Zvak. 4 - NOVO TESTAMENTO EM NDAU

Pedru na Johani pakati po vatongi

¹ Vachavereketa kuna vandhu, vapristi no nduna yo themperi, no vasadhusi, vakaviya kwavari,

² vechitambujika kakurutu ngokuti vaijijisa vandhu, no kuteketesa ndi Jesu kumuka kwo vakafa.

³ Navo vakavabata, vakavafungira mu guniya mbhera zuva raitevera; ngokuti inga aamadekoni.

⁴ Asi vazhinji vakazwa izwi vakatenda; no uwandu hwo vandhu hwaida kuguma zviuru zvishanu (5.000).

⁵ Kwakaitika ngo zuva raitevera, kuti vatongi, no vakuru no vatari, vakaungana mu Jerusarema,

⁶ na Anasi mupristi mukuru, na Kaiafasi, na Johani, na Arixandreu, naavo vese vayiva vo mbhuri yo mupristi mukuru.

⁷ Naapo vayinga vavaemesa pakati pavo, vakavabvunjisa, kuti: “Ngo simba rani ro mwayita ichi chiro?”

⁸ Naapo Pedru, azariswa ndi Mweya Wakachena, wakati kwavari: “Imwimwi vatongi vo vandhu, no vakuru,

⁹ kudari isisu tinobvunjiswa nyamasi ngo ndava yo mushando wakanaka wakaitwa kuno mundhu wakaremara, kuti waponeswa ngo njira yakaitawani;

¹⁰ ngakuzivikanwe kwomuri mwese, no ku vandhu vese vaIsraeri, kuti ngo zina ra Jesu Kristu wo Nazaretha, wo mwakakohomera, uwo waakamusa Mwari kwo vakafa, eya, ndiye uwu mundhu unoyima pamberi penyu wakagwinya.

¹¹ Ndiye uri buwe rakarambwa ndimwi vavaki, uwo wakayita musoro wo pakhona.

¹² Akunazve kuponeswa ngo umweni, ngokuti akuna zina rimweni pasi po mudenga rakapuwa kuna vandhu rokuti tingaponeswa ndiro.”

¹³ Zvino apo vavona kushinga kwa Pedru na Johani, vavona kuti vayiva vandhu vasikazivi kujija, vasina chevanoziva, vakashama, navo vakaziva kuti vayiva na Jesu.

¹⁴ Vechivona mundhu wakaponeswa echiyima navo, avasaikona kukanija.

¹⁵ Asi apo vayinga vavapanga kuti vabve pakati po makota, vakapangana pakati pavo,

¹⁶ vechiti: “Tinozoitenyi kuna ava vandhu? Ngokuti kwakavoneka pambhene kuna vese vanogara mu Jerusarema kuti ngo gwinyiso mushamiso uno mbiri wakaitwa ndivo; nesu atikoni kuuramba.

¹⁷ Asi kusachazowandiswa pakati po vandhu, ngativakohomejise kuti vasazovereketazve ngo zina ro uwu kuno mundhu pikija ngouri.”

¹⁸ Navo vakavadanija, vakavapangisisa kuti vasazovereketa nokuti kujijisa ngo zina ra Jesu.

¹⁹ Asi Pedru na Johani vechipingura, vakati kwavari: “Kuti kwakanaka mukuvona kwa Mwari kupurutana kwomuri kuno kupurutana kuna Mwari, guranyi imwimwi.

²⁰ Ngokuti atikoni kurega kuvereketa izvo zviro zvotakavona no zvatakazwa.”

²¹ Ndizvo apo vayinga vavakohomejisazve, vakavaregera kuti vaende, vasikawani ndava yokuti vavatambuje ndiyo, ngo ndava yo vandhu, ngokuti vandhu vese vaikuja Mwari ngo icho chakaitwa.

²² Ngokuti mundhu uwo wayiva no makore anopinda makumi marongomuna okubahwa kwake, uwo chivoniso ichi cho kuponeswa chakaitwa kwaari.

Mukumbiro wo vatendi

²³ Varegehwa kuti vaende, vakaviya kuno vandhu vavo, vakavaverengera zvese izvo zvovakananga kwavari vapristi vakuru no vakuru.

²⁴ Navo, apo vayinga vazwa, vakamusa izwi ravo kuna Mwari ngo chisungo chimwe, vakati: “A Mambo, iwewe ndiwe wakasika denga no nyika, no jombe, no zvese zviri mukati mwazvo;

²⁵ iwewe wakavereketa ndi Mweya Wakachena ngo muromo wo muranda wako, baba wedu Dhavhidha, kuti: Majinja anoita ushungu ngenyi, no vandhu vanotanda zvisina shwiro?

²⁶ Majimambo onyika akajironga mukurwa, no vatongi vakaungana, kumukira Jehovha, no kumukira Kristu wake.

²⁷ Ngokuti ngo gwinyiso vakaungana mu dhoropa iri kumukira Muranda wako Wakachena Jesu, uwo wo wakazoja, vese Herodhi na Pontio Piratu no majinja no vandhu vese vaIsraeri,

²⁸ kuyita izvo zvakaemeswa ngo pamberi ngo nyara yako na ngo kupanga kwako kuti zviyitike.

²⁹ Nazvino, Jehovha, ringira kukohomejisa kwavo, upe ku varanda vako kuti vaverekete izwi rako ngo kushinga, kukurutu,

³⁰ ngo kutambanuja nyara yako kuponesa; kuti zvivoniso no mishamiso zviyitike ngo zina ro Muranda wako Wakachena Jesu.”

³¹ Naapo vayinga vakumbira, ndau yakazungunyiswa apo povayinga vakaungana; navo vese vakazariswa ndi Mweya Wakachena, vakavereketa izwi ra Mwari ngo kushinga.

Kukovanisirana zviro

³² No mbungano yese yo avo vakatenda vayiva no mwoyo umwe, akuna naumwe wavo wainanga kuti zviro zvaaiva nazvo zvayiva zvake; asi zvese zvayiva zvavo vese.

³³ Na ngo simba guru vapostori vakayita chapupu cho kumuka kwa Mambo Jesu kwo vakafa; no nyasha huru yayiva panyezuru pavo vese.

³⁴ Ngokuti inga pasina naumwe pakati pavo waitama; ngokuti avo vayiva no minda nokuti nyumba, vakazvitengesa, vakazisa mitengo yo izvo zvakatengeswa,

³⁵ vakadira pa tshoka jo vapostori; nazvo zvakakovanisihwa kuna umwe ngaumwe kudari ngo kutama kwo mundhu.

³⁶ Na Josefa, uwo wakadujwa ngo vapostori kuti, Bharnabha, kunoti ngo kukumuchwa, Mwana wo kuembezehwa, muRevhi, mundhu wo Kupro ngoujinja,

³⁷ ano munda, wakautengesa, naye wakazisa mare, akaidira pa tshoka jo vapostori.