Zvak. 3 - NOVO TESTAMENTO EM NDAU

Kuponeswa kwo chirema

¹ Zvino Pedru na Johani vayikwira ku themperi ngo nguva yo kukumbira, kunoti, nguva yochipfumbamwe.

² No mundhu wakatikuti wayiva chirema kubvira mundani ya mayi wake, waitwahwa, uwo wo vaidira zuva ngo zuva pa musuvo wo themperi, unozwi, Wakanaka, kuti apembhe kwaavo vainghwina mu themperi.

³ Iye avona Pedru na Johani vooda kunghwina mu themperi wakapembha.

⁴ Asi Pedru, echimuringisisa, na Johani, wakati: “Ringira kwetiri.”

⁵ Naye wakavaringira, echigarira kuti unozopuwa chiro ndivo.

⁶ Asi Pedru wakati: “Sirivha no mukore, andina; asi icho chendinacho ndinokupa, ngo zina ra Jesu Kristu wo Nazaretha, muka ufambe.”

⁷ Naye wakamubata ngo nyara yo kumuho, akamumiruja; paripo tshoka jake no magodo o majiso o tshoka jake zvakagwinyiswa,

⁸ naye echinyanduka wakayima, wakatanga kufamba; wakanghwina navo mu themperi, echifamba, echinyanduka, echikuja Mwari.

⁹ No vandhu vese vakamuvona, echifamba, echikuja Mwari:

¹⁰ Navo vakaziva kuti ndiye uwo wayigara echipembha mare pa musuvo wo themperi unozwi, Wakanaka. Vakashamiswa no kukangaijwa ngo izvo zvayinga zvakaitika kwaari.

Kuchumaira kwa Pedru mu themperi

¹¹ Iye achabata Pedru na Johani, vandhu vese vakagogoma kuungana kwavari vari mu berere ra Saromona, vechishamiswa kakurutu.

¹² Naapo Pedru echivona, wakapingura kuna vandhu: “Imwimwi vanarume vaIsraeri, munoshamiswa ngenyi ngoichi? Nokuti kutiringisisa ingatei isimba redu, nokuti unaku hwedu zvayita kuti afambe?

¹³ Mwari wa Abrahama, no wa Isaka, no wa Jakobe, no wo majibaba edu, wakakuja muranda wake Jesu, uwo wo mwakapira imwimwi, mukamuramba pamberi po hope ya Piratu, apo iye ayinga ada kumusunungura.

¹⁴ Asi imwimwi mwakaramba uwo Wakachena, Wakarurama, mukakumbira kuti muurayi apuwe kwomuri.

¹⁵ Mwakauraya Muzvare wokupona; uwo waakamusa Mwari kwo vakafa; isisu tiri zvapupu ndikwo.

¹⁶ Ngo kugonda zina rake, uwu mundhu wo munovona no wo munoziva, kubudikija ngo kugonda muna Jesu kwayita kuti agwinye kudari pamberi penyu mwese.

¹⁷ Nazvino vakoma, ndinoziva kuti mwakazviita ngo kusikazivi, kudari ngo zvavakaitavo vatongi venyu.

¹⁸ Asi izvo zvaakapangijira Mwari ngo pamberi ngo muromo wo vaprofeti vese, kuti Kristu wake unozotambujika, iye wakazvizarisa kudaro.

¹⁹ Ndizvo tenderukanyi imwimwi mukunukuke kuti zvishaishi zvenyu zvitshukutijwe kuti ngokudaro kungaviya nguva jokumusihwa jinobva pamberi pa Mambo.

²⁰ Zve, kuti atume Kristu Jesu uwo wakaemesehwa kwomuri.

²¹ Kunosisira kuti uwo aashihwe mu denga mbhera kuguma mikuvo yo kumusijihwa kwo zviro zvese, yaakavereketa ndiyo Mwari ngo miromo yo vaprofeti vake vakacheneswa kubvira pakutanga.

²² Ngokuti Mosi ngo gwinyiso wakati: ‘Jehovha Mwari unozomubudisira muprofeti unobva pakati po hama jenyu, wakadari ndini; nemwi munozomupurutana kuzviro zvese zvaanozovereketa kwomuri.

²³ Kunozoitika kuti mundhu wese usikazopurutani kuno uwo muprofeti, unozourawa aembho kubva pakati po vandhu.’

²⁴ Eya, no vaprofeti vese kubvira kuna Samueri navo vese vakatevera, vese vakavereketa, avo navo vakavereketa ngaaya mazuva.

²⁵ Imwimwi muri vana vo vaprofeti, no vo chitenderano chaakaita Mwari no majibaba enyu, echiti kuna Abrahama, no ku rusinga rwako mbhuri jese jo mu nyika jinozodakajiswa.

²⁶ Kwomuri kutanga Mwari wakaemesa Muranda wake, akamutuma kuti amudakajise, ngo kutenderuja umwe ngaumwe wenyu kubva mu zvishaishi zvenyu.”