Zvak. 24 - NOVO TESTAMENTO EM NDAU

Pauri unojirwira pamberi pa Ferikisi

¹ Ngosure kwo mazuva mashanu, Ananiya mupristi mukuru wakabzuka pamwepo no vakuru vakatikuti, no umweni wayiva muvereketi, waizwi ndi Teturu, navo vakaverengera mutongi kuitira ndava Pauri.

² Naapo adanijwa, Teturu wakatanga kumuitira ndava, echiti: “Kwechivoneka kuti tinodakara mukunyarara kukurutu ndiwe, no zvakashata zvinonasirihwa kuno iri jinja ngo nyasha jako.

³ Tinozviashira ngo njira jese no kundau jese, Ferikisi wakanasa kunaka, ngo kubonga kukurutu.

⁴ Asi kuti ndisakupejera nguva, ndinokupota kuti undizwe ngo nyasha jako mazwi mashomani.

⁵ Ngokuti takamuvona uwu mundhu kuti wayiva munyajiri no muambi wo kumukira pakati po vaJudha vese vo nyika jese, no mutungamiriri wo chikwata cho vaNazareta.

⁶ Uwozve wakaeja kusvipisa themperi, takamusunga: [Takada kumutonga kudari ngo mipango yedu.

⁷ Asi mujimbahwe mukuru Rusiya wakaviya akamubvuka ngo simba guru kunyara jedu].

⁸ Echipanga avo vanomuitira ndava kuti vaviye kwouri; ngokumubvunjisisa wambhwine, unozokona kuziva izvi zvese zvotinomuitira ndava ndizvo.”

⁹ No vaJudha vakapindirira kumuitira ndava, vechigwinyisisa kunanga kuti, izvi zvakadaro.

¹⁰ Naapo mutongi ayita chivoniso kwavari kuti averekete, Pauri wakapingura kudari: “Ngokuti ndinoziva kuti iwewe wayiva mutongi wo jinja iri makore mazhinji, ndizvo ndinodakara ngo kujirwira.

¹¹ Ungaziva kuti akuzivi kupinda mazuva ari gumi na maviri kubvira ngo nguva yo ndakakwira Jerusarema koodira.

¹² Zve, avazivi kundivona mu themperi ndechiitirana hasha no mundhu nokuti ngouri, nokuti ndechiveruja mbungano, pikija mu nyumba jo kudira, nokuti mu dhoropa.

¹³ Zve, avangakoni kupangijira gwinyiso ro izvo zvo vanondiitira ndava ndizvo ngo nguva ino.

¹⁴ Asi izvi ndinotenda kwouri, kuti kudari ngo Njira yo vanoduja kuti kupaukisa, ngokudaro ndinoshandira Mwari wo majibaba edu, ndichitenda zvese zviri zvo mipango, no izvo zvakatahwa mu tshamba jo vaprofeti.

¹⁵ Ndino kugonda kuna Mwari, ukwo kwovanoveteravo ava, kuti kunozovapo kumuka kwo vakafa, kwo vese vakarurama no kwo vasikazivi kururama.

¹⁶ Ngo iyi ndava ndinoeja pachangu kugara ndino mwoyo usina ndava kuna Mwari, no kuna vandhu nguva jese.

¹⁷ Zvino sure kwo makore akawanda, ndakaviya koopa zvikovero no zvipo kuno vo jinja rangu.

¹⁸ Mukuita izvi vakandivona ndakacheneswa, ndiri mu themperi, pasina no mbungano nokuti hohohozve. Asi kwayivapo vaJudha vakatikuti vakabva Aziya,

¹⁹ avo kwaidikana kuti vave pano pamberi pako, no kundiitira ndava, kudari vane ndava kwendiri.

²⁰ Nokuti ava vanarume vari pano ngavanange kushata kwovakavona kwendiri, ngoiyo nguva yo ndakaima pamberi po bangano,

²¹ kwega izwi rimwe rondakadanijira ndakaima pakati pavo, rokunanga ngo kumuka kwo vakafa, ndiro ro ndinoitihwa ndava nyamasi pamberi pako.”

²² Asi Ferikisi, echiziva kakurutu ngo ndava yo Njira iyi, wakavabvunja kuti vaimire, echiti: “Apo Rusiya mujimbahwe mukuru obzuka, ndinozokwarisisa ndava yenyu.”

²³ Naye wakapanga nduna yo zana kuti iye angwarihwe akasununguka, nokuti kusarambiswa shamwari jake kuti jimushandire.

Pauri mu guniya

²⁴ Asi ngosure kwo mazuva akatikuti, Ferikisi wakaviya na Drusira mukaji wake, wayiva muJudha, naye wakadanija Pauri, akamuzwa ngo rutendo ruri kuna Kristu Jesu.

²⁵ Naapo aipangijira ngokururama, no kujibata, no kutongwa kunozoviya, Ferikisi wakahuta, akapingura: “Enda hako zvino, apo ndazowana mukuvo kwawo, ndinozokudanijazve.”

²⁶ Iye wayiva no gondazve rokuti unozopuwa mare ndi Pauri. Ndizvozve wakamudanija mukuvo mizhinji echipangana naye.

²⁷ Asi apo makore maviri apera, Ferikisi wakachindwa ndi Pikio Festu; na Ferikisi echida kudiwa ngo vaJudha, wakasiya akandosungwa.