pam-pam adai, ama Thlaku duku.

⁶ Sǝr 'ya dzǝli pam-pam adai, ama Hyal duku ani ada 'ya tǝ dar akwa sanga ndzi.

⁷ Hyal ada tsanti Mambǝlǝrni akwa whal laka ala kǝlara ndɛ akuya ka ɗakur ala sanga ndzǝ yarɛ nam aka mbǝrsa.

⁸ Ala ndǝ laka ndǝ hamnta atar mambǝlǝr bǝrkawakur, ala ndǝ laka ndǝ lari zǝndi su tsu atar mambǝlɛ nda,

⁹ ala ndǝ damwa hamnta dzǝri tsu mambǝl nda, ala ndǝ damwa sǝgar mbǝti ndɛ atar mambǝlɛ nda duku,

¹⁰ ala ndǝ damwa dǝna yarɛ nǝr 'ya sǝr ndati, ala ndǝ damwa nabikur, ala ndǝ damwa zǝndi mambǝlɛ yarɛ pam-pam, ala ndǝ damwa ndǝrɛ akwa nya pam-pam, ba tsu ala ndǝ damwa ghaba nya yarɛ.

¹¹ Sanga sǝ yarni kǝthlǝr mambǝlɛ duku, ba dzǝ hamnta tǝ dar ala kǝlara ndɛ, apa tǝ dzǝ yiɗɛ.

Dzɛ Duku, aka Palai yarɛ Hang

¹² Dzǝ ni dzǝ duku, wala ahani ndǝ mǝrti tǝni aka palai yarɛ hang; ba wala ahani sanga palai yarni hang ni, dar mǝrti dzǝ duku. Ani ahani aka Kǝrsti.

¹³ Akuya mur sang ndǝ 'ya ala muri bamtizǝma tǝ mambǝl duku alǝkwa dzǝ duku—wala ndzǝr Yahudi wala Gǝriku yarɛ, fali wala kambɛ—ba muri sang ndǝ la muri mambǝl duku ni tǝ mur sa.

¹⁴ Kulini dzǝ ni Hyal ta mǝrti bwa duku wɛ ama bwa hang.

¹⁵ Ma thlǝlɛ ata nkǝrɛ, “Kadǝbar Yi adi tsai wɛ, Yi adi nǝr dzǝ ni wɛ,” akuya ka sǝ tǝ dzǝ nkǝr ni ta mǝrti tǝni kura dzǝ bwa akwa dzǝ ni wɛ.

¹⁶ Ba ma thlǝmɛ ata nkǝrɛ, “Kadǝbar Yi adi ntsɛ wɛ, Yi adi nǝr dzǝ ni wɛ,” adi ata 'ya akuya ka sǝ tǝ dzǝ nkǝrɛ ni ta mǝrti tǝni kura dzǝ bwa akwa dzǝ ni wɛ.

¹⁷ Ma apǝri sanga dzǝ ni 'ya ntsɛ, ndɛ awa ngati su tǝ mi? Ma apǝri sanga dzǝ ni 'ya thlǝmɛ, ndɛ awa thla sǝwur su tǝ mi?

¹⁸ Ama dzǝri Hyal dza ɗǝmhǝi palai akwa dzǝ ni, kǝlara duku akwa ntsa dar, 'ya apa tǝ dzǝ ada bara ka dar ndzai.

¹⁹ Ma apǝri dar sang bwa duku, dzǝ ni ata ɓuidzi ama?

²⁰ Apa ndziyirni ni, palai hang adai, ama dzǝ duku.

²¹ Ntsɛ adi awa mǝzi ka gha ala tsai, “Yi adi ada bara tǝngɛ wɛ!” Ba kǝr adi awa mǝzi ka gha ala thlǝlɛ, “Yi adi ada bara tǝngɛ wɛ!”

²² Pam ta ǝni, palai yarɛ nǝr dzǝ ni nam tǝ ndǝ ada wulɛ apǝri paidar dar nkyiɗu ni dar ani tǝ ndǝ ada bara wur-wur,

²³ ba bwa yarɛ nam tǝ muri ada ɗǝnga apǝri sǝlaiyir dar nkyiɗu muri ada vǝkǝr ala dar sǝlai nam ngga. Ba bwa yarɛ nam kura ndɛ ada tsanɛ akwa ntsa ndɛ muri ada mbui tǝ dar akwa whal nam ɗaku,

²⁴ ama bwa yarɛ nam tǝ muri ada tsanɛ dar adi ada bara dzǝgu nam dzau wɛ. Ama Hyal thlǝkǝti palai yarɛ nǝr dzǝ ni ba dzǝ ka la sǝlai ngga ala bwa yarɛ nam kura akǝri,

²⁵ ani ka ta ndǝghǝ nya ta 'ya akwa dzǝ ni, ama ka palai yarni 'ya aka damitsǝnidzi kal-kal ka kǝma dar.

²⁶ Ma bwa pathlu akwa bwanai kǝlara bwa ada ɗar bwanai kaka dza; ma bwa pathlu ɓui hǝmɛ kǝlara bwa ada kutsari kaka dza.

²⁷ Kulini gǝri ani dzá Kǝrsti ni, ba kǝlara dukwa gǝri bwa akwa dzarni.

²⁸ Ba akwa ikǝlizǝyar Hyal dzǝ vi tangkǝma ndzǝr hya yarɛ, sǝɗǝkur nabi yarɛ, makǝrkur malǝm yarɛ, antǝ ndzǝr kǝthlǝr sǝr ndati yarɛ, tsuwɛ ndzǝ nam aka sǝgar mbǝti ndǝ yarɛ, ndzǝ nam ada mǝzi ka mbana ndzǝ damwa yarɛ, ndzǝ nam aka sǝga yarɛ nǝr kǝthlǝr pwar ndzi, ba ndzǝ nam ada ndǝrɛ akwa nya yarɛ pam-pam.

²⁹ Sanga muri adi ndzǝr hya yar wɛ. Sanga muri adi nabi yar wɛ. Sanga muri adi malǝm yar wɛ. Sanga muri adi ada 'ya sǝr ndati wɛ.

³⁰ Sanga muri adi aka sǝgar mbǝti ndǝ wɛ. Sanga muri adi ada ndǝrɛ akwa nya pam-pam wɛ. Sanga muri adi ada zǝndi ka nkǝrba nya pam-pam wɛ.

³¹ Ani dzá baramɛ ka gǝri ɓui sǝga nam ɗa. Ba kulini Yi ata tsanti ala gǝri whal nam ɗaku ta sang.