Zvak. 20 - NOVO TESTAMENTO EM NDAU

Pauri mu Makedhoniya no mu Giriki

¹ Ngosure bope ranyarara, Pauri wakadanija vajiji, no kuvapanga, wakavaeneka, wakabvapo kuenda Makedhoniya.

² Naapo afamba ndau ijo, echivapangisisa ngo mazwi mazhinji, wakaguma Giriki.

³ Naapo apeja mweji mitatu arimwo, no vaJudha vayinga vamutandira zano, apo achada kuhluza kuenda Siriya, wakajiemesera kuti unozohwirira echifamba ngo mu Makedhoniya.

⁴ Vakamuperekeja kuguma Aziya, vayiva Sapatro wo Bhereya mwana wa Puro na Aristaku, na Sekundo vo Tesaronika, na Gaiyo wo Dherbhe, na Timoti; na Tikiku na Trofimu vo Aziya.

⁵ Asi avo vakatungamira mberi, vakatigarira mu Trowa.

⁶ Nesu takahluza kubva Firipi ngosure kwo mazuva o chimanda chisina mumera, takaguma kwavari mu Trowa ngosure kwo mazuva mashanu; takagara apo mazuva manomwe.

Pauri mu Trowa

⁷ Na ngo zuva ro kutanga ro vhiki, apo taungana kugura chimanda, Pauri wakavereketa kwavari, echida kubvapo ngo zuva raitevera; wakarebesa kuvereketa kwake mbhera pakati po usiku.

⁸ Zvayivapo zvivheneko zvakawanda mukamera ro muturika apo potakaungana.

⁹ Jaha rakatikuti raizwi ndi Utiku rayiva rakagara pa fasitera, rakanyiswa ngo hope jo majikirira; na Pauri acharebesa kuvereketa kwake, iro rechinyiswa ngo hope jaro, rakawa kubva kumuturika wochitatu, navo vakarimusa, rafa.

¹⁰ Na Pauri wakabzuka, akakotama panyezuru pake, akamufungatira, akati: “Musaita joweyowe; ngokuti uchapona.”

¹¹ Naapo akwira mu muturika, wakagura chimanda, akaha, no kuvereketa navo mukuvo wakareba, mbhera kwakaeja, ngokudaro wakabvapo.

¹² Navo vakazisa jaha rechizwa, vakaembezehwa kakurutu.

Kubva mu Trowa kuenda Miretu

¹³ Asi isisu, takatanga kuenda ngo ngarava, takahluza kuenda Asoni, apo techigarira kuashira Pauri; ngokuti iye wayinga agura kudaro, achida pachake kufamba ngo tshoka.

¹⁴ Naapo iye ashongana nesu mu Asoni, takamuashira, tikaguma Miturani.

¹⁵ Techihluza kubvapo ngo zuva raitevera, takaguma kundau inoita maringwa no Kiyo, no zuva raitevera, takaguma Samo; na ngo zuva raitevera, takaguma Miretu.

¹⁶ Ngokuti Pauri wakagura kuhluza kudarika Efesu, kuti asazogara mukuvo mu Aziya; ngokuti waikasira, kuti kudari kungaitika ungazovapo Jerusarema ngo zuva ro Pentekosti.

Masoko a Pauri ku chiara cho Efesu

¹⁷ No kubva Miretu wakatumira Efesu, akadanija kwaari vakuru vo chiara.

¹⁸ Naapo vaguma kwaari, wakati kwavari: Imwimwi mwambhwine munoziva kuti kubvira ngo zuva ro kutanga ro ndakanghwina mu Aziya, kugara kwendakaita nemwi mukuvo wese,

¹⁹ ndechishandira Mambo ngo kupfava kwese kwo mupinimijo, na ngo musoji, na ngo kuejwa ukwo kwakandigumira ngo ndava yo kutandira mazano kwa vaJudha.

²⁰ Nokuti no njira yo ndisikazivi kuregera kuteketesa kwomuri chiro chinomubesera, ndechimujijisa pambhene, no kubva ku nyumba kuenda ku nyumba imweni,

²¹ ndechiyita chapupu kwavari vese vaJudha no vagiriki kutenderuka kuna Mwari, no kugonda kuna Mambo wedu Jesu Kristu.

²² Nazvino ringiranyi, ndechisungwa mu mweya, ndinoenda Jerusarema, ndisikazivi izvo zvinondigumira apo.

²³ Kwega kuti Mweya Wakachena unopupura mu madhoropa ese kuti zvisungo no matambujiko zvinondigarira.

²⁴ Asi andiverengi kupona kwangu inga chiro chinodikana kwendiri, kuti ndipeje muhambo wangu, no mushando wo ndakaashira kuna Mambo Jesu kupupura vhangeri ro nyasha ja Mwari.

²⁵ Nazvino, vonanyi, ndinoziva kuti imwimwi mwese mwendakahambira mukati mwenyu ndechichumaira Umambo hwa Mwari, amuchazovonizve hope yangu.

²⁶ Ndizvo ndinopupura kwomuri ngo iri zuva kuti ndakachena kuno ngazi yenyu yese.

²⁷ Ngokuti andizivi kuregera kumubvunja kwese kupanga kwa Mwari.

²⁸ Jingwarirenyi no mushambi wese wo mwakaemesehwa panyezuru pawo ndi Mweya Wakachena, kuti muyite vavonisi vawo, kuti muhushe chiara cha Mwari chaakatenga ngo ngazi yake ambhwine.

²⁹ Ndinoziva kuti ngosure kwokubva kwangu, mathika akashata anozonghwina pakati penyu, asikaitiri nyasha mushambi;

³⁰ no pakati penyu mwambhwine, panozobuda vandhu, vechivereketa zvinopaukisa kukweva vajiji kuti vavatevere.

³¹ Ndizvo rindanyi mwechicherecheja kuti ngo mukuvo wo makore matatu andizivi kuregera kupanga vese usiku no masikati, ndechichema musoji.

³² Nazvino ndinomupira kuna Mambo, no kuizwi ro nyasha jake, iro rine simba ro kumuvaka, no kumupa ndhaka mukati mwavo vese vakacheneswa.

³³ Andizivi kutongoemura sirivha, nokuti mukore, nokuti zvokufuka zvo mundhu.

³⁴ Imwimwi mwambhwine munoziva kuti iji nyara jakashandira izvo zvo ndaitama, no zvo avo vayiva neni.

³⁵ Ngo zviro zvese ndakamupa chivonero, kuti ngo kushanda kudaro kunosisira kuti mubesere avo vasina simba, no kucherecheja mazwi a Mambo Jesu, kuti wakati ambhwine: “Kunopinda kudakajisa kupa, kuno kuashira.”

³⁶ Naapo avereketa kudaro wakagwadama pasi, akakumbira navo vese.

³⁷ Navo vese vakachema musoji, vakakumbatira pamusipa wa Pauri, vakamuchungamija ngo muromo,

³⁸ vechitambujika kakurutu ngo izwi raakavereketa, rokuti avachazombovonizve hope yake. Vakamuperekeja kuenda ku ngarava.