1 Ndzǝr Kwaranti 11 - Kibaku NT

¹ Nuwamɛ whalǝrna apa tǝ Yi ada nu whalǝr Kǝrsti.

Tsanǝ Hal nam Kal-kal akwa Vǝkǝr Sǝlai

² Yi hǝm tǝ gǝri akuya gǝr ɗǝngati tǝra akwa sanga su ba akuya gǝr ngǝzi sǝr hyipǝ yarɛ, tsu apa tǝ Yi tara tsǝl tǝ dar ala gǝri.

³ Kulini Yi ada bara ka gǝr zǝndi apǝri kǝra kǝlara sal ani Kǝrsti, ba kǝra mwala ani sal, ba kǝra Kǝrsti ani Hyal.

⁴ Kǝlara sal nam ada 'ya aduwa wala 'ya nabikur aka kǝrari harhari dzǝ ta vǝkǝr sǝlai ala kǝrari wɛ.

⁵ Ba kǝlara mwala nam ada 'ya aduwa wala 'ya nabikur aka kǝrari kura mbumbui dzǝ ta vǝkǝr sǝlai ala kǝrari wɛ—kal-kal apa kǝrari sǝsi.

⁶ Ma mwala nam kura ata mbui kǝrari, ka dzǝ tadǝrnta sǝsǝrni; ba ma sǝr sǝlai ala mwala tǝ dzá awa tadǝrnta sǝsǝrni wala sǝnta kǝrari, ngyar ka dzǝ mbui kǝrari.

⁷ Adi kal-kal ka sal mbui kǝrari wɛ, tǝng tǝ dzǝ aka par Hyal ba nggakur Hyal; ama mwala ni dzǝ ani nggakur sal.

⁸ Akuya sal ta sǝba akwa mwala wɛ, ama mwala sǝba akwa sal;

⁹ ba Hyal ta 'ya sal akuya ka mwala wɛ, ama Hyal 'ya mwala akuya ka sal.

¹⁰ Akuya ka ǝni, ba kadǝbar ka ndzǝr hyantǝr Hyal yarɛ, ka mwala mbukǝr su ala kǝrari ka tsanti par wada nam tǝ dzǝ akur ni.

¹¹ Akwa ǝnarma, akwa Thlaku mwala adi pamǝr ni ta sal wɛ, wala sal pamǝr ni ta mwala wɛ.

¹² Akuya apa tǝ mwala sǝba akwa sal, ani tsuwɛ mwala dzǝ ani ada ya sal. Ama sanga su si aka Hyal.

¹³ Wulamɛ ala kǝr gǝri: Kǝ 'ya kal-kal ka mwala 'ya aduwa ala Hyal aka kǝrari kura mbumbwɛ?

¹⁴ Whal nam tǝ Hyal tara mǝrti ndɛ akwa ta hyipti ala gǝri apǝri ma sal aka sǝsi dzǝgam, sǝr sǝlai alari,

¹⁵ ama apǝri ma mwala aka sǝsi dzǝgam, ata ndzai alari sǝr hǝmɛ wɛ? Akuya Hyal lari sǝsi dzǝgam apa sǝr mbui.

¹⁶ Ma kǝlara ndǝ nam ada bara ɓwalnya ata kǝra sǝ ǝni, yar adi aka whal 'ya su damwa—wala ikǝlizǝya yarɛ nǝr Hyal yɛ adi akǝri wɛ.

Sǝr Sǝmǝr Tǝhaku nǝr Thlaku

¹⁷ Akwa sǝ nam ada nuwɛ tǝ Yi ata gha ala gǝri Yi adi ata hǝm tǝ gǝri wɛ, akuya tsaɓtsǝnidzǝr gǝri ada 'ya su kulɗa ta ɗakur.

¹⁸ Tangkǝma, Yi ngati apǝri sakatǝ gǝr tsaɓtsǝnidzi atakǝmaduku apa ikǝlizǝya, ndǝghǝ nya yarɛ adai akwa ntsa gǝri, ba kǝmi tǝ Yi mbǝrsa akǝri.

¹⁹ Kura aka dzamɛ ka pampamkur ɓuidzi akwa ntsa gǝri ka dzǝ tsanti ndzǝ madi ani ada 'ya sǝ nam tǝ Hyal ada bara.

²⁰ Sakatǝ gǝr si atakǝmaduku, adi sǝr sǝmǝr tǝhaku nǝr Thlaku tǝ gǝri ada sǝm wɛ,

²¹ akuya apa tǝ gǝri ada sǝmɛ, kǝlara ndɛ akwa ntsa gǝri ada lǝkǝma aka sǝmɛ kura sǝkǝ ndǝ damwa. Ndǝ laka tsu aka mi, ndǝ laka ghǝi wur-wur aka yimǝr inabi.

²² Gǝri adi aka kǝi tǝ gǝri awa sǝmɛ ba sa akwa wɛ? Kǝna gǝri ada bara hau ikǝlizǝyar Hyal akwa sǝlai ba kǝlnta sǝlaiyir ndzǝ nam kura aka su? Mǝ tǝ Yi awa gha ala gǝri? Ka Yi hǝm tǝ gǝri akuya ka ǝni ya? A á Yi adi ata hǝm tǝ gǝri wɛ.

²³ Akuya Yi dlutsi aka Thlaku sǝ nam tǝ Yi la gǝri ni: Thlaku Yɛsu ni, akwa kuta vǝr nam tǝ ndǝ ɓǝlai tǝni, dzǝ kǝtǝ mantsǝkǝl,

²⁴ ba sakatǝ dzǝ hamnta gwaditsǝni, dzǝ ɓǝli ka nkǝrɛ, “Əni ani dzá wai, nam akuya ka gǝri; 'yamɛ ǝni ka ɗǝngati tǝra.”

²⁵ Tsu akwa whal ǝni, aghǝla sǝr sǝmǝr tǝhaku dzǝ kǝtǝ kapu ni, ka gha, “Kapu ǝni ani sǝ mbwa-mbwa bǝlin akwa masǝrna; 'yamɛ ǝni, kǝlara saka nam tǝ gǝri ada sa tǝni, ka ɗǝngati tǝra.”

²⁶ Akuya kǝlara saka nam tǝ gǝri ada sǝm mantsǝkǝl ni ba sa akwa kapu ni gǝr ada nkǝrɛ ala ndzǝ damwa ntǝr Thlaku har si ma dzǝ si.

²⁷ Kadǝbar ǝni, kǝlara ndǝ nam tara sǝm mantsǝkǝl ni wala sa akwa kapu nǝr Thlaku ni akwa whal nam kura kal-kal dzǝ ata 'ya aka aibai nǝr 'ya biku ala dzɛ ba masǝr Thlaku ni.

²⁸ Kal-kal ka ndɛ ngaltsǝni kǝrni kabutu dzǝ ata sǝm mantsǝkǝl ba sa akwa kapu ni.

²⁹ Akuya kǝlara ndɛ nam tara sǝm ba sa kura dzǝ ta la nggakur ala dzá Thlaku ni dzǝ sǝmɛ ba sa haka ata kǝra kǝrni.

³⁰ Ani sǝ nam ada 'ya tǝ hang akwa ntsa gǝri kura dǝna ba kura kalang, ba hang akwa ntsa gǝri kurtaka nti.

³¹ Ama ma muri ngaltsǝni kǝr muri, mur adi ata si akwi hakar Hyal wɛ.

³² Sakatǝ Thlaku ada 'ya ala muri haka, Dzǝ ada 'yi tǝ muri ani ka ta muri ta santadzi kaka dunya.

³³ Antǝ dzá, madar mana, sakatǝ gǝri si atakǝmaduku ka sǝm sǝr sǝmɛ, sǝkǝtamɛ kǝma gǝri.

³⁴ Ma kǝlara ndǝ nam aka mi, ka dzǝ sǝm su aivi, ani ka sakatǝ gǝr tsaɓtsǝnidzi atakǝmaduku ta dzǝ ta ndzai sǝr haka tǝ gǝri. Ata kǝra sǝ yarɛ damwa Yi ata la gǝri gala kadamwa sakatǝ Yi si adzǝ gǝri.