1 Bitrusu 5 - Kibaku NT

Ala Ndzǝ Ngga-ngga yarɛ ba Sǝli Tatami

¹ Ala ndzǝ ngga-ngga yarɛ nam akwa ntsa gǝri tǝ Yi ada gha, Yi ma Yi ndǝ ngga, Yi sakǝidar bwanai nam tǝ Kǝrsti ɗar ba pathlu akwa ntsa ndzǝ nam ata dlu nggakur nam ata tsantǝdzi:

² Ka gǝr ɓǝla tǝmar Hyal nam akwi gǝri, 'yamɛ kǝthlǝrǝr ndǝr wulhǝ—adi kadǝbar kǝ ndzai ntsakǝr wɛ, ama kadǝbar aka yiɗǝr gǝri, apa tǝ Hyal ada bara ka gǝri ndzai; adi lambwa ka kwapa wɛ, ama ka gǝr mau 'ya kǝthlǝr;

³ ta gǝr ta tsan dǝna ata kǝra ndzǝ nam tǝ ndǝ vi akwi gǝri, ama ka gǝri ndzai sǝr tsǝlɛ nam ɗaku ala tǝma.

⁴ Ba sakatǝ ndǝr ɓǝla nam Ngga sǝba, gǝri ata dlutsi darar nggakur nam adi ata saga mǝmantadzi.

⁵ Tsu apani gǝr dakurai, ka gǝri kǝlǝngkǝr ala ndzi ngganggar gǝri. Ba sanga gǝri, ka gǝri hadzɛ ala kǝr gǝri lǝkutǝr tǝrghǝlkǝr tǝbwar kǝma gǝri, kadǝbar, “Hyal ada mbǝyaghǝl ndǝr agula, ama dzǝ ada 'ya ɗakur ala ndzǝ nam ada tǝrghǝl kǝra dar.”

⁶ Tǝrghǝlamɛ kǝra gǝri akur tsiya Hyal nam ngga, ani ka dzǝ ata haɓǝtǝ tǝ gǝri akwa sakar ni nam kal-kal.

⁷ Tsaɓtsǝni mɛ alari sanga damitsǝnidzǝr gǝri, kadǝbar dzǝ ani ada wul tǝ gǝri.

⁸ Ka gǝri ɓǝlati kǝr gǝri, ka gǝri ndzai ata mulɛ. Dawar gǝri Satan ada nuɗɛ apa dzǝngai ada zǝmi ada bara ndǝ tǝ dzǝ awa kwaɓǝlnya.

⁹ Kǝdlǝntamɛ tǝni, ka gǝri hyati ɓaɓal akwa hamnta dzǝri, kadǝbar gǝr zǝndi apǝri madar mama kaka nkwaiyir mama gǝri nam tara mbǝrsa akwa sanga dunya ada lǝkwa dzǝli bwanai yarni.

¹⁰ Aghǝla tǝ gǝr ɗar bwanai nǝr saka nkyiɗu laka, Hyal nam ada la muri sanga ɗakur, nam tara kǝga tǝ gǝri ka gǝri ɓui nggakur kaka Yɛsu nam kura kurkuri, Dza ata ɓǝla dzǝguti tǝ gǝri, mǝrti tǝ gǝri ka gǝri ndzai aka hamnta dzǝri, ɓaɓal, ba ka gǝri ɓati kura gǝri awa dla.

¹¹ Sanga dǝna Nǝni kura kurkuri! Apani.

Thlawardzi nǝr Dǝnta

¹² Yi rǝbwa ala gǝri kakadu ni nkyiɗu laka ni aka mbanar zǝr mama Silvanus nam aka dzǝrkur. Yi rǝbwa ala gǝri ka dǝnautsǝni tǝ gǝri ka Yi sakǝidatsǝni apǝri ǝnǝni ani hamntar Hyal nam dzǝri. Hyatamɛ ɓaɓal akwa ǝni.

¹³ Dzǝ nam akwa Babila, nam tǝ Dzǝ tsarba vwam kaka gǝri, hyanti ala gǝri thlawardzi, ba zǝrna akwa hamnta dzǝri, Markusu, yɛ.

¹⁴ Ka gǝri thlawar kǝma gǝri aka yiɗǝdzǝr Kǝrsti. Ndzai lapiyakur ka dzǝ ndzai ata kǝra sanga gǝri nam tara paktsǝnidzi akwa Kǝrsti.