Zvak. 23 - NOVO TESTAMENTO EM NDAU

¹ Na Pauri echiringisisa bangano, wakati: “Vamuna, vakoma ndakapona ndisina ndava mu mwoyo pamberi pa Mwari mbhera kuguma zuva iri.”

² No mupristi mukuru Ananiya wakapanga avo vaiyima phedo pake kumurova muromo.

³ Naapo Pauri wakati kwavari: “Mwari unozokurova iwewe biravira rakachena; unogara here kunditonga ngo mipango, no kupanga kuti ndirohwe ngo njira inopesana no Mipango?”

⁴ Naapo vaiyima phedo vakati: “Unotuka mupristi mukuru wa Mwari here?”

⁵ Na Pauri wakati: “Ndisaiziva, hama, kuti uri mupristi mukuru; ngokuti kwakatahwa, kuti: Usazovereketa zvakashata ngo mutongi wo vandhu vako.”

⁶ Asi apo Pauri ayinga avona kuti rupande rwavo rumwe rwaiya vasadhusi no rumweni rwaiya vafarisi, wakadanijira mumbungano: “Vakoma, ndiri mufarisi, mwana wo vafarisi. Ngo ndava yo kugonda kumuka kwo vakafa, ndinotongwa.”

⁷ Naapo adaro, yakamuswa hasha pakati po vaFarisi no vasadhusi; no chiunga chakaparajana.

⁸ Ngokuti vasadhusi vanoti, kuti, akuna kumuka kwo vakafa, zve akuna ngirosi, nokuti mweya; asi vafarisi vanotenda izvo zvese.

⁹ Naapo kwakamuka hohoho huru; vamweni vo vatari, vaitenderana no vafarisi, vakamiruka, vakatukana, vechiti: Atiwani kushata kuno uwu mundhu, zvinenyi, kudari mweya wakavereketa kwaari, nokuti ngirosi?

¹⁰ Naapo kwamuswa hasha huru, mujimbahwe mukuru, echitya kuti Pauri unozopfajuhwa ndivo wakapanga masocha kuti abzuke amubvuke ngo simba kubva kwavari no kumujimbahwe.

¹¹ Asi ngo usiku hwaitevera, Mambo wakayima phedo pake, akati: “Wechishinga; ngokuti kudari ngo zvowakaita chapupu ndini mu Jerusarema, ngokudaro kunosisira kuti uite chapupu mu Roma.”

Bangano rokuda kuuraya Pauri

¹² Kwakati kwoeja, vaJudha vakaungana, vakajisunga ngo mbhiko yokuti, avazohi nokuti kumwa mbhera vamuuraye Pauri.

¹³ Naavo vakatanda iri zano vayiva vanopinda makumi marongomuna.

¹⁴ Navo vakaviya kuno vapristi vakuru no vakuru, vechiti: “Tajisunga ngo mbhiko huru yokuti, atizoraviri chiro mbhera tamuuraya Pauri.

¹⁵ Ndizvo zvino imwimwi pamwepo no bangano, bvunjanyi mujimbahwe mukuru kuti amubzuse kwomuri kunonga munoda kunasa kupshakisisa ndava yake. Nesu apo okwedera tanasirira kumuuraya.”

¹⁶ Asi mwana wo hanzaji ya Pauri wakazwa ngo ndava yo kumuvandira kwavo, naye wakaviya, akanghwina mujimbahwe, akazivisa Pauri.

¹⁷ Na Pauri wakadanija kwaari, imwe yo nduna jo zana, akati: “Enda no iri jaha kuno mujimbahwe mukuru; ngokuti rinaro chiro cho kumubvunja.”

¹⁸ Ndizvo yakaenda naro kuno mujimbahwe mukuru, yakati: “Pauri mubhanditi wandidanija kwaari, akakumbira kuti ndizise iri jaha kwouri rinacho cho kuvereketa kwouri.”

¹⁹ No mujimbahwe mukuru wakamubata ngo nyara, akaenda naye akaribvunjisa ngo kufishika, kuti: Chinyi chounoda kundibvunja?

²⁰ Naro rakati: “Vajudha vatenderana kookumbira kuti ubzuse Pauri mangwanani kuno bangano, kunonga vanoda kupshakisisa chiro ndiye.

²¹ Ndizvo usazotenda kwavari; ngokuti vanozomuvandira vanarume vanopinda makumi marongomuna, avo vajisunga ngo mbhiko yokuti avazohi nokuti kumwa mbhera vamuuraye. Nazvino vanasirira, vechiringira chigondiso chinobva kwouri.”

²² Ndizvo mujimbahwe mukuru wakatendera kuti jaha riende, echiripangisira kuti: “Usazobvunja mundhu kuti wazivisa ichi kwendiri.”

Pauri unotohwa kuenda Khesariya

²³ Naye wakadanijira kwaari nduna mbiri jozana, akati: “Nasiriranyi masocha ari mazana maviri (200), no vanogadha mahachi vari makumi manomwe, no vane mikhondo vari mazana maviri (200), okuenda Khesariya ngo nguva yochitatu yo usiku.

²⁴ Munasirire zvifuyo kuti mugadhise Pauri panyezuru pazvo, mumugumise wakangwaririka kuna Ferikisi mutongi.”

²⁵ Naye wakatara tshamba kudari:

²⁶ “Kraudhiyo Rusiya unomuchingamija imwimwi mambo wakanasa kunaka Ferikisi.

²⁷ Uwu mundhu wakabatwa ngo vaJudha, wayinga ooda kuurawa ndivo, apo ndakaguma kwavari no masocha ndikamuponesa, inga ndazwa kuti uri mu Roma.

²⁸ Ngokuti ndaida kuti ndizive ndava yo vakamuyitira, ndamubzusa kuenda naye kubangano ravo:

²⁹ Uwo ndakamuvona kuti, wakaitihwa ndava yo mibvunjo yo mipango yavo, asi inga asina ndava yakaitirwa kwaari inosisira kuti aurawe, nokuti asungwe.

³⁰ Naapo kwakapangijihwa kwendiri kuti kunotandiwa zano ro kurwa no uwu mundhu, paripo ndakamutuma kwomuri, ndechipangirazve avo vakamuyitira ndava kuti vaverekete kurwisana naye pamberi pako.”

³¹ Ndizvo masocha, kudari ngo zvaakapangijihwa, akatora Pauri akamuzisa usiku Antipatri.

³² Asi ngo zuva raitevera akasiya vanogadha mahachi kuti vaende naye, akahwirira jimbahwe.

³³ Naavo vaguma Khesariya, vakapa tshamba kuno mutongi, vakadira Pauri pamberi pake.

³⁴ Naapo waijija, wakabvunjisa kuti wayiva wo nyika iri; naapo aziva kuti wayiva wo Kirikiya,

³⁵ wakati ndinozozwa ndava yako, apo vaguma avo vanokumangarira. Wakapanga kuti angwarihwe mujimbahwe mwa Herodhi.