Zvak. 27 - NOVO TESTAMENTO EM NDAU

Pauri wakahluza kuenda Roma

¹ Naapo kwakaemeswa kuti tihluze kuenda Itariya, vakapira Pauri no vasungwa vamweni vakatikuti kunduna yo zana yaizwi ndi Jurio wo hondo ya Agustu.

² Techinghwina mu ngarava ya Adramitiyo, yaida kuhluza kuenda kundau jiri kumbhiri kwo jombe ro Aziya, takahluza, Aristaku mu Makedhoniya wakabva Tesaronika, wayiva nesu.

³ Ngo zuva raitevera takaguma Sidhoni; na Jurio wakamubata Pauri zvakanaka, wakamutendera kuti aende kuno shamwari jake, kuti ambopeperehwa.

⁴ Techihluza kubvapo, takaparura ngo pakachitirika po Kupro, ngokuti dutu raita maringwa nesu.

⁵ Apo tainga tahluza kuambuka jombe riri phedo no Kirikiya, no Pamfriya, takaguma Mara, rayiva dhoropa ro Rukiya.

⁶ Naapo nduna yo zana yakavona ngarava yo Arixandriya, yaihluza kuenda Itariya; nayo yakatinghwinisemwo.

⁷ Naapo tainga tahluza padoko-padoko mazuva mazhinji, tikaguma tatambujika apo pakaita maringwa no Kinidho, dutu risikatitenderi kugumeyo, takahluza kuenda pakachitirika po Krete, apo pakaita maringwa na Saramoni.

⁸ Ngokutambujika takahluza phedo po mbhiri yayo, tikaguma kundau yaidanijwa, Maambukiro Akanaka; phedo pawo payiva no dhoropa ro Rasiya.

⁹ Naapo mukuvo wakareba wapera, no kufamba ngo mu kumwa kwayinga kwaano ngozi zvino, ngokuti mukuvo wo mushongano wo kuera kuha inga wapinda, Pauri wakangwaja,

¹⁰ akati kwavari: Vanarume, ndinovona kuti muhambo wo kuhluza uku unozoitwa ngo kushaishihwa no kurashikihwa ngo zvakawanda, andizvopi zvega zvo mitwaro no ngarava, asi no kupona kwedu.

¹¹ Asi nduna yo zana yakapindisisa kupurutana kuno uwo wayiva mukuru no mune wo ngarava kupinda izvo zvakavereketwa ndi Pauri.

¹² Ngokutizve maambukiro ayinga asikazivi kukura kwokuti kungagahwa apo kupeja nguva yo shipepo; uzhinji hwavo vakapangana kuhluza kubvapo, kuti vagume ngo njira nokuti ngeiri ku Fenike, no kugara apo nguva yo shipepo; ndau iyo iri maambukiro wo Krete, inoringira kumavirira zuva a njikazi, no kumavirira zuva a kusi.

Dutu guru mu jombe

¹³ Apo dutu ro kakusi rakavhuvhuta padoko-padoko, avo vechikarira kuti vakavona chevaida, vakamiruja thanga, vakahluza kuteverera Krete, phedo no mumbhiripiri.

¹⁴ Asi ngosure kwo mukuvo mudoko mbhepo huru yechibva pharamande ya njikazi, yakatigumira, inozwi Urakuroni.

¹⁵ Naapo ngarava yakabatwa, isina simba ro kuenda mberi kunobva dutu, takarega, tikatindhwa ndiro.

¹⁶ Techihluza kuenda pachirundu chidoko pakachitirika chinozwi Kraudha, takakona ngo kutambujika kusunga ngarava doko.

¹⁷ Apo vapeja kuikwija, vakashandisa zvinobesera, vechisunga ngarava ngopasi; navo vechitya kuti vanozokandihwa pamvungu yo Siratisi, vakabzusa machira okuhluza, ngokudaro takatindhwa.

¹⁸ Techifamba kukurutu ngo muvhumo na ngo zuva raitevera vakatanga kurasha mitwaro mu jombe;

¹⁹ ngo zuva rechitatu vakatanga kurasha mijiyo jo ngarava ngo nyara javo.

²⁰ Naapo zuva nokuti ndhondo azvizivi kujeka kwo mazuva mazhinji, no mubvumo mukuru wayiva panyezuru pedu, gonda rese rokuti tinozopona rakapera.

²¹ Naapo vayinga varega kuha mukuvo wakareba, Pauri wakayima pakati pavo, akati: “Vanarume kwaipinda kunaka kudari mwakapurutana kwendiri, musikazivi kuhluza kubva Krete, musaizowana kutambujika uku, no kurashikihwa.

²² Zvino ndinomupanga kuti mushinge; ngokuti akuna mundhu unozofa pakati penyu, asi kwega kwengarava.

²³ Ngokuti kwakaima phedo pangu usiku huno ngirosi ya Mwari, wo ndiri wake, no wo ndinoshandira,

²⁴ yechiti: ‘Usatya Pauri, kunosisira kuti uime pamberi pa Kesari; vonayi Mwari wakakupavo vese avo vanohluza newe.’

²⁵ Ndizvo, vanarume, shinganyi; ngokuti ndinogonda Mwari kuti kunozoitika kudari ngo zvaakavereketa kwendiri.

²⁶ Asi, kunosisira kuti tikandihwe pa chirundu chakatikuti.”

Vese vakapona kubva pakundondomera

²⁷ Asi apo usiku hwo chigumi na hurongomuna hwaguma, tichandotindhwa apo naapo mujombe ro Adriya, kwoita pakati po usiku vashandi vo ngarava vakakarakaja kuti vaikwedera phedo po nyika yakatikuti.

²⁸ Navo vakapima kujika kwo kumwa, vakavona kuti ayiva mamitha makumi marongomuna. Ngosure kwo kuhluza ndharauko doko, vakapimazve, vakavona kuti ayiva mamitha makumi matatu.

²⁹ Vechitya kuti pamweni tingazorovehwa kumbhiri kundau ine mapuwe, vakarikha nanga murongomuna, kubvira ngosure kwo ngarava, vakadisisa kuti kueje.

³⁰ Apo vashandi vongarava vachapshaka kutiza kubva mu ngarava, vakabzusa ngarava doko mujombe, vechiita kudari ngo vanokhandira nanga kubvira ngo mberi kwo ngarava.

³¹ Pauri wakati kuno nduna yo zana no kumasocha: “Kunja kwokuti ava vagare mu ngarava, amungaponi.”

³² Naapo masocha akacheka mapote o ngarava doko, akairegera kuti iwe.

³³ Naapo kwaeja, Pauri, wakavapota kuti vese vahe, echiti: “Zuva iri raarochigumi na marongomuna romunogara mwechirega kuha, musina cho mwakatongoha.

³⁴ Ndizvo ndinomupota, kuti muhe; ngokuti uku kuri kungwaririka kwenyu; ngokuti akuna no rubvuji runozotsakatika kubva mumusoro wo umwe wenyu.”

³⁵ Naapo ayinga avereketa izvi, wakatora chimanda, akachibonga kuna Mwari pamberi pavo vese: Naye wakachigura, wakatanga kuha.

³⁶ Naapo vakashingiswa vese, vakatoravo kuha.

³⁷ Nesu tese taiva mu ngarava taiva vandhu vayiva mazana maviri no makumi manomwe na vatandhatu (276).

³⁸ Apo vayinga vaguta, vakarerusa ngarava, vechirasha koroni mujombe.

³⁹ Naapo kwaeja, avazivi kuziva iyo nyika. Asi vakavona manghwiniro akatikuti ano mbhiri ine mvungu, vakapangana kuti vangakona here kuhluza ngarava kuidira panyezuru payo.

⁴⁰ Vakacheka mapote onanga vakajisiya mujombe, ngo uwo mukuvo vechisunungura mapote aisunga shikiro cho ngarava vechikwija machira okuhluza omberi kuno dutu vakaaringisisa kumbhiri.

⁴¹ Asi vechiguma pandau panoshongana majombe maviri, vakaimisa ngarava pa mvungu; no mberi kwo ngarava kwakaimiswa, kwakagara kusikatsukunuswi, asi rutivi rwayo rwesure rwakatanga kuphwanywa ngo mavimbi.

⁴² No kupangana kwo masocha kwayiva kwokuuraya vasungwa, kuti vamweni vavo vasazoshambira kubuda no kupokonyoka.

⁴³ Asi nduna yo zana, yechidisisa kuponesa Pauri, yakavapinga kubva kwo kukarakaja kwavo; yakavapanga kuti avo vaikona kushambira vajikandire mujombe, vagume ku nyika.

⁴⁴ No vakasara, vamweni panyezuru po mapuranga, nokuti panyezuru po zvigurwa zvo ngarava. Ndizvo zvakaitika kuti vese vakapokonyokera ku nyika vakangwaririka.