Zvak. 5 - NOVO TESTAMENTO EM NDAU

Ananiya na Safira

¹ Asi mundhu wakatikuti, zina rake wayiva Ananiya, no mukaji wake Safira, wakatengesa munda.

² Wakasara no rupande rwo mutengo, no mukaji wake echiziva naye, azisa rupande rwakatikuti, wakaudira pa tshoka jo vapostori.

³ Asi Pedru wakati: “Ananiya, Sathani wazarisa ngenyi mwoyo wako kuti unyepe kuna Mweya Wakachena no kusara no rupande rwo mutengo wo munda.

⁴ Ngo nguva uchiripo wayinga usiri wako here? Ngosure kwokutengeswa kwawo, ausayinga uri pasi po simba rako here? Wakatanda ngenyi ichi mu mwoyo mwako? Auzivi kunyepera kuno mundhu, asi kuna Mwari.”

⁵ Na Ananiya echizwa aya mazwi, wakawa pasi, wakafa; no kutya kwakakura kwakagumira avo vese vakazvizwa.

⁶ No majaha akamuka, akamupukutira, akamutwara kuenda kunja koomuviga.

⁷ Kwakaitika ngosure kwo mukuvo unoda kuyita nguva ndhatu, kuti mukaji wake naye, asikatongozivi icho chakaitika, wakanghwinemwo.

⁸ Na Pedru wakati kwaari: “Ndibvunjeyi kuti mwakatengesa munda here ngo mare yakadari?” Naye wakati: “Eya, ngo mare yakadaro.”

⁹ Asi Pedru wakati kwaari: “Mwakatenderana ngenyi kueja Mweya wa Mambo? Vonayi, tshoka jaavo vaviga mwamuna wako jiri pa musuvo, navo vanozokutwara kuenda kunja.”

¹⁰ Paripo iye wakawa pasi pa tshoka jake, akafa: No majaha awo akanghwina akamuvona afa, akamubudisa kunja akamuviga payiva no mwamuna wake.

¹¹ No kutya kwakakura kwakagumira vese vo chiara, no panyezuru po avo vese vakazwa izvi.

Mishamiso jo vapostori

¹² No zvivoniso no zvishamiso zvakawanda zvakaitwa ngo nyara jo vapostori pakati po vandhu; navo vayivapo vese ngo chisungo chimwe mu berere ra Soromona.

¹³ Asi akuna wo vamweni waishinga kuti anghwinire mukati mwavo, asi vandhu vakavakurisa;

¹⁴ no vatendi vakanyanya kuengejehwa kuna Mambo, vazhinji, vese vanarume no vanakaji.

¹⁵ Kwokuti vakabudisa mu makwanja avo vaihwara, vakavarajika pa mandhi no mu misengere, kuti apo Pedru echipinda, bvute rake rifukije vamweni vavo.

¹⁶ Zve, kwakaviya vandhu vazhinji vechibva ku madhoropa ayitendeneja Jerusarema, vechizisa vandhu vaihwara, naavo vaitambujwa ngo mweya ine svina; navo vese vakatambiswa.

Kutambujwa kwo vapostori

¹⁷ Asi kwakamiruka mupristi mukuru, navo vese vayiva naye, vari vechikwata cho vasadhusi, navo vakazara ngo ndurumwa,

¹⁸ vakabata vapostori, vakavafungira mu guniya ro vandhu vese.

¹⁹ Asi ngirosi ya Mambo yakabewura misuvo yo guniya usiku, ikavabudisa kunja, yakati:

²⁰ “Endanyi, muime mu themperi mwechivereketa ku vandhu mazwi ese okupona uku.”

²¹ Vachazwa izvi, vakanghwina mu themperi mangwanani mavishi, vakajijisa. Asi mupristi mukuru wakaviya naavo vayiva naye, akadanija pamwepo magurukota ese, no vakuru vese vo vandhu vaIsraeri, vakatuma ku guniya kuti vavazise.

²² Asi vangwariri avo vakatumwa avazivi kuvawana mu guniya; navo vakapetuka vakavabvunja,

²³ vechiti: “Nyumba yo guniya taiwana yakakonywa aembho, no vangwariri vechiima pamberi po musuvo. Asi apo tabewura, atizivi kuwana mundhu mukati.”

²⁴ Zvino apo mukuru wo themperi, no vapristi vakuru vazwa mazwi aya, vakakangaijwa kakurutu ndivo, kuti ichi chingazoita makurirenyi.

²⁵ Kwakaviya mundhu akavabvunja, echiti: “Vonanyi, vandhu vomwakanghwinisa mu guniya vanoyima mu themperi vachijijisa vandhu.”

²⁶ Naapo mukuru pamwepo no masocha, vakaenda, vakavazisa vasikavavangijiri, ngokuti vaitya vandhu, kuti pamweni vangafuhwa ngo mapuwe.

²⁷ Naapo vayinga vavazisa, vakavadira pamberi po magurukota. No mupristi mukuru wakavabvunjisa

²⁸ echiti: “Takamupangisisa no kumupanga kuti musazojijisa ngoiri zina, vonanyi, mwazaja Jerusarema ngo rujijiso rwenyu, nemwi munoda kuviisa panyezuru pedu ngazi yo mundhu uwu.”

²⁹ Asi Pedru no vapostori vechipingura, vakati: “Kunodikana kuti tipurutane kuna Mwari kuno kupurutana ku vandhu.

³⁰ Mwari wo majibaba edu wakamusa Jesu uwo wo mwakauraya, ngokumuturika pa muti.

³¹ Iye Mwari wakamumiruja ngo kumuho kwake kuti ayite Muzvare no Muponesi, kuti ape kutenderuka ku vaIsraeri, no kuregerehwa zvishaishi.

³² Nesu tiri zvapupu zvaaya mazwi; no Mweya Wakachena nawo, uwo waakapa Mwari kwavari vanomupurutana.”

³³ Asi ivo vazwa izvi, vakabaiwa, vakapangana kuvauraya.

³⁴ Asi kwakamuka mundhu pakati po makota, mufarisi zina rake ndi Gamarieri, gorokota ro mupango, uwo waireremejwa ngo vandhu vese, naye wakapanga kuti avo vanarume vambobviswe kunja ngo mukuvo mudoko.

³⁵ Wakati kwavari: “Imwimwi vanarume vaIsraeri, jingwarirenyi ngoicho cho munoda kuyita ngo ndava yo ava vandhu.

³⁶ Ngokuti ngo mazuva okare, umwe unozwi Teudhasi wakamuka, echiti iye wayiva mukuru. Vamuna vakatikuti vanoda kuyita mazana marongomuna (400) vakatevera kwaari: Uwo wakaurawa, naavo vese vakaongwa ndiye vakaparajwa, vakapera.

³⁷ Ngosure kwake wakamuka Judhasi mu Garire ngo mazuva o ndhariro, wakakweva vandhu vamweni kuti vamutevere; iye wakafa; naavo vese vakaongwa ndiye vakapera.

³⁸ Nazvino ndinoti kwomuri, taraukanyi kuna ava vandhu, muvaregere; ngokuti iri zano, no uwu mushando kuti zviri zvo vandhu, zvinozoparajwa.

³⁹ Asi kuti zviri zva Mwari, amuna simba ro kuvanyisa; ngokuti pamweni munozovoneka muri vanorwisana na Mwari.”

⁴⁰ Navo vese vakatenderana naye; naapo vadanija vapostori kwavari, vakavarova, vakavapangisisa kuti vasazovereketa ngo zina ra Jesu, vakavaregera.

⁴¹ Ndizvo vakabva pamberi po makota, vechidakara kuti vakaverengwa vari vanosisira kuitihwa zvinopsheruja ngo ndava yo zina rake.

⁴² No mazuva ese mu themperi, no mumakanyi, avazivi, kuregera kujijisa no kuchumayira ndi Jesu kuti uri Kristu.