Zvak. 9 - NOVO TESTAMENTO EM NDAU

Jesu unodanija Sauri

¹ Asi Sauri echifemurika ngo ushungu wokuda kuuraya vajiji va Mambo, wakaenda ku mupristi mukuru,

² akakumbira kwaari tshamba yo kuenda mu Dhamaseku, mu nyumba jo kudira, kuti kudari echivona vayiva vo Njira iyi, pikija vanarume nokuti vanakaji, waizovaviisa vakasungwa ku Jerusarema.

³ Achafamba, wakakwedera mu Dhamaseku. Paripo kwakaviya kumutendeneja kujeka kwechibva mu denga.

⁴ Naye wakawa pasi pa mavhu, wakazwa izwi rechiti kwaari: “Sauri, Sauri, unonditambujirenyi?”

⁵ Naye wakati: “Uriyani, Mambo?” No uwo wakati: “Ndiri Jesu wo unotambuja; [kunonesa kwouri kudarika pa machocho anopinja.”

⁶ Asi iye echihuta, no kushama, wakati: “Mambo, unoda kuti ndiitenyi?” Na Mambo wakati kwaari:] “Miruka, unghwine mu dhoropa, nakwo kunozobvunjwa kwouri icho chinosisira kuti uite.”

⁷ No vanarume vaifamba naye vakayima vasikavereketi, vechizwa izwi, asi avasaivona mundhu.

⁸ Na Sauri wakamiruka, naapo abewura majiso ake, aazivi kuvona chiro; navo vakamubata ngo nyara, vakamuendesa mu Dhamaseku,

⁹ naye wakayita mazuva matatu asikavoni, asikazivi kuha nokuti kumwa.

¹⁰ Zvino kwayivapo mujiji wakatikuti mu Dhamaseku, zina rake raizwi ndi Ananiya na Mambo wakati kwaari ngo chivoniso: “Ananiya!” Naye wakati: “Ndiri pano Mambo.”

¹¹ Na Mambo wakati kwaari: “Miruka, uende mu njira inozwi Yakarurama, ubvunjise mu nyumba ya Judhasi mundhu unozwi ndi Sauri wo Tarsu; ngokuti, ringira, iye unokumbira;

¹² naye wavona muchivoniso mundhu zina rake ndi Ananiya, echinghwina, no kudira nyara jake panyezuru pake, kuti aashire kuvona kwake.”

¹³ Asi Ananiya wakapingura, echiti: “Mambo, ndakazwa ngo vazhinji ngo ndava yo mundhu uwu ngo kuwanda kwo izvo zvakashata zvaakayita kuno vakacheneswa vako mu Jerusarema.

¹⁴ Napano unaro simba raakapuwa ngo vapristi vakuru kuti asunge avo vese vanokumbira ngo zina rako.”

¹⁵ Asi Mambo wakati kwaari: “Endayi, ngokuti uwu uri ndiro yakatsananguhwa ndini kuti atware zina rangu kuno vo majinja, no majimambo, no kuvana vaIsraeri.

¹⁶ Ngokuti ndinozomupangijira uwandu hwaanozotambujwa ngo ndava yo zina rangu.”

¹⁷ Na Ananiya wakaenda, akanghwina mu nyumba; echidira nyara jake panyezuru pake, akati: “Mukoma Sauri, Mambo, ndiye Jesu, uwo wakavoneka kwouri mu njira yo wakaviya ndiyo, wakandituma kuti uvone, uzariswe ndi Mweya Wakachena.”

¹⁸ Paripo akawa kubva kumajiso ake akadari ngo magwamba, naye wakavona akamuka, akabhapatiswa.

¹⁹ Wakaashira kuha, akagwinyiswa. Sauri wakagareyo mazuva akatikuti no vajiji vayiva mu Dhamaseku.

Sauri mu Dhamaseku

²⁰ Paripo mu nyumba jo kudira wakateketesa Jesu kuti uri Mwana wa Mwari.

²¹ Naavo vese vakamuzwa vakashama, vechiti: “Uwu andiyepi here wakauraya mu Jerusarema avo vaikumbira ngo zina iro? Naye wakaviya pano kuti atore vakasungwa pamberi po vapristi vakuru?”

²² Asi Sauri simba rake rakavangirira kukura, akavakangaija vaJudha vayigara mu Dhamaseku, echikohomejisa kuti uwu Jesu uri Kristu.

²³ Ngosure kwo mazuva mazhinji, vaJudha vakayita bangano rokumuuraya.

²⁴ Asi zano ravo rakazivikanwa kuna Sauri. Navo vakarinda misuvo masikati no usiku kuti vamuuraye;

²⁵ asi vajiji vake vakamutora usiku, vakamubzusa ngo parukumbati, uri mu dendere.

Sauri mu Jerusarema

²⁶ Naapo ayinga aguma Jerusarema, wakaeja kuti ayite umwe wo vajiji, navo vese vakamutya vasikatendi kuti wayiva mujiji.

²⁷ Asi Bharnabha wakamutora akamuviisa kuna vapostori, akadurujira kwavari mavonere aakayita Mambo mu njira, no njira yaakavereketa ndiyo kwaari, no njira yayinga akachumaira ngo kushinga mu Dhamaseku ngo zina ra Jesu.

²⁸ Naye wayiva navo echinghwina no kubuda mu Jerusarema.

²⁹ Wakachumaira ngo kushinga ngo zina ra Mambo. Wakavereketa echikanijana no vagiriki. Asi avo vakatanda mazano okuda kumuuraya.

³⁰ Asi apo vakoma vazviziva, vakamubzusa kuenda Khesariya, vakamutumira Tarsu.

³¹ Ndizvo zviara zvese zvayiva mu Judhiya, no mu Garire, no Samariya, zvakawana kunyarara, zvakavakiwa, nazvo zvechifamba ngo kumutya Mambo, no mukuembezehwa ndi Mweya Wakachena, zvakawandiswa.

Kuponeswa kwa Aniya

³² Kwakaitika kuti Pedru echiparura ndau jese wakabzuka kuno vakacheneswa vayigara Ridha.

³³ Naapo wakavona mundhu wakatikuti zina rake raizwi ndi Aniya, uwo wayinga akavata pa mubhedhi wake makore masere, ngokuti wayiva no ndhenda yo kuoma muviri.

³⁴ Pedru wakati kwaari: “Aniya, Jesu Kristu unokuponesa; miruka, unasirire mubhedhi wako.” Paripo iye wakamuka.

³⁵ Naavo vese vayigara mu Ridha, no mu Sharoni, vakamuvona, vakatenderuka kuna Mambo.

Kumuswa kwa Tabhita

³⁶ Zvino kwayivapo mu Jopa mujiji wakatikuti, zina rake raizwi Tabhita, ukwo kunoti ngo kukumuchwa, Dhorika. Iri jimayi inga rina mishando yakanaka, no kukovera zvorakaita.

³⁷ Kwakaitika ngaao mazuva, kuti rakahwara, rikafa; naapo vayinga varishambija, vakaridira mukamera ro muturika.

³⁸ Ngokuti Ridha rayiva phedo poJopa, vajiji vechizwa kuti Pedru wayiva umwo, vakatuma vanarume vaviri kwaari, vechimupota, kuti Usanonoka kuviya kwetiri.

³⁹ Na Pedru wakamiruka, akaenda navo. Naapo ayinga aguma vakamuviisa mukamera ro muturika; jakaima phedo pake jese shirikaji, jechichema, jechipangijira nghanju no zvokufuka zvaainga akayita Dhorika, achiripo navo.

⁴⁰ Asi Pedru avabudisa vese, wakagwadama, akakumbira, Akunukuka kuno muviri wakafa, wakati: “Tabhita, muka.” Naye wakabewura majiso ake, avona Pedru, wakamuka, akagara.

⁴¹ Naye amubata ngo nyara yake wakamumusa; adanija vakacheneswa no shirikaji wakamutura kwavari echipona.

⁴² Nakwo kwakazivikanwa mukati mwo Jopa rese; no vazhinji vakamutenda Mambo.

⁴³ Kwakaitika kuti iye wakagara mazuva mazhinji mu Jopa, no mundhu unozwi Simoni, musukuti.