Zvak. 25 - NOVO TESTAMENTO EM NDAU

Pauri unongwaja mambo

¹ Ndizvo Festu aguma munyikeyo, ngosure kwo mazuva matatu wakakwira Jerusarema, echibva Khesariya.

² No vapristi vakuru no vakuru vo vaJudha vakamuverengera ndava ya Pauri, vakapota kwaari,

³ vechimukumbira kuti avadakajise ngokuyita kuti Pauri, amutumire kuviya Jerusarema; kuti vamuuraye mu njira ngo kufishika.

⁴ Asi Festu wakapingura kuti Pauri angwarihwe mu Khesariya, nokuti iye wayida kukasira kuendeyo.

⁵ Wakati: Ndizvo ngavabzuke neni avo vane simba pakati penyu, nokudari iripo ndava kuno uwo mundhu, ngavamumangarire.

⁶ Naapo ayinga agara pakati pavo mazuva asikapindi masere nokuti ari gumi, iye wakabzuka kuenda Khesariya; na ngo zuva raitevera, wakagara pachigaro cho kutonga ndava, akapanga kuti Pauri aviyiswe.

⁷ Naapo aviya, vaJudha avo vakabzuka vechibva Jerusarema vakayima vechimutendeneja, vechimuitira ndava jakawanda, no zvakashata, jovasaikona kupangijira pambhene.

⁸ Naapo Pauri mukujirwira kwake, wakati: “Andizivi kushaisha kugura mipango yo vaJudha, nokuti ku themperi, nokuti kuna Khesari.”

⁹ Asi Festu, echida kudiwa ngo vaJudha, wakapingura Pauri, akati: “Unotenda here kukwira Jerusarema, utongwe ngo iji ndava pamberi pangu?”

¹⁰ Asi Pauri wakati: “Ndinoima pachigaro cho kutonga cha Khesari, apo panosisira kuti nditongwe: Andizivi kuyita chiro chakashata ku vaJudha, kudari ngo zvo unonasa kuziva iwewe.

¹¹ Ndizvo kudari ndiri unoyita zvakashata, ndakaita chinosisira kuti ndife, andirambi kufa akadi; asi kudari pasina gwinyiso kuno izvo zvo vanondiitira ndava ndizvo ava, apana mundhu ungandipira kwavari. Ndinopota kuti ndava yangu ikwijwe kuna Khesari.”

¹² Naapo Festu ayinga apangana no bangano, wakapingura kuti: “Iwewe wapota kuti ndava yako ikwijwe kuna Khesari. Unozoenda kuna Khesari.”

Pauri pamberi pa Agripa

¹³ Zvino ngosure kwo mazuva akatikuti, mambo Agripa na Benike vakaguma Khesariya, vakachungamija Festu.

¹⁴ Navo vachagara apo mazuva mazhinji, Festu wakaverenga ndava ya Pauri pamberi pa mambo, echiti: “Uri pano mundhu wakatikuti wakasiiwa ari wakasungwa ndi Ferikisi.

¹⁵ Ndiye, apo ndayiva mu Jerusarema vapristi no vakuru vo vaJudha vakandiverengera ndava, vechikumbira kuti atongwe.

¹⁶ Kwavari ndakapingura kuti andichopi chirovejeso cho vaRoma kuti vapire mundhu nokuti ngouri kuti atambujwe, asati avonana hope kuhope no uwo unomumangarira, awane mukuvo wo kujirwira ngo ndava yaanoitihwa.

¹⁷ Ndizvo apo vaungana pano, andizivi kunonoka, asi ngo zuva raitevera ndakagara pasi pachigaro cho kutonga ndava, ndakapanga kuti uwo mundhu aviyiswe.

¹⁸ Ngo ndava yake, vaimumangarira vaiyima, avazivi kuitira ndava yo zvakashata yo ndakakarira.

¹⁹ Asi vakamuyitira ndava yo mibvunjo ngo ndava yo kudira kwavo, na ngo ndava yo umwe Jesu, wakafa, waakagwinyisisa Pauri kuti unopona.

²⁰ Ndechikangaijwa ngo njira yo kubvunjisa ngo izvo zviro, ndakamubvunjisa kuti ungatenda kuenda Jerusarema, atongwe apo ngo ndava iji.

²¹ Asi apo Pauri akumbira kuti angwarihwe mbhera ndava iguhwe ndi mambo mukuru, ndakapanga kuti angwarihwe mbhera ndimutume kuna Khesari.”

²² Na Agripa wakati kuna Festu: “Inini ndingada kuti ndimuzwe mundhuwo pachangu.” Iye wakati: “Mangwana unozomuzwa.”

²³ Ndizvo ngo zuva raitevera apo Agripa aviya na Benike, no uthende hukuru, vanghwina kundau yo kupurutana ndava, pamwepo no vajimbahwe vakuru, no vakuru vo dhoropa, ngo kupanga kwa Festu, Pauri wakanghwiniswa umwo.

²⁴ Na Festu wakati: “Mambo Agripa, no vandhu vese vari pano nesu, munovona mundhu uwu, uwo wo vakaitira ndava mbungano yese yo vaJudha, vese vo mu Jerusarema, no vo pano, vechidanijira kuti aasisiri kuti aponezve.

²⁵ Asi inini ndakavona kuti aazivi kuyita chiro chinosisira kuti aurawe; na ngokuti iye ambhwine wakakumbira kuti ndava yake ikwijwe kuna mambo mukuru, ndakaemesa kumutumireyo.

²⁶ Asi andina chiro chino gwinyiso cho kutara kuna mambo wangu. Ndizvo ndakamuzisa pamberi penyu, kakurutu pamberi pako mambo Agripa, kuti ngosure kwokupshakisira ndingatozowana cho kutara.

²⁷ Ngokuti kwendiri kunovoneka chiri chiro chisina shwiro, mukutuma musungwa, kusikapangijihwi ndava jaanomangarihwa ndijo.”