Zvak. 8 - NOVO TESTAMENTO EM NDAU

¹ Na Sauri wayiva mu bangano ro kuurawa kwa Stefano. Kwakabuda ngoiro zuva kuteverehwa kukurutu kwo kurwisana no chiara chayiva mu Jerusarema; navo vese vakaparajikira mu nyika yo Judhiya no yo Samariya, kwakasara vapostori vega.

² No vandhu vaidira Mwari vakaviga Stefano, vakamuchema kakurutu.

³ Asi Sauri wakaparaja chiara, echinghwina mu nyumba jese, no kubata ngo simba vese vanarume no vanakaji, no kuvafungira mu guniya.

Masoko akanaka mu Samariya

⁴ Ndizvo avo vakaparajika vakaenda ndau jese vechichumaira izwi.

⁵ Na Firipi wakabzuka ku dhoropa ro Samariya, wakachumaira kwavari ndi Jesu Kristu.

⁶ No vandhu vazhinji vakapurukira ngo chisungo chimwe kuno izvo zvakavereketwa ndi Firipi, apo vazwa, vavona zvivoniso zvaakayita.

⁷ Ngokuti kwakabuda mweya ine svina kubva ku vazhinji vayiva nayo, yechidanijira ngo izwi guru; no vazhinji vayiva vakaoma muviri, no zvirema vakaponeswa.

⁸ Kwakavepo kudakara kukurutu mu dhoropa iro.

⁹ Asi kwayivapo mundhu wakatikuti, zina rake raizwi ndi Simoni, uwo ngo pamberi waikamba mu dhoropa iro, echishamisa jinja ro vaSamariya, echiteketesa kuti iye wayiva mukuru.

¹⁰ Vakamupurukira vese kubvira ku vadoko mbhera ku vakuru, vechiti: “Uwu mundhu uri simba guru ra Mwari.”

¹¹ Navo vakamupurukira ngokuti kubvira mukuvo wakareba iye wayinga avashamisa ngo kukamba kwake.

¹² Asi apo vatenda Firipi echichumaira ngo ndava yo Umambo hwa Mwari, no zina ra Jesu Kristu, vakabhapatiswa vese vanarume no vanakaji.

¹³ Na Simoni naye wakatenda; abhapatiswa wakavangirira kugara na Firipi; echivona zvivoniso no mishamiso mikuru yechiitwa, wakashamiswa.

¹⁴ Naapo vapostori vayiva mu Jerusarema vazwa kuti vaSamariya inga vaashira izwi ra Mwari, vakatuma kwavari Pedru na Johani.

¹⁵ Avo, apo vabzukeyo, vakavakumbirira kuti vaashire Mweya Wakachena;

¹⁶ ngokuti inga usati wabzuka panyezuru po umwe wavo, kwega vayinga vabhapatiswa ngo zina ra Mambo Jesu.

¹⁷ Naapo vakadira nyara javo panyezuru pavo, vakaashira Mweya Wakachena.

¹⁸ Zvino apo Simoni avona kuti Mweya Wakachena wakapuwa ngo kudihwa kwo nyara jo vapostori, iye wakada kuvapa mare,

¹⁹ echiti: “Ndipenyivo iro simba kuti kwaari wo ndinozodira nyara yangu panyezuru pake, unozoashira Mweya Wakachena.”

²⁰ Asi Pedru wakati kwaari: “Mare yako ngaipere pamwepo newe, ngokuti wapinimija kuti chipuwo cha Mwari chingatengwa ngo mare.

²¹ Iwewe auna rupande nokuti chikovaniswa kuiyi ndava; ngokuti mwoyo wako auzivi kururama pamberi pa Mwari.

²² Ndizvo tenderuka ubve kwokushaisha kwako, ukumbire kuna Mambo kuti pamweni kungaregerehwa kwouri kupinimija kwo mwoyo wako.

²³ Ngokuti ndinovona kuti uri muchanduru chinovava, no mukusungwa kwo kushaisha.”

²⁴ Na Simoni wakapingura, akati: “Ndikumbirirenyi kuna Mambo, kuti chisazondigumira nachimwe cho izvo zvomwavereketa.”

²⁵ Ndizvo apo vayinga vayita chapupu, no kuvereketa izwi ra Mambo, vakapetuka Jerusarema, vechichumaira vhangeri mu mizi mizhinji yo vaSamariya.

Firipi no muthenwa wo Etiopiya

²⁶ Asi ngirosi ya Mambo yakavereketa kuna Firipi, yechiti: “Miruka, uende kubaniyo ngo njira inobzuka kubva Jerusarema kuenda Gaza. Ndau iri bani.”

²⁷ Naye wakamiruka, akaenda, vonayi mundhu wo Etiopiya, muthenwa, mukuru pasi pa Khendese Mambokaji wo Etiopiya, waingwarira upfumi hwake hwese, wayinga akaviya Jerusarema koodira;

²⁸ iye waipetuka, akagara mungoro yake, naye waijija tshamba yo muprofeti Isaya.

²⁹ No Mweya wakati kuna Firipi: “Kwedera ushongane no ngoro iyo.”

³⁰ Na Firipi wakagogoma kuenda kwaari wakamuzwa echijija tshamba ya Isaya muprofeti, wakati: “Unozwisisa here icho cho unojija?”

³¹ Naye wakati: “Ndingayita mazwisisirenyi pasina umwe ungandijijisa?” Naye wakamupota Firipi kuti akwire, agare naye.

³² No ndima yo matahwa yaijija yayiva iyi: “Iye wakakweviwa kudari ngo bvuta koourawa nokudari ngo mwana wo bvuta anonyarara pamberi pounoigunda, ngokudaro aazivi kubewura muromo wake.”

³³ Mukupsherujwa kwake kutongwa kwake kwakabviswa, ndiyani unozoverenga mibarihwana yake? Ngokuti kupona kwake kwakabviswa mu nyika.

³⁴ No muthenwa wakapingura kuna Firipi, akati: “Ndinokupota, muprofeti unovereketa izvi ndiyani, ndiye ambhwine here, nokuti unovereketa ngo umweni?”

³⁵ Na Firipi wakabewura muromo wake wakatanga kubvira mu matahwa awo, wakachumaira kwaari ndi Jesu.

³⁶ Vachafamba mu njira, vakaguma kundau yakatikuti ino kumwa; no muthenwa wakati: “Vonayi, kumwa iri pano; chinyi chinondirambisa kuti ndisabhapatiswa?”

³⁷ (Naye wakapingura, akati: “Kudari wechitenda ngo mwoyo wako wese, kunotendehwa.” Naye wakapingura echiti: Ndinotenda kuti Jesu Kristu uri Mwana wa Mwari.)

³⁸ Naye wakapanga kuti ngoro ieme, navo vaviri vakabzuka mu kumwa, Firipi no muthenwa, naye wakamubhapatisa.

³⁹ Naapo vabuda kubva mu kumwa, Mweya wa Mambo wakamubvisa Firipi; no muthenwa aazivi kuchamuvona, ngokuti iye wakaenda mu njira yake echidakara.

⁴⁰ Asi Firipi wakavoneka ari mu Azota; echiparura, wakachumaira vhangeri mu madhoropa ese mbhera wakaguma Khesariya.