Zvak. 7 - NOVO TESTAMENTO EM NDAU

Kuvereketa kwa Stefano kuvatongi

¹ No mupristi mukuru wakati, Izvi zvino gwinyiso here?

² Naye wakati: “Vanarume, vakoma, no majibaba, purutanayi, Mwari wo uthende wakavoneka kuna baba wedu Abrahama, apo wayigara mu Mesopotamiya, asati agara mu Harani,

³ wakati kwaari, buda ku nyika yako, no kubva ku hama jako, uende ku nyika yo ndinozokupangijira.”

⁴ Naapo iye wakabuda kubva ku nyika yo vaKaradhiya, wakagara mu Harani: No kubvapo, ngosure kwo kufa kwa baba wake, Mwari wakamuthuthisa kuti aviye ku nyika iyi yo munogara zvino imwimwi.

⁵ Naye aazivi kumupa ndhaka mukati mwayo, haiwa, no inokwana kutsikwa ngo tshoka, asi wakamugondisa kuti unozoipa kwaari kuti iyite ndhaka, no jinja rake rinozova sure kwake, apo ayinga asati abara mwana.

⁶ Na Mwari wakavereketa kudari, kuti mibarihwana wake unozoyita vandhu vapara mu nyika imweni, zve, kuti vanozoitwa hloko ndivo, vechivabata ngo njira yakashata mbhera kupeja makore ari mazana marongomuna (400).

⁷ No jinja iro rovanozoitwa hloko ndiro, ndinozoritonga, wakananga Mwari; ngosure kwo izvo vanozobuda, vandidire kuiyi ndau.

⁸ Naye wakamupa chitenderano cho kuchekwa, ndizvo iye abara Isaka, wakamucheka ngo zuva rochisere; na Isaka wakabara Jakobe, na Jakobe wakabara majibaba mukuru vari gumi na vaviri.

⁹ No majibaba mukuru, vakayita ndurumwa ndi Josefa, vakamutengesa kuti aende Egipite. Na Mwari wayindova naye,

¹⁰ naye wakamununurira kubva ku matambujiko ake ese, wakamupa nyasha no kungwara pamberi pa Faro mambo wo Egipite, naye wakamuemesera kuti ayite mutongi panyezuru po Egipite, no nyumba yake yese.

¹¹ Zvino njara yakaviya panyezuru po nyika yese yo Egipite, no Kenani, no kutambujika kukurutu. No majibaba edu avazivi kuwana zvokuha.

¹² Asi apo Jakobe ayinga azwa kuti kwayivapo koroni mu Egipite, wakatuma ngo nguva yokutanga majibaba edu.

¹³ Na ngo mukuvo wochipiri, Josefa wakajitatija ku hama jake, no hama ja Josefa jakaziviswa kuna Faro.

¹⁴ Na Josefa atuma, akadanija kuviya kwaari baba wake Jakobe, no hama jake jese, vandhu vayiva makumi manomwe na vashanu.

¹⁵ Ndizvo Jakobe wakabzuka kuenda Egipite, naye wakafa, iye no majibaba edu;

¹⁶ navo vakatwahwa kuenda Shekemi, vakavigwa muiba raakatenga Abrahama kuno vana va Amoni mu Shekemi, ngo mutengo wo mare yo sirivha.

¹⁷ Apo wokwedera mukuvo wo chigondiso, chaakapika Mwari kuna Abrahama, vandhu vakawandiswa nokuita vazhinji mu Egipite,

¹⁸ mbhera kwakavapo mambo umweni mu Egipite, uwo wayinga asikazivi kumuziva Josefa.

¹⁹ Uwu ayita urimbwi kujinja redu, wakabata majibaba edu ngo njira yakashata, ngo kurasha kunja chiya javo, kuti jisazopona.

²⁰ Ngo nguva iyo Mosi wakaberekwa, naye wayiva wakanaka kakurutu kuna Mwari; wakarehwa mweji mitatu mu nyumba ya baba wake.

²¹ Naapo adihwa kunja, mukunda wa Faro wakamuboja, akamurera kuti ayite mwana wake.

²² Na Mosi wakajijiswa ungwaru wese hwo vaEgipite; wayiva no simba mu mazwi ake no mu mishando yake.

²³ Naapo ayinga aano makore anonga makumi marongomuna o usharuka, kwakanghwina mu mwoyo mwake kuti afambire hama jake, vana vaIsraeri.

²⁴ Echivona umwe wavo echishaishihwa, wakamurwira uwo waitsikirihwa akauraya muEgipite.

²⁵ Asi wakapinimija kuti hama jake jaizwisisa kuti Mwari wayivaponesa ngo nyara yake; asi avazivi kuzwisisa.

²⁶ Na ngo zuva raitevera, wakavoneka kwavari, vechiambana, naye wakavereketa kwavari kuti vaiyane, echiti, Vamuna, muri vakoma; munoshaishirana ngenyi?

²⁷ Asi iye waishaishira muvakihwana wake wakamusukumija, echiti: Ndiyani wakakuemesa kuyita mambo no mutongi panyezuru pedu?

²⁸ Unoda kundiuraya here kudari ngo zvowakauraya muEgipite zuro?

²⁹ Na Mosi wakatiza ngo kuzwa izwi iro, akayita chigarandimo mu nyika yo Midhiyani, apo paakabara vana vaviri.

³⁰ Naapo makore ari makumi marongomuna apera, ngirosi yakavoneka kwaari uri mu bani ro dundhu ro Sinayi, iri mu murazvu wo muriro mu pfiba.

³¹ Naapo Mosi echivona, wakashama ngo chivoniso; achakwedera kuringira kwakazwika kwaari izwi ra Jehovha rechiti:

³² “Inini ndiri Mwari wo majibaba ako, Mwari wa Abrahama, na Mwari wa Isaka, na Mwari wa Jakobe.” Na Mosi wakahuta, asikashingi kuringira.

³³ Na Jehovha wakati kwaari: Sunungura magwada kubva kutshoka jako: Ngokuti ndau iyo pounoima iri mavhu akachena.

³⁴ Ngo gwinyiso ndakavona kutambujwa kwo vandhu vangu vari mu Egipite, ndakazwa kugomera kwavo, ndabzuka kuti ndivanunure: Zvino, viya, ndinozokutuma Egipite.

³⁵ Uwu Mosi wo vakaramba, vechiti: Ndiyani wakuita mambo no mutongi? Iye Mwari wakamutuma kuti ayite mambo no musununguri, kubudikija ngo nyara yo ngirosi yakavoneka mu pfiba.

³⁶ Uwu mundhu wakavatungamirira kubuda, echiita mishamiso no zvivoniso mu nyika yo Egipite, no mu Jombe Rakapshuka, no mu bani, kwemakore ari makumi marongomuna.

³⁷ Uwu ndiye Mosi uwo wakati kuna vana vo Israeri, Mwari unozomumusira muprofeti kubva ku hama jenyu, wakadari ndini.

³⁸ Uwu ndiye wayiva mu mbungano mu bani no ngirosi yakavereketa kwaari mu dundhu ro Sinayi, no kuna majibaba edu; uwo wakaashira mazwi okupona kuti aape kwetiri.

³⁹ Kwaari majibaba edu aazivi kupurutana, asi vakamusukumija kubva kwavari, vakakunukujira mwoyo yavo kuti vahwirire Egipite;

⁴⁰ vechiti kuna Aroni: “Tiitire zvimwari zvinozotitungamirira; ngokuti uwu Mosi wakatibudisa kubva ku nyika yo Egipite, atizivi chakaitika kwaari.”

⁴¹ Navo vakaumba kan'ombe ngaawo mazuva, vakazisa mudiro kuno uwo muezaniso, vakadakara ngo mushando wo nyara javo.

⁴² Asi Mwari wakavafuratira, akavapira kuti vadire hondo jo mu denga; kudari ngo zvakatahwa mu tshamba yo vaprofeti: “Mwakapira kwendiri here mbhuka jakaurawa no midiro kwemakore makumi marongomuna muri mu bani, imwimwi vo nyumba ya Israeri?”

⁴³ Nemwi mwakatora tende ra Moreki, no ndhondo yo chimwari Refani, miezaniso yo mwakaita kuti muidire: Neni ndinozomuthuthisa kuenda mberi kwo Bhabhurona.

⁴⁴ Majibaba edu vayiva no tende ro chapupu vari mu bani, kudari ngo zvaakaemesa uwo wakavereketa kuna Mosi, kuti ariyite kudari ngo chivonero chaakavona.

⁴⁵ Iro rakaashihwa ngo majibaba edu vakanghwina naro na Joshua, apo vakanghwina kugara ndhaka yo vo majinja, aakambirimbija Mwari kubva pamberi po hope jo majibaba edu, mbhera kuguma kumazuva a Dhavhidha.

⁴⁶ Uwo wakawana nyasha pamberi pa Mwari, akadisisa kuti amupshakire ugaro Mwari wa Jakobe.

⁴⁷ Asi Soromona wakazomuvakira nyumba.

⁴⁸ Asi Uri panyezuru pozvese aagari muugaro hwakaitwa ngo nyara; kudari ngo zvaakavereketa muprofeti:

⁴⁹ Denga riri dendemaro rangu, no nyika iri chitambarariro cho tshoka jangu: Unozondivakira nyumba yakadini, unonanga Jehovha, nokuti ngoiyapi ndau yo kuzorora kwangu?

⁵⁰ Nyara jangu ajizivi kuyita izvi zvese here?

⁵¹ Imwimwi mune misipa yakakukutara, no vano mwoyo no njeve zvisikazivi kuchekwa, munondogara mwechirwisana no Mweya Wakachena: Kudari ngo zvo vakayita majibaba enyu, ngokudaro munoyita imwimwi.

⁵² Ngowapi wo vaprofeti usikazivi kutambujwa ngo majibaba enyu? Navo vakauraya avo vaprofeti vakapangijira ngo pamberi ngo kuviya kwo Uwo Wakarurama; uwo, zvino imwimwi mwakamupira no kumuuraya;

⁵³ imwimwi mwakaashira mipango ngo ngirosi, musikazi kuingwarira.

Kufa kwa Stefano no kuteverehwa kwo chiara

⁵⁴ Naapo vechizwa izvi vakabaiwa mu mwoyo, navo vakamukwetsera mazino.

⁵⁵ Asi iye azariswa ngo Mweya Wakachena, akaringira mu denga, wakavona uthende hwa Mwari, na Jesu echiyima ngo kumuho kwa Mwari.

⁵⁶ Akati: “Vonanyi, ndinovona mu denga mwakabewuhwa, no Mwana wo Mundhu echiyima ngo kumuho kwa Mwari.”

⁵⁷ Asi vakadanijira ngo izwi guru, vakajiva njeve javo, vakamuhonokera ngo chisungo chimwe.

⁵⁸ Navo vakamurasha kunja kwo dhoropa, vakamufura ngo mapuwe. No zvapupu zvakatura zvokufuka zvazvo pa tshoka jo jaha raizwi Sauri.

⁵⁹ Navo vakafura Stefano ngo mapuwe, iye wakakumbira kuna Mambo, echiti: “Mambo Jesu, ashira mweya wangu.”

⁶⁰ Naye wakagwadama pasi, akadanijira ngo izwi guru: “Mambo, usavayitira ndava ngouku kushaisha.” Naapo avereketa izvi, wakafa.