Zvak. 6 - NOVO TESTAMENTO EM NDAU

Kusanwa kwo vadhikoni vanomwe

¹ Kwakati ngaao mazuva, apo vajiji vaiwandiswa, kwakabuda kuvhuruvhuta kwo vagiriki kuno vahebheru, ngo ndava, yokuti shirikaji javo jakanyimwa mukukovanisihwa kwo zuva ngo zuva.

² No vari gumi na vaviri vakadanija kwavari chiunga cho vajiji, vakati: “Akusisiri kuti isisu tisiye izwi ra Mwari, tishande pa thafura.

³ Ndizvo hama, pshakanyi vanarume vanomwe kubva pakati penyu, vari vanogondeka, vakazara ndi Mweya, na ngo kungwara, vatingaimisa panyezuru po uwu mushando.

⁴ Asi isisu tinozovangirira mukukumbira, no mu mushando wo izwi.”

⁵ No izwi iro rakadakajisa chiunga chese navo vakatsanangura Stefano, mundhu wakazara ngo kugonda, na ngo Mweya Wakachena, na Firipi, na Prokoro, na Nikanoro, na Timona, na Pemena, na Nikoro wo Antiyoki waiya wakatenderukira kuchijudha.

⁶ Avo vakavadira pamberi po vapostori, naapo vayinga vakumbira, vakadira nyara javo panyezuru pavo.

⁷ No izwi ra Mwari rakawanjiswa; chiunga cho vajiji chakawanjiswa kakurutu mu Jerusarema; no vazhinji vo vapristi vakateveja mukutenda.

Kusungwa kwa Stefano

⁸ Na Stefano azara ngo nyasha no simba, wakayita mishamiso mikuru, no zvivoniso pakati po vandhu.

⁹ Asi kwakamuka vamweni vakatikuti vo nyumba yo kudira vanozwi vandhu Vakasununguka, no vo vaKureni, no vo vaArixandriya, no voavo vanobva Kirikiya, no vo Aziya, vechiita hasha na Stefano.

¹⁰ Navo avazivi kukona kuemesejana no kungwara no Mweya zvaakavereketa ndizvo.

¹¹ Naapo vakaveruja vandhu vechiti: “Takamuzwa echivereketa mazwi okutuka Mosi na Mwari.”

¹² Navo vakamusa vandhu, no vakuru no vatari, vakamubudira, vakamubata, vakamuzisa kuno bangano.

¹³ Vakaemesa zvapupu zvokunyepa, izvo zvakati: “Mundhu uwu aatongoregi kuvereketa mazwi okutuka iyi ndau yakachena, no mupango.

¹⁴ Ngokuti takamuzwa echinanga kuti Uwu Jesu wo Nazaretha unozoparaja ndau iyi, no kuphinduja zvirovejeso zvaakapa Mosi kwetiri.”

¹⁵ Naavo vese vayigara mubangano, vechimuringisisa, vakavona hope yake kuti yayiva inonga hope yo ngirosi.