Zvak. 26 - NOVO TESTAMENTO EM NDAU

Pauri unodurujira ndava yake kuna Agripa

¹ Na Agripa wakati kuna Pauri, “unotendehwa kujivereketera.” Naapo Pauri wakatambanuja nyara yake, akajirwira:

² “Ndinopinimija kuti ndinomuchena ngokuti ndinozojipingurira pamberi pako ngo iri zuva, ngo ndava yazvo zvese zvo ndinomangarihwa ngo vaJudha.

³ Kakurutu ngokuti unonasa kuziva zvirovejeso no mibvunjo yese iri mukati mwo vaJudha. Ndizvo ndinomupota kuti undizwe ngo kusengerera.

⁴ Njira yo kupona kwangu kubvira muupsha hwangu ukwo kunobvira mukutanga kwayiva pakati po avo vo jinja rangu mu Jerusarema, vaJudha vese vanoiziva.

⁵ Vaindiziva kubvira mukutanga, kudari vaitenda kupupurira, kuti ngo njira yakapindisisa kurungama yo kudira kwedu, ndakapona ndiri mufarisi.

⁶ Nazvino ndinoima pano kutongwa ngo ndava yo gonda ro chigondiso icho chakaitwa kuna majibaba edu ndi Mwari.

⁷ Kuno icho chigondiso majinja edu ari gumi na maviri, echigwinyisisa kushandira Mwari usiku no masikati anogonda kuchiashira. Ngo ndava yo ichi chigondiso ndinoitihwa ndava ngo vaJudha, mambowe!

⁸ Kunoverengwa ngenyi ndimwi kuti chiro chisikatendeki kuna Mwari kuti Mwari amuse vakafa?

⁹ Inini ngo gwinyiso ndakapinimija mukati mwangu kuti kunosisira kuti ndiite zvakawanda zvinorwisana no zina ra Jesu wo Nazaretha.

¹⁰ Ndakaita izvi mu Jerusarema; ndakapakija vazhinji vo vakacheneswa mu guniya, ndechipuwa simba kubva kuna mupristi mukuru, naapo vaiurawa, ndakatenderavo kurwijana navo.

¹¹ Ndechivatambuja kazhinji mu nyumba jo kudira, ndakaeja kuyita kuti vatuke Mwari; ndine ushungu hukuru kwavari ndakavatambuja mbhera kuguma ku madhoropa omajinja amweni.

¹² Ndichaiita izvi, ndechifamba kuenda mu Dhamaseku, ndine simba no kutumwa ngo vapristi vakuru,

¹³ ngo mukuvo wo masikati, mambowe, ndakavona ndiri mu njira kwakabva kujeka kwo mu denga, kupinda kwo zuva, kwechijeka kunditendeneja naavo vaifamba neni.

¹⁴ Naapo takawa tese pasi, ndakazwa izwi rechiti ngo chiHebheru, Sauri, Sauri, unonditambujirenyi? Kunonesa kwouri kudarika pamachocho anopinza.

¹⁵ Neni ndakati: Uriyani Mambo? Na Mambo wakati, Ndiri Jesu wounotambuja.

¹⁶ Asi miruka, uime ngo tshoka jako; ngokuti ndavoneka kwouri ngo iyi ndava, kuti ndikuemese kuti uite mushandi no mupupuri kuno izvo zvowavona, nokune izvo zvo ndinozovoneka kwouri ndizvo;

¹⁷ ndechikununurira kubva kuno vandhu vese, no kubva kuno vo majinja, avo vo ndinokutumira kwavari,

¹⁸ kubewura majiso avo, no kuvatenderuja kuti vabve muchidima, vanghwine mukujeka, no kubva ku simba ra Sathani kuviya kuna Mwari, kuti vaashire kuregerehwa kwo zvishaishi, kuti vagare ndhaka mukati mwo avo vakacheneswa, ngo kugonda kwendiri.

¹⁹ Ndizvo mambowe, Agripa, andizivi kuramba kupurutana chivoniso cho mu denga:

²⁰ Asi ndakatanga kupangijira kwavari vese vo Dhamaseku no mu Jerusarema, no mu nyika mwese mwo Judhiya, nokune vo majinjazve kuti vatenderuke, vakunukukire kuna Mwari, vechiita mishando inosisira vakatenderuka.

²¹ Ngo iyi ndava vaJudha vakandibata ndiri mu themperi, vakaeja kundiuraya.

²² Ndizvo ndechivona kubesehwa kunobva kuna Mwari, ndichakaima na nyamasi, ndechipupura kwavari vese vadoko no vakuru, ndisikanangi chiro chimweni ngokunja kwo izvo zvovakananga vaprofeti na Mosi kuti zvinozoviya.

²³ Kuti kunosisira kuti Kristu atambujike, nokuti ayite mutanguro wo kumuka kwo vakafa, kuti achumairezve kujeka ku vandhu vedu nokune vo majinja.”

²⁴ Achajirwira kudaro; Festu wakadanijira ngo izwi guru: “Pauri, unopenga; kujija kwako kukuru kunokupengesa.”

²⁵ Asi Pauri wakati: “Andipengi akadi, Festu unoreremejeka, asi ndinovereketa mazwi ano gwinyiso no njero.

²⁶ Ngokuti mambo unoziva ngo ndava yo izvi uwozve pamberi pake ndinovereka ngo kusununguka: Ngokuti ndinoongwa kuti akuna chimwe cho izvi chakafishika kwaari; ngokuti izvi azvizivi kuitika pakachitirika.

²⁷ Mambo Agripa, unotenda here matahwa wo vaprofeti? Ndinoziva kuti unozvitenda.”

²⁸ Na Agripa wakati kuna Pauri: Ngokuonga kudodoko unozondiita muKristu.

²⁹ Na Pauri wakati: “Ndingada pamberi pa Mwari kuti, ngokadodoko pikija ngokazhinji, andiwepi wega, asi avo vese vanondizwa nyamasi vanoyita vakadari ndini, ngokunja kwo izvi zvisungo.”

³⁰ Naapo mambo wakamiruka, no mutongi, na Benike, naavo vaayigara navo.

³¹ Naapo vayinga vatorana kuyita chinyangore, vakapangana umwe kuno umweni, vechiti: “Mundhu uwu aazivi kuyita chiro chinosisira kuti aurawe, nokuti asungwe.”

³² Na Agripa wakati kuna Festu: “Mundhu uwu kudari ayinga asikazivi kukumbira kuti ndava yake ikwijwe kuna Khesari, inga asununguhwa.”