Zvak. 28 - NOVO TESTAMENTO EM NDAU

Pauri mu Merita

¹ Naapo taphujunyuka, takaziva kuti chirundu chaizwi Merita.

² No vagari vakatiitira nyasha huru, ngokuti vakabasa muriro, vakatiashira tese, ngo ndava yo mvura yaina, na ngo ndava yo kutondhora.

³ Asi apo Pauri ayinga aunganija huni, akajidira pa muriro, vhumbi rakabuda ngo ndava yo kupisa, rikaruma panyara yake.

⁴ Kwakati vagari vavona chikara chakaruma panyara yake, vakati umwe kuno umweni: “Ngo gwinyiso uwu mundhu uri muurayi, iye pikija akaphujunyuka kubva mujombe, kani kururama akumutenderi kuti apone.”

⁵ Asi iye wakazuzira chikara pa muriro, asikazivi kuremajwa.

⁶ Asi ivo vaikarakaja kuti unozozvimba, nokuti pamweni kuwa pasi ngokukasira, echifa; asi apo varindira kudaro mukuvo wakareba, vasikazivi kuvona chiro chakashata chechimugumira, vakakunukuja kupinimija kwavo, vakati, iye uri chimwari.

⁷ Zvino phedo pandau iyo payiva no minda ya mambo mukuru wo chirundu, zina rake raizwi Paubhurio; uwo wakatiashira akanasa kutingwarira mazuva matatu.

⁸ Kwakaitika baba wa Paubhurio vayiva vakavata vane mbhepo no nyoka jo kubudisa; kwavari Pauri wakanghwinemwo, akakumbira, echidira nyara jake panyezuru pavo, akavarapa.

⁹ Naapo izvi zvaitika, vamweni navo vayiva no ndhenda pa chirundu, vakaviya vakarapwa.

¹⁰ Avozve vakatireremeja ngo kureremeja kukuru; tohluza, vakakwija mu ngarava izvo zvotaitama.

Kubva Merita kuenda Roma

¹¹ Ngosure kwo mweji mitatu takahluza tiri mu ngarava yo kwa Arixandriya, iyo yayinga yakagara pachirundu mukuvo wo shipepo chese, chivoniso chaiyo chaizwi chimwari Manyambiri.

¹² Techiguma Sirakusi takagara apo mazuva matatu.

¹³ Tabva apo takaita kupoterera, takaguma Regio; ngosure kwo zuva rimwe dutu raibva ngo kakusi rakavhuvhuta, na ngo zuva rochipiri takaguma Potiyori.

¹⁴ Apo tavona vatendi, takaongwa kugara navo mazuva manomwe. Ngokudaro takaguma Roma.

¹⁵ Kubvira apo, vakoma vazwa ngo ndava yedu, vakaviya kutiashira, mbhera kuguma ku Musika wa Apiwu, no ku Hodhera Ndhatu. Apo Pauri avavona wakabonga Mwari, akashingiswa.

Pauri mu Roma

¹⁶ Naapo tanghwina mu Roma, nduna yo zana yakapira vasungwa kuno nduna yo chikwata cho masocha, asi Pauri wakatendehwa kugara ari ega, no socha raimungwarira.

¹⁷ Kwakaitika kuti ngosure kwo mazuva matatu, iye wakadanija pamwepo avo vayiva vakuru vo vaJudha. Naapo vayinga vaungana wakati kwavari: “Inini hama, pikija andizivi kuyita chiro chakashata kuno vandhu nokuti chirovejeso cho majibaba edu, asi ndakapihwa ndiri musungwa munyara jo vaRoma kubva Jerusarema.

¹⁸ Avo, apo vayinga vandibvunjisisa, vakada kundisunungura, ngokuti payinga pasina ndava yokuti ndiurawe.

¹⁹ Asi apo vaJudha vavereketa vechikanija, ndakanyumwa kuti ndikwije ndava yangu kuna Khesari: Haiwa kuti ndayiva no ndava yo kumangarira jinja rangu ndiyo.

²⁰ Ndizvo ngoiyi ndava ndakamudanija kuti ndimuvone no kuvereketa nemwi; ngokuti ngo ndava yo gonda ra Israeri ndinosungwa ngo ketani iri.”

²¹ Navo vakati kwaari: “Atizivi kuashira tshamba jakabva Judhiya, ngo ndava yako, akunazve umwe wo vakoma wakaviya pano kuverenga, nokuti kuvereketa chiro chakashata ndiwe.

²² Asi tinodisisa kuzwa ndiwe izvo zvounopinimija: Ngokuti ngo ndava yo chiunga ichi, kunozivikanwa kwetiri kuti kundau jese chinovereketwa zvakashata ndicho.”

²³ Naapo vayinga vamuemesera zuva, vakaviya kwaari vakawanda pandau yaaigara; wakavaverengujira, echipupura ngo Umambo hwa Mwari, echivaonga ndiye Jesu, kubvira mipango yese ya Mosi no zve vaprofeti, kubvira mangwanani mbhera madeikoni.

²⁴ No vamweni vakatenda izvo zvakavereketwa, no vamweni avazivi kuzvitenda.

²⁵ Ndizvo avazivi kutenderana pachavo, vakabvapo, ngosure Pauri ayinga avereketa izwi rimwe, kuti: “Mweya Wakachena wakanasa kuvereketa ndi Isaya muprofeti, kuno majibaba enyu,

²⁶ echiti: ‘Enda kuno ava vandhu, wechiti; ngokuzwa munozwa, musikazozwisisi, no kuvona munozovona, musikazovonesesi.

²⁷ Ngokuti mwoyo yo ava vandhu yakakonza, no njeve javo ajizwisisi, no majiso avo vakaabvubvumarisa; dangani vangavona ngo majiso avo, vazwe ngo njeve javo, no kuzwisisa ngo mwoyo yavo, vatenderuke neni ndivaponese.’

²⁸ Ndizvo ngakuzivikanwe kwomuri kuti urwu ruponeso rwa Mwari runotumihwa ku majinja; navo vanozozwavo.”

²⁹ (Naapo ayinga avereketa mazwi aya, vaJudha vakaenda, vechiitirana hasha huru).

³⁰ Naye wakagara makore maviri ese ari mu nyumba yake yairipira ngo mare, echiashira avo vese vainghwinemwo,

³¹ echichumaira Umambo hwa Mwari no kujijisa ngo zva Mambo Jesu Kristu ngo kushinga kwese, pasina naumwe waimurambisa.