Zvak. 2 - NOVO TESTAMENTO EM NDAU

Kubzuka kwo Mweya Wakachena

¹ Kwakati raguma zuva ro Pentekosti vayiva vese pamwepo paugaro humwehwo.

² Paripo rakaguma kubva mu denga bope rakadari ngo kuvhuvhutha kwo dutu rine simba, naro rakazarisa nyumba yese apo po vayigara.

³ Kwakavoneka kwavari ndimi, jakadari ngo muriro, jakajiparajanisa pakati pavo; jikagara panyezuru pavo vese.

⁴ Navo vese vakazariswa ndi Mweya Wakachena, vakatanga kuvereketa ngo ndimi jimweni, kudari ngo zvaakapa Mweya kwavari kuti vaverekete.

⁵ Zvino vayigara mu Jerusarema vaJudha, vandhu vanodira, vakabva ku majinja ese ari pasi po mu denga.

⁶ Naapo iri bope rayinga razwika, mbungano yakaungana, navo vakashamiswa ngokuti mundhu wese wakavazwa vechivereketa ngo rurimi rwake.

⁷ Navo vese vakashamiswa no kukangaijwa, vechiti: “Vonanyi, avo vese vanovereketa avari vagarire here?”

⁸ Nesu tese tinoyita mazwirenyi mundhu wese echivereketa ngo rurimi rwedu, rwetakabarwa narwo.

⁹ Vapartiya, no vaMede, no vaEramu, no vagari vo Mesopotamiya, no vo Judhiya, no vaKapadhosiya, mu Pontu, no mu Aziya,

¹⁰ jese Frigiya, no Pamfriya, no Egipite, no marupande o Ribhiya anotendeneja Kureni, no zvigarandimo zve Roma, vese vaJudha no vo majinja vanotenda chijudha.

¹¹ Vakrete, no vaArabhiya, tinovazwa vechivereketa ngo ndimi jedu ngoukuru hwa Mwari.

¹² Navo vese vakashamiswa no kukangaijwa, vechiti umwe kuno umweni: “Chinorevenyi ichi?”

¹³ Asi vamweni vechiita jee, vakati: “Vazara ngo vhini ibza.”

Kuchumaira kwa Pedru

¹⁴ Asi Pedru echiyima pamwepo no vari gumi naumwe, wakatandhamusa izwi rake, echivereketa kwavari echiti: “Vanarume vo Judhiya, nemwi mwese munogara mu Jerusarema, ichi ngachizivikane kwomuri, mupurutane mazwi angu.

¹⁵ Ngokuti ava avazivi kuraja kudari ngo zvo munorangarira; kwechivoneka kuti uchiri mukuvo wo nguva yochitatu wo zuva.

¹⁶ Asi ichi ndicho chakavereketwa ngo muprofeti Joweri:

¹⁷ Mwari unoti, kunozoitika ngo mazuva okupejisira kuti ndinozodurura Mweya wangu panyezuru po vandhu vese; no vana venyu vo rume no vo kaji vanozoprofeta, no majaha enyu anozovona zvivoniso, no harahwa jenyu jinozorota hope.

¹⁸ Eya, no panyezuru po varanda vangu vo vanarume, no panyezuru po varandakaji vangu ndinozodurura ngaao mazuva Mweya wangu, navo vanozoprofeta.

¹⁹ Neni ndinozopangijira zvishamiso mu denga, no zvivoniso mu nyika, ngazi no muriro, no kupwititika kwo usi.

²⁰ Zuva rinozotsandujwa kuyita chidima, no mweji kuyita ngazi, risati raguma zuva guru, no rine mbiri ra Mambo.

²¹ Kunozoitika kuti pikija ndiyani unozokumbira ngo zina ra Mambo unozoponeswa.

²² Imwimwi vanarume vaIsraeri izwanyi mazwi aya: Jesu wo Nazaretha, mundhu wakapangijihwa kwomuri ndi Mwari ngo mishando inosimba no mishamiso, no zvivoniso, zvaakayita Mwari ndiye pakati penyu, kudari ngo zvomunoziva mwambhwine.

²³ Iye wakapihwa ngo kuemeswa kwo bangano na ngo kuziva kwa Mwari, imwimwi ngo nyara jo vandhu vakashata mwakamukohomera no kumuuraya.

²⁴ Iye Mwari wakamumusa, amusunungura kuhwajihwa kwo kufa; ngokuti akusaitongoitika kuti asungwe ndikwo.

²⁵ Ngokuti Dhavhidha wakavereketa ndiye, kuti: ‘Ndakamuvona Mambo ngo nguva jese, andori pamberi po hope yangu; ngokuti iye uri ngo kumuho kwangu kuti ndisazotshukunuswa.’

²⁶ Ndizvo mwoyo wangu wakadakara, no rurimi rwangu rwakadakajwa; no nyama yangu inozogara mukugonda.

²⁷ Ngokuti iwewe auzoregeri mweya wangu uri mu Haidhesi, zve, auzotenderi Wakachena wako kuti avore.

²⁸ Iwewe wakandizivisa njira jo kupona, unozondizarisa ngo kudakajwa kwehope yako.

²⁹ Vanarume, vakoma, ndingavereketa ngo kurerukihwa ngo ndava ya baba mukuru Dhavhidha, ngokuti iye wakafa, akavigwa, no guva rake riri kwetiri mbhera nyamasi.

³⁰ Ndizvo, ngokuti wayiva muprofeti, echiziva kuti Mwari wakapika kwaari ngo mbhiko, yokuti ku mubarihwana wo chiunu chake ngo kwenyama unozoemesa umwe kuti agare pa dendemaro rake;

³¹ iye echivona ichi, wakavereketa ngo kumuka kwa Kristu kwo vakafa, kuti Mweya wake auzivi kuregehwa uri mu Haidhesi, zve, nyama yake aizivi kutongovora.

³² Uwu Jesu, Mwari wakamumusa kwo vakafa, nesu tese tiri zvapupu zvakwo.

³³ Ndizvo iye echikuriswa ngo kumuho wa Mwari, aashira chigondiso cho Mweya Wakachena kubva kuna Baba, wakadurura ichi cho munovona, no cho munozwa.

³⁴ Ngokuti Dhavhidha aazivi kukwira mu denga; asi wakati, Jehovha wakati kuna Mambo wangu: Gara ngo kumuho kwangu,

³⁵ mbhera ndiite vakorore vako chitambarariro cho tshoka jako.

³⁶ Ndizvo ngavazive vo nyumba yese ya Israeri kuti Mwari wakamuita Mambo na Kristuzve uwo Jesu wo mwakakohomera.”

³⁷ Naapo vazwa, vakabaiwa mu mwoyo yavo, navo vakati kuna Pedru no kuna vapostori vamweni: “Vanarume, vakoma, tinozoitenyi?”

³⁸ Na Pedru wakati kwavari: “Tenderukanyi, umwe ngaumwe wenyu, mubhapatiswe mwese ngo zina ra Jesu Kristu, ngo ndava yo kuregerehwa kwo zvishaishi zvenyu, nemwi munozoashira chipuwo cho Mweya Wakachena.

³⁹ Ngokuti chigondiso chakagondiswa kwomuri, no kuvana venyu, no kwavari vese vari ndhambo, vese avo vanozodanijwa ndi Mambo Mwari wedu.”

⁴⁰ Na ngo mazwi amweni akawanda iye wakapupura no kuvapanga, echiti: “Jiponesenyi ngokwenyu kubva kuno uwu mubarihwana wakashongoroka.”

⁴¹ Ndizvo avo vakaashira mazwi ake ngo kudakara, vakabhapatiswa, na ngo zuva rimwero kwakanyengejehwa kwavari vandhu vanoda kukwana zviuru zvitatu (3.000).

Kupona kwo vatendi vokutanga

⁴² Navo vakavangirira kungwarira zvijijiso zvo vapostori, no kuiyana, mukugura chimanda, no mukukumbira.

⁴³ No mundhu wese wakagumihwa ngo kutya, no mishando yakawanda no zvivoniso zvakaitwa ngo vapostori.

⁴⁴ Navo vese vakatenda vayiva pamwepo, no zviro zvavo vakazviita muhengo pamwepo;

⁴⁵ navo vakatengesa upfumi hwavo, no mujiyo javo, vakazvikovanisira kwavari vese kudari ngo kutama kwo mundhu.

⁴⁶ Navo zuva ngo zuva vakagara pamwepo ngo chisungo chimwe mu themperi, vechigura chimanda kumakanyi avo, vakaha ngo kudakara na ngo mwoyo wo kuzwana,

⁴⁷ vechikuja Mwari, vechidikanwa ngo vandhu vese. Na Mambo wakanyengejera kwavari zuva ngo zuva avo vayiponeswa.